B.Tech | గుడ్‌న్యూస్‌.. ఉద్యోగం చేస్తూనే.. బీటెక్‌లో చేరొచ్చు

B.Tech | ఇంజినీరింగ్‌ పట్టా పుచ్చుకోవాలన్న మీ కల నెరవేరలేదా? ఉద్యోగం, కుటుంబ బాధ్యతల్లో తలమునకలయ్యారా? ఏదో ఓ కంపెనీలో చేరి ఉద్యోగం చేస్తున్నారా? అయితే మీరు ఉద్యోగం చేసుకొంటూనే.. బీటెక్‌ చేయొచ్చు.

B.Tech | హైదరాబాద్‌, జూలై 31(నమస్తే తెలంగాణ) :ఇంజినీరింగ్‌ పట్టా పుచ్చుకోవాలన్న మీ కల నెరవేరలేదా? ఉద్యోగం, కుటుంబ బాధ్యతల్లో తలమునకలయ్యారా? ఏదో ఓ కంపెనీలో చేరి ఉద్యోగం చేస్తున్నారా? అయితే మీరు ఉద్యోగం చేసుకొంటూనే.. బీటెక్‌ చేయొచ్చు. అటు ఉద్యోగాన్ని, ఇటు బీటెక్‌ చదువును రెండింటిని ఒకేసారి పూర్తిచేయవచ్చు. పరిశ్రమల్లో పనిచేసే వృత్తినిపుణులు బీటెక్‌లో చేరే అవకాశం కల్పిస్తూ అఖిల భారత సాంకేతిక విద్యామండలి (ఏఐసీటీఈ) కీలక నిర్ణయం తీసుకొన్నది.

ఈ విద్యాసంవత్సరం నుంచే ఈ అవకాశం ఇవ్వాలని నిర్ణయించింది. ఆసక్తి ఉన్న అభ్యర్థులు బ్యాచిలర్‌ ఆఫ్‌ టెక్నాలజీ, బ్యాచిలర్‌ ఆఫ్‌ ఇంజినీరింగ్‌ కోర్సుల్లో ప్రవేశాలు పొందవచ్చు. ఒక్కో బ్రాంచిలో 30 సీట్లుంటాయి. ఇది పార్ట్‌టైమ్‌ కోర్సు కాదు.. రెగ్యులర్‌ మోడ్‌లోనే నిర్వహిస్తారు. ఈ కోర్సుల నిర్వహణకు విద్యాసంస్థల నుంచి తాజాగా ఏఐసీటీఈ దరఖాస్తులను ఆహ్వానిస్తున్నది. ఏఐసీటీఈ అనుమతించిన కాలేజీలు, కోర్సుల్లో వర్కింగ్‌ ప్రొఫెషనల్స్‌ బీటెక్‌ కోర్సుల్లో చేరే అవకాశం ఉంటుంది. నిరంతర విద్యను ప్రోత్సహించడంలో భాగంగానే ఈ నిర్ణయం తీసుకొన్నట్టు ఏఐసీటీఈ వర్గాలు వెల్లడించాయి. ఇన్‌ సర్వీస్‌ ఎడ్యుకేషన్‌లో భాగంగా సంస్థలు, పరిశ్రమల్లో పనిచేస్తూనే బీటెక్‌ కోర్సుల్లో చేరి, పట్టాను పుచ్చుకోవచ్చు.

నిబంధనలిలా..

• ప్రభుత్వం నుంచి గుర్తింపు/ అనుమతి పొంది నడుస్తున్న పరిశ్రమలు, సంస్థల్లోని వృత్తినిపుణులు మాత్రమే ఈ కోటాలో ప్రవేశాలు పొందవచ్చు. ఇందుకు ఆయా సంస్థ యాజమాన్యం అనుమతి తప్పనిసరి.
• ఒక్కో జిల్లాలో ఒకటి నుంచి 4 వరకు విద్యాసంస్థలకు ఇలాంటి కోర్సులను నిర్వహించేందుకు అవకాశం కల్పిస్తారు.
• సివిల్‌, మెకానికల్‌ వంటి కోర్‌ కోర్సులతో పాటు, సైబర్‌ సెక్యూరిటీ, ఏఐఎంఎల్‌ వంటి కోర్సులను స్పెషలైజేషన్లుగా ఎంచుకోవచ్చు.