Inter Exams | ఇచ్చే ప్రశ్నలెన్ని..? పరీక్ష సమయమెంత?.. ఇంటర్‌ పరీక్షల విధానంపై స్పష్టత కరువు

Inter Exams | ఇంటర్‌ విద్యలో సర్కార్‌ కీలక సంస్కరణలు చేసింది. 80 : 20 విధానానికి శ్రీకారం చుట్టింది. ఫస్టియర్‌లోనూ ప్రాక్టికల్స్‌, ఇంటర్నల్స్‌ ప్రవేశపెట్టింది. ఈ క్రమంలో అనేక ప్రశ్నలు తలెత్తుతున్నాయి. ప్రశ్నపత్రం ఎలా ఉంటుంది? ఇచ్చే ప్రశ్నలెన్నీ? చాయిస్‌ ప్రశ్నలుంటాయా? లేదా?.

Inter Exams | హైదరాబాద్‌, మే 15 (నమస్తే తెలంగాణ) : ఇంటర్‌ విద్యలో సర్కార్‌ కీలక సంస్కరణలు చేసింది. 80 : 20 విధానానికి శ్రీకారం చుట్టింది. ఫస్టియర్‌లోనూ ప్రాక్టికల్స్‌, ఇంటర్నల్స్‌ ప్రవేశపెట్టింది. ఈ క్రమంలో అనేక ప్రశ్నలు తలెత్తుతున్నాయి. ప్రశ్నపత్రం ఎలా ఉంటుంది? ఇచ్చే ప్రశ్నలెన్నీ? చాయిస్‌ ప్రశ్నలుంటాయా? లేదా?. పరీక్ష సమయమెంత అన్న ప్రశ్నలు పీడిస్తున్నాయి.

కేవలం మార్కుల విధానాన్ని మాత్రమే ప్రకటించిన నేపథ్యంలో క్లారిటీ ఇవ్వాలని విద్యార్థి, అధ్యాపక సంఘాలు కోరుతున్నాయి. జూన్‌ 1 నుంచి ఇంటర్‌ క్లాసులు ప్రారంభంకానున్నాయి. మారిన పరీక్ష విధానంపై విద్యార్థులను ఇప్పటి నుంచే సన్నద్ధం చేయాలి. ఆలస్యమైతే విద్యార్థులు అలవాటు పడటం కష్టం. ఈ నేపథ్యంలో మాదిరి ప్రశ్నపత్రాలను విడుదల చేయాలని అధ్యాపక సంఘాల నేతలు కోరుతున్నారు. ఆరా తీసేందుకు ఇంటర్‌బోర్డు కార్యదర్శి అభిలాష అభినవ్‌ను ‘నమస్తే తెలంగాణ’ సంప్రదించగా, ఆమె స్పందించలేదు.

ఇవీ సందేహాలు..

• గణితం సబ్జెక్ట్‌కు ఇదివరకు 75 మార్కులకు పరీక్ష ఉండగా, ఇప్పుడు 60 మార్కులకు కుదించారు. ఫస్టియర్‌, సెకండియర్‌లో థియరీ ప్రశ్నపత్రంలో 15 మార్కులు తగ్గాయి. ఇప్పటివరకు ఇస్తున్న ప్రశ్నపత్రాల్లో భారీ మార్పులు చేయాలి. ఏ సెక్షన్స్‌లో ప్రశ్నలను కుదిస్తారు. ప్రశ్నలను తగ్గిస్తారా? లేక మార్కులను తగ్గిస్తారా? అన్న ప్రశ్నలు తలెత్తుతున్నాయి.
• స్వల్పకాలిక ప్రశ్నలు, దీర్ఘకాలిక ప్రశ్నల సంఖ్య అలాగే ఉంటుందా? లేక మారుస్తారా?.
• పరీక్ష సమయం 3 గంటలే ఉంటుందా?.
• కామర్స్‌, ఎకనామిక్స్‌, అకౌంటెన్సీ, పొలిటికల్‌ సైన్స్‌, హిస్టరీ పేపర్లకు ఇది వరకు 100 మార్కులుండగా, ఇప్పుడు 80మార్కులకు కుదించారు. కుదించిన 20శాతం ప్రశ్నలను ఎక్కడ? ఎలా? సర్దుబాటు చేస్తారో క్లారిటీ లేదు.
• సైన్స్‌ సబ్జెక్టులకు ప్రాక్టికల్స్‌ ఉండగా, లాంగ్వేజెస్‌, గణితం, హ్యుమానిటీస్‌ సబ్జెక్టులకు ఇంటర్నల్‌ అసెస్‌మెంట్‌లో భాగంగా 20 మార్కులకు యాక్టివిటీ బేస్డ్‌ లెర్నింగ్‌ (ఏబీఎల్‌) ఉంటుందని వెల్లడించారు. కానీ, యాక్టివిటీస్‌ ఏం చేయాలనేది స్పష్టత లేదు.