జనవరి వచ్చింది వేగంగా!

కాలాన్ని మనం ప్రశ్నించలేం కఠిన పరీక్షకు నిలబెడుతుంది ఫలితం ఎప్పుడూ ఫలహారం కాదు

కాలాన్ని మనం ప్రశ్నించలేం
కఠిన పరీక్షకు నిలబెడుతుంది
ఫలితం ఎప్పుడూ ఫలహారం కాదు

అన్ని వేళల్లో అమృతం ఒలకదు
విషాన్ని గరళంలో మోయాలి కొంత
సంతోషంగా భవిష్యత్తును పలకరించాలి

గ్రహాలు అనుకూలం అవనప్పుడు
మంచీచెడులను కావడికి తగిలించుకొని
ఓపికగా ముందుకు ప్రయాణం సాగించాలి

ఎదురు గాలి నిర్లక్ష్యంగా తోసినప్పుడు
గుండె గతిని సంతులనం చేసుకుని
సమయం కోసం సహనంగా వేచిచూడాలి

డిసెంబర్‌ వెక్కిరింత ఎంత సేపు
జనవరి వేగంగా వచ్చింది కదా
విజయాలు క్యూ కట్టి వస్తాయి మళ్లీ!

-దాసరి మోహన్‌
99853 09080