‘మణి’పూర్‌ మరణ శాసనం

ఎక్కడిదీ రాజకీయం ఎక్కడిదీ హింసాకండ కావరం ఎక్కడిదీ మృగరాక్షసం

ఎక్కడిదీ రాజకీయం
ఎక్కడిదీ హింసాకండ కావరం
ఎక్కడిదీ మృగరాక్షసం
ఎక్కడినుంచి వచ్చిపడిందీ దేశంలో

నగ్నమైన దేహానికి ఊరేగింపులేంది
మెడపై తలలు కొయ్యలకు వేలాడుడేంది
అస్పష్టంగా ఉన్న అల్లర్ల వెనుక
సుస్పష్టమైన సత్యం ఏమిటి ?

హృదయాలు గగ్గోలు పెడుతున్నాయి
ఉదయాలు ఎరుపెక్కిపోతున్నాయి
శోకతప్త గొంతులు అలసిపోతున్నాయి
పిడికిలెత్తిన చేతులు న్యాయం దొరకక
వాలిపోతున్నాయి..
ఇదేనా వెలిగిపోతున్న భారత్‌..?

ఏ పాలకుడి నాటకం ఇది
ఏ నాయకుడి వికృతం ఇది
ఏ దుర్మార్గుడి రాజనీతి ఇది
విధి విధ్వంసం సృష్టిస్తుంటే
విశ్వగురు మౌనం దేనికి?

నీ ముఖౌటం ముభావంగా
నీ నిజరూపం వికటాట్టహాసంగానా?
మళ్లీ.. రెజ్లర్లకు దక్కిన దమననీతే
నగ్న గాయాలకు కూడానా..
ఎన్నాళ్లూ ఈ దౌర్భాగ్యం..?
ఎన్నేళ్లు ఈ ‘మణి’పూర్‌కు
మరణ శాసనం

– శ్రీపాద రమణ