Visit:
బోధన్‌, నవంబర్‌ 29 : తొలి విడుత స్థానిక సంస్థలకు సంబంధించి నామినేషన్ల స్వీకరణ గడువు ముగిసింది. తొలి రెండ్రోజుల్లో అంతంత మాత్రంగానే నామినేషన్లు దాఖలు కాగా, చివరిరోజైన శనివారం మాత్రం వెల్లువలా వచ్చి పడ్డాయి. బోధన్‌ డివిజన్‌లోని 11 మండలాల్లోని 184 సర్పంచ్‌ స్థానాలకు, 1642 వార్డు స్థానాలకు ఎన్నికలు జరుగుతున్న విషయం తెలిసిందే. ఆయా స్థానాలకు నామినేషన్ల గడువు శనివారం సాయంత్రంతో ముగిసింది. అప్పటికే నామినేషన్‌ కేంద్రాల వద్ద అభ్యర్థులు పెద్దసంఖ్యలో బారులు తీరారు. వరుసలో ఉన్న వారందరికీ అధికారులు టోకెన్లు ఇచ్చారు. అభ్యర్థులు బారులు తీరడంతో రాత్రి 10 దాటినా నామినేషన్లు స్వీకరించారు.
తొలి రెండ్రోజులు బోసిపోయి కనిపించిన నామినేషన్ల స్వీకరణ కేంద్రాల్లో శనివారం సందడి నెలకొన్నది. చివరి రోజు కావడంతో అభ్యర్థులు భారీగా తరలివచ్చారు. పెద్ద ఎత్తున నామినేషన్లు దాఖలవుతుండటంతో అధికారులు, సిబ్బంది ఉక్కిరిబిక్కిరయ్యారు. బోధన్‌, సాలూర, నవీపేట్‌, రెంజల్‌, ఎడపల్లి, కోటగిరి, పొతంగల్‌, రుద్రూర్‌, వర్ని, చందూర్‌, మోస్రా మండలాల్లో కొన్ని చోట్ల రాత్రి 8 గంటల వరకు, మరికొన్ని చోట్ల రాత్రి 10 గంటల వరకు నామినేషన్ల స్వీకరణ కొనసాగింది. సాలంపాడ్‌, కల్దుర్కి, పెంటాకలాన్‌, నవీపేట్‌, రుద్రూర్‌, సాటాపూర్‌, పొతంగల్‌ నామినేషన్ల కేంద్రాల వద్ద అభ్యర్థులు గంటల పాటు వేచి ఉండాల్సిన పరిస్థితి ఏర్పడింది.
కోటగిరి గ్రామ సర్పంచ్‌ స్థానానికి తీవ్రమైన పోటీ కనిపించింది. ఇక్కడ సర్పంచ్‌ పదవికి 28 నామినేషన్లు దాఖలయ్యాయి. గురు, శుక్రవారాల్లో 12 నామినేషన్లు రాగా, చివరి రోజున మరో 16 మంది నామినేషన్లు వేశారు.
