బడి బస్సు భద్రమేనా!

పాఠశాల విద్యార్థుల ప్రయాణ భద్రతకు అత్యంత కీలకం బస్సుల ఫిట్‌నెస్‌. కానీ కొన్ని పాఠశాలలు బస్సులను ఫిట్‌నెస్‌గా ఉంచడంతో నిర్లక్ష్యం వహించడంతో ప్రమాదాలు చోటుచేసుకుంటున్నాయి.

• కామారెడ్డి జిల్లాలో స్కూల్‌ బస్సుల ‘ఫిట్‌నెస్‌’పై ఆర్టీవో తనిఖీలు
• ఇప్పటివరకూ 173 బస్సులకు పరీక్షలు పూర్తి
• ఇంకా ఫిట్‌నెస్‌ చేయించుకోని 96 బస్సులు
• నిర్లక్ష్యంగా వ్యవహరిస్తున్న పాఠశాలల యాజమాన్యాలు
• సామర్థ్యంలేని వాహనాలు సీజ్‌ చేస్తామని అధికారుల హెచ్చరికలు

కామారెడ్డి, జూన్‌ 12 : పాఠశాల విద్యార్థుల ప్రయాణ భద్రతకు అత్యంత కీలకం బస్సుల ఫిట్‌నెస్‌. కానీ కొన్ని పాఠశాలలు బస్సులను ఫిట్‌నెస్‌గా ఉంచడంతో నిర్లక్ష్యం వహించడంతో ప్రమాదాలు చోటుచేసుకుంటున్నాయి. ఈ నెల 15 నుంచి నూతన విద్యా సంవత్సరం ప్రారంభకానున్నది. పాఠశాలలకు దూరంగా ఉన్న తల్లిదండ్రులు తమ పిల్లలను పాఠశాలకు చెందిన బస్సు, ఆటోల్లో పంపిస్తుంటారు. ఒక పాఠశాలలు విద్యార్థుల అడ్మిషన్లు, ఫీజులపై ఉన్న శ్రద్ధ వారు ప్రయాణించే బస్సులపై లేకపోవడం గమనార్హం. జిల్లాలో కొన్ని పాఠశాలల యాజమాన్యాలు తక్కువ ధరకు బస్సులను కొనుగోలు చేస్తున్నాయి. వాటికి కొత్తగా రంగులు వేయించి ఫిట్‌నెస్‌ లేకుండా, ఎలాంటి అనుభవం లేని డ్రైవర్లతో బస్సులను నడిపిస్తున్నారు. ఫిట్‌నెస్‌ రెన్యూవల్‌ చేయించుకోవడంలోనూ పాఠశాలల యాజమన్యాలు నిర్లక్ష్యంగా వ్యవహరిస్తున్నాయి. విద్యా సంస్థల ప్రారంభానికి ముందే బస్సులను కండీషన్‌లో ఉంచుకోవాల్సిన యాజమాన్యాలు తనిఖీలు చేస్తే గానీ ఫిట్‌నెస్‌ చేయించడానికి ముందుకురావడంలేదు. జిల్లాలోని పలుచోట్ల అధికారులు నామమాత్రంగా తనిఖీలు చేస్తున్నట్లు ఆరోపణలు కూడా ఉన్నాయి. కామారెడ్డి జిల్లాలో మొత్తం 277 స్కూల్‌ బస్సులు ఉన్నాయి.ఇందులో ఇప్పటి వరకు కేవలం 173 బస్సులకు ఫిట్‌నెస్‌ పరీక్షలు నిర్వహించగా, ఇంకా 96 బస్సులకు ఆ పాఠశాలల యాజమాన్యాలు చేయించుకోలేదు. తమ పాఠశాలల్లో చేరాలని ప్రతి గ్రామంలో రూ. లక్షలు ఖర్చుచేస్తూ జోరుగా ప్రచారం నిర్వహించే పాఠశాలల యాజమాన్యాలు..విద్యార్థులను తరలించే బస్సుల ఫిట్‌నెస్‌పై మాత్రం నిర్లక్ష్యంగా వ్యవహరిస్తున్నారు. ఇప్పటికే ఆర్టీవో అధికారులు స్కూల్‌ బస్సు డ్రైవర్లకు బస్సుల ఫిట్‌నెస్‌, డ్రైవర్లు తీసుకోవాల్సి జాగ్రత్తలు, నిబంధనలపై అవగాహన కల్పించారు.

గతంలో చోటుచేసుకున్న ప్రమాదాలు

జిల్లాలో పలు పాఠశాలల బస్సులకు ఫిట్‌నెస్‌ లేకపోవడంతో పలు ప్రమాదాలు చోటుచేసకున్న ఘటనలూ ఉన్నాయి. పాత వాహనాలను తక్కువ ధరకు కొనుగోలు చేసి నడిపిస్తున్నారు. బస్సులను నడపడానికి అనుభవం లేని డ్రైవర్లను తక్కువ వేతనాలకు నియమించుకుంటున్నారు. దీంతో ప్రమాదాలు చోటుచేసుకుంటున్నాయి. తల్లిదండ్రులు తమ పిల్లలను పాఠశాల బస్సుల్లో పంపించాలంటేనే ఆందోళనకు గురవుతున్నారు.ఇప్పటికైనా ఫిటెనెస్‌తో ఉన్న బస్సులను నడపాలని, అనుభవం ఉన్న డ్రైవర్లను నియమించాలని విద్యార్థుల తల్లిదండ్రులు కోరుతున్నారు.

నిబంధనలు ఇవే..

• పాఠశాల బస్సు నడిపే డ్రైవర్‌కు 5 సంవత్సరాల అనుభవం ఉండాలి.
• 60 ఏండ్లు నిండిన డ్రైవర్లు బస్సు నడపరాదు.
• 15 ఏండ్లు నిండిన బస్సులో పాఠశాల విద్యార్థులను తీసుకెళ్లరాదు.
• డ్రైవర్లకు వైద్య పరీక్షలను పాఠశాల యాజమాన్యం
• ప్రతి మూడు నెలలకోసారి చేయించాలి.
• బస్సుకు కనీసం ఒక అటెండర్‌ను నియమించాలి.
• పాఠశాలలోని ప్రతి బస్సుకు ఒక కమిటీని ఏర్పాటు చేయాలి. కమిటీలో డ్రైవర్‌, ఒక టీచర్‌, ఒక విద్యార్ధి తల్లిదండ్రులు ఉండాలి.
• పాఠశాల బస్సు 40 స్పీడ్‌ కన్నా ఎక్కువగా వెళ్లరాదు.
• ప్రతి సంవత్సరం ఆర్టీఏ అధికారుల చేత ఫిట్‌నెస్‌ పరీక్ష చేయించాలి.
• బస్సు తలుపులకు లాక్‌ సిస్టం ఏర్పాటు చేయడంతోపాటు బస్సు కిటికీలకు గ్రిల్స్‌ అమర్చాలి.
• బస్సుల్లో ఫస్ట్‌ ఎయిడ్‌, ఎమర్జెన్సీ బాక్సు, ఫైర్‌ ఎస్టింగ్విషర్‌ను బస్సు ఇంజిన్‌ కంపార్ట్‌ మెంట్‌లో ఏర్పాటు చేసుకోవాలి.
• బస్సులకు పసుపు రంగు వేయడంతోపాటు ముందు, వెనుకభాగంలో స్కూల్‌ బస్సు ఆన్‌ స్కూల్‌ డ్యూటీ రాయించడంతోపాటు విద్యార్థుల బ్యాగులు ఉంచేందుకు ప్రత్యేక స్థలం ఉండేలా చర్యలు తీసుకోవాలి.

ఫిట్‌నెస్‌ లేని బస్సులు నడపితే కఠిన చర్యలు

కామారెడ్డి జిల్లాలో 277 బస్సులకు ఇప్పటి వరకు 173 బస్సులకు ఫిటెనెస్‌ పరీక్ష చేయించుకున్నారు.మిగతా 96 బస్సులను పాఠశాలలు ప్రారంభమయ్యేలోగా చేయించుకోవాలి. ఫిట్‌నెస్‌ లేని బస్సులను నడపడానికి వీలు లేదు. ఒక వేళ నడిపితే కఠిన చర్యలు తీసుకుంటాం. అటువంటి వాహనాలను సీజ్‌ చేస్తాం.

– సంతోష్‌కుమార్‌, జిల్లా రవాణాశాఖాధికారి