Renu Desai | దీపావళి అయిపోయినా అర్ధరాత్రి పేల్చ‌డం ఏంటి.. ‘ఇతరులను హింసించకండి’ అంటూ రేణూ ఘాటు వ్యాఖ్యలు!

Renu Desai | దీపావళి పండుగ ముగిసినప్పటికీ అర్ధరాత్రి వేళల్లో భారీ శబ్దాలు వచ్చే టపాసులు కాల్చడంపై ప్రముఖ నటి రేణూ దేశాయ్ తీవ్ర అసహనం వ్యక్తం చేశారు. ఎదుటివారి ఇబ్బందులను పట్టించుకోకుండా ఇష్టానుసారంగా వ్యవహరించడం మూర్ఖత్వమేనని మండిపడ్డారు. ఈ మేరకు సోషల్ మీడియా వేదికగా ఆమె పెట్టిన సుదీర్ఘ పోస్ట్ ప్రస్తుతం చర్చనీయాంశంగా మారింది. పండుగను ఆనందంగా జరుపుకోవడంలో తప్పులేదని, అయితే ఆ ఆనందం ఇతరులకు ఇబ్బందిగా మారకూడదని ఆమె హితవు పలికారు.

Renu Desai | దీపావళి పండుగ ముగిసినప్పటికీ అర్ధరాత్రి వేళల్లో భారీ శబ్దాలు వచ్చే టపాసులు కాల్చడంపై ప్రముఖ నటి రేణూ దేశాయ్ తీవ్ర అసహనం వ్యక్తం చేశారు. ఎదుటివారి ఇబ్బందులను పట్టించుకోకుండా ఇష్టానుసారంగా వ్యవహరించడం మూర్ఖత్వమేనని మండిపడ్డారు. ఈ మేరకు సోషల్ మీడియా వేదికగా ఆమె పెట్టిన సుదీర్ఘ పోస్ట్ ప్రస్తుతం చర్చనీయాంశంగా మారింది. పండుగను ఆనందంగా జరుపుకోవడంలో తప్పులేదని, అయితే ఆ ఆనందం ఇతరులకు ఇబ్బందిగా మారకూడదని ఆమె హితవు పలికారు. దీపావళి పండుగ సమయంలో టపాసుల శబ్దాలు, వాటి వల్ల కలిగే ఇబ్బందులపై తాను స్పందించకపోవడానికి గల కారణాన్ని కూడా రేణూ దేశాయ్ వెల్లడించారు. పండుగ రోజున ఈ విషయంపై ఏమైనా మాట్లాడితే తనను హిందూ వ్యతిరేకిగా ముద్ర వేసే అవకాశం ఉందని భావించి మౌనంగా ఉన్నట్లు తెలిపారు. అయితే పండుగ పూర్తయిన తర్వాత కూడా అర్ధరాత్రి వేళల్లో భారీ శబ్దాలతో టపాసులు కాల్చడంపై ఆమె ప్రశ్నించారు.

రాత్రి 11 గంటలవుతోంది.. అయినా ప్రజలు ఇంకా పెద్ద శబ్దాలు వచ్చే టపాసులు కాలుస్తూనే ఉన్నారు. దీపావళి రోజున నేను ఏమైనా మాట్లాడి ఉంటే నన్ను హిందూ వ్యతిరేకి అని ముద్ర వేసేవారు. అందుకే ఆ రోజు మౌనంగా ఉండిపోయాను. కానీ పండుగ అయిపోయిన తర్వాత కూడా రాత్రి 11 గంటలకు ఇంత పెద్ద శబ్దాలతో టపాసులు కాల్చడానికి ఇప్పుడు ఏ పండుగ ఉంది? అంటూ ఆమె తన అసహనాన్ని వ్యక్తం చేశారు.టపాసుల భారీ శబ్దాల వల్ల సమాజంలోని ఇతరులు ఎదుర్కొనే సమస్యలను కూడా రేణూ దేశాయ్ ప్రస్తావించారు. ప్రతి ఒక్కరూ తమ ఆనందం గురించి మాత్రమే ఆలోచిస్తూ.. చుట్టుపక్కల ఉన్న వృద్ధులు, చిన్నపిల్లలు, అనారోగ్యంతో బాధపడుతున్న వారి ఇబ్బందులను పట్టించుకోవడం లేదని ఆవేదన వ్యక్తం చేశారు. ఇతరుల బాధలను అర్థం చేసుకోలేకపోవడం, కనీస సానుభూతి చూపించకపోవడం సరైన ప్రవర్తన కాదని పేర్కొన్నారు.

దీపావళి అనేది దీపాల పండుగ అని, దానిని శబ్దాల పోటీగా మార్చకూడదని సూచించారు. పండుగను సంతోషంగా జరుపుకోవాలని, అయితే ఆ వేడుకల కారణంగా పక్కవారికి ఇబ్బందులు కలగకుండా చూసుకోవాలని కోరారు. టపాసులు కాల్చడంపై సమయపాలన పాటించాలని రేణూ దేశాయ్ విజ్ఞప్తి చేశారు. కనీసం రాత్రి 10 గంటలలోపే టపాసులు కాల్చడం పూర్తి చేయాలని, ఆ తర్వాత ప్రజలను ప్రశాంతంగా నిద్రపోనివ్వాలని అన్నారు. తమ సరదా కోసం ఇతరులను ఇబ్బందులకు గురిచేయడం సరికాదని స్పష్టం చేశారు.మీ ఆనందం కోసం తోటి మనుషులను హింసించకండి. కొంచెం దయ చూపించండి అంటూ ఆమె చేసిన విజ్ఞప్తి పలువురి దృష్టిని ఆకర్షిస్తోంది. పండుగల సమయంలో వ్యక్తిగత ఆనందంతో పాటు సామాజిక బాధ్యత కూడా గుర్తుంచుకోవాలని ఆమె పేర్కొన్నారు. ఇక కాలుష్యానికి సంబంధించిన అంశాన్ని కూడా రేణూ దేశాయ్ తన పోస్ట్‌లో ప్రస్తావించారు. ఏడాదిలోని 364 రోజుల పాటు వాహనాలు, పరిశ్రమల కారణంగా కాలుష్యం ఉంటోందని, దాని గురించి ప్రత్యేకంగా మాట్లాడి ప్రయోజనం లేదని ఆమె అభిప్రాయపడ్డారు. అయితే టపాసుల విషయంలోనూ ఇతరులకు కలిగే ఇబ్బందులను గుర్తించడం ముఖ్యమని ఆమె అభిప్రాయ‌ప‌డ్డారు.