నిజాంసాగర్‌ నీటి విడుదల

నిజాంసాగర్‌ ప్రాజెక్టు నుంచి ప్రధాన కాలువ ద్వారా ఆదివారం నీటిని విడుదల చేశారు. ఆయకట్టు రైతులు నాట్లు వేయనున్న దృష్ట్యా మాజీ స్పీకర్‌, బాన్సువాడ ఎమ్మెల్యే పోచారం శ్రీనివాసరెడ్డి, జుక్కల్‌ ఎమ్మెల్యే లక్ష్మీకాంతారావు, జడ్పీ చైర్‌పర్సన్‌ దఫేదార్‌ శోభారాజు, ఇరిగేషన్‌ అధికారులతో కలిసి నీటి విడుదలను ప్రారంభించారు.

• నిజాంసాగర్‌, జూన్‌ 23: వానాకాలం పంటల సాగుకు

నిజాంసాగర్‌ ప్రాజెక్టు నుంచి ప్రధాన కాలువ ద్వారా ఆదివారం నీటిని విడుదల చేశారు. ఆయకట్టు రైతులు నాట్లు వేయనున్న దృష్ట్యా మాజీ స్పీకర్‌, బాన్సువాడ ఎమ్మెల్యే పోచారం శ్రీనివాసరెడ్డి, జుక్కల్‌ ఎమ్మెల్యే లక్ష్మీకాంతారావు, జడ్పీ చైర్‌పర్సన్‌ దఫేదార్‌ శోభారాజు, ఇరిగేషన్‌ అధికారులతో కలిసి నీటి విడుదలను ప్రారంభించారు. అనంతరం ఎమ్మెల్యే పోచారం మాట్లాడుతూ రాష్ట్రంలో మొదటగా ఈ ప్రాంతంలోని రైతులు రోహిణి కార్తెలోనే నార్లు పోసి త్వరగా నాట్లు వేస్తారని అన్నారు. గత ఏడాది మాదిరి ఈ సంవత్సరం కూడా జూన్‌ నెలలోనే నీటిని విడుదల చేయాలని రైతులు కోరారని, రైతుల కోరికను సీఎం రేవంత్‌రెడ్డి దృష్టికి తీసుకెళ్లగా సానుకూలంగా స్పందించినట్లు తెలిపారు. రైతుల కోరిక మేరకు వానాకాలం పంటల సాగుకు నీటిని విడుదల చేశామన్నారు. నిజాంసాగర్‌ ప్రాజెక్టు పూర్తిస్థాయి సామర్థ్యం 17.6 టీఎంసీలు కాగా, ప్రస్తుతం 4.3 టీఎంసీల నీరు ఉన్నదని, ఇందులో డెడ్‌ స్టోరేజ్‌ పోను 3.6 టీఎంసీల నీటిని కాలువలకు విడుదల చేయవచ్చని తెలిపారు. మొదటి విడుతలో భాగంగా 15రోజులపాటు 1400 క్యూసెక్కుల నీటిని విడుదల చేస్తామని, తర్వాత ఒక్కో విడుతలో పది రోజులు నీటి విడుదల జరుగుతుందని చెప్పారు. ఇరిగేషన్‌, రెవెన్యూ, పోలీసు శాఖలు సమన్వయంతో పనిచేసి అన్ని డిస్ట్రిబ్యూటరీలకు నీళ్లు అందేలా చర్యలు తీసుకోవాలని సూచించారు. రాష్ట్రంలోని ప్రాజెక్టుల్లో నీళ్లు లేకపోవడంతో ఈ ఏడాది వానాకాలం పంటల సాగుకు నీరు విడుదల చేయలేదని, కేవలం నిజాంసాగర్‌ నుంచి మాత్రమే నీటి విడుదల జరిగిందన్నారు. కార్యక్రమంలో వివిధ శాఖల అధికారులు, ప్రజాప్రతినిధులు, నాయకులు పాల్గొన్నారు.