కంప్యూటర్‌ పరిజ్ఞానాన్ని మెరుగుపరుచుకుందాం!

ఐబీపీఎస్‌, ఎస్‌బీఐ, ఆర్‌బీఐ, నాబార్డ్‌ వంటి బ్యాంకు పరీక్షలకు ప్రిపేరయ్యేవారు కంప్యూటర్స్‌ విభాగం ఎలా సిద్ధం కావాలో తెలుసుకుందాం. ఈ విభాగం కేవలం మెయిన్స్‌లో మాత్రమే వస్తుంది. ఇది సాధారణంగా రీజనింగ్‌ విభాగంతో కలిసి 15-20 ప్రశ్నలకు ఈ సెక్షన్‌ వస్తుంది. ఈ విభాగం అభ్యర్థికి ఉన్న కంప్యూటర్స్‌ బేసిక్స్‌, కాన్సెప్ట్‌పై అవగాహన తెలుసుకోవడానికి ఉపయోగపడుతుంది. వివిధ బ్యాంకింగ్‌ పరీక్షలకు ప్రిపేరయ్యేవారు కంప్యూటర్‌ అవేర్‌నెస్‌ విభాగంపై పూర్తి అవగాహన ఉంటే ఈ సెక్షన్‌లో మంచి మార్కులు సాధించవచ్చు. ఈ నేపథ్యంలో కంప్యూటర్స్‌ నాలెడ్జ్‌ పేపర్‌కు ఎలా ప్రిపేర్‌ కావాలి, సిలబస్‌, పరీక్ష స్వరూపం, ఎలాంటి అంశాలు ముఖ్యమైనవి వంటి వాటి గురించి తెలుసుకుందాం.

ఈ విభాగం మార్కులు పెంచుకోవడానికి ఉపయోగపడుతుందని గ్రహించాలి. ఈ పేపర్‌లో ప్రాథమిక స్థాయి కంప్యూటర్‌ అవేర్‌నెస్‌తో పాటు స్టాండర్డ్‌ లెవల్‌లో కూడా ప్రిపేర్‌ కావాలి.
స్కోరింగ్‌ సబ్జెక్టుల్లో కంప్యూటర్స్‌ సెక్షన్‌ ఒకటి. మెయిన్స్‌లో అడిగే కంప్యూటర్స్‌ ప్రశ్నలు కొన్ని సులభంగా, కొన్ని కఠినంగా ఉంటాయి. దీనిలో కంప్యూటర్స్‌ ప్రాథమిక నిబంధనలు, సంక్షిప్తాలు, బ్యాంకింగ్‌లో కంప్యూటర్స్‌ ఫంక్షనాలిటీ అంశాలు పూర్తిస్థాయిలో అవగాహన పొందాలి. వీటిపై మెయిన్స్‌లో మెజారిటీ ప్రశ్నలు ఆధారపడి ఉంటాయి.

ముఖ్యమైన అంశాలు

1) కంప్యూటర్స్‌ హిస్టరీ, జనరేషన్స్‌ ఆఫ్‌ కంప్యూటర్స్‌
2) కంప్యూటర్‌ మెమరీ, మెమరీ పరికరాలపై గమనికలు
3) కంప్యూటర్‌ స్టోరేజ్‌ యూనిట్‌
4) నెట్‌వర్కింగ్‌, రకాలు-అంశాలు
5) ఆపరేటింగ్‌ సిస్టమ్స్‌, రకాలు, వాటి విధులు
6) కంప్యూటర్‌ సాఫ్ట్‌వేర్‌
7) హార్డ్‌వేర్‌-IO పరికరాలు
8) కంప్యూటర్స్‌ హ్యాకింగ్‌
9) వివిధ రకాల వైరస్‌లు
10) ఎంఎస్‌ ఆఫీస్‌, వర్డ్‌, ఎక్సెల్‌, పవర్‌పాయింట్‌ మొదలైనవి
11) డాటా బేస్‌ మేనేజ్‌మెంట్‌
12) ఇంటర్నెట్‌, ఇంటర్నెట్‌ ఆఫ్‌ థింగ్స్‌
13) ఆర్టిఫిషియల్‌ ఇంటెలిజెన్స్‌
14) సంక్షిప్తాలు

• ప్రాథమిక కంప్యూటర్‌ పరిజ్ఞానాన్ని మెరుగుపర్చుకోవడానికి పూర్వ ప్రశ్నపత్రాలను చదవాలి. కంప్యూటర్స్‌పై క్విజ్‌ వంటివి సాల్వ్‌ చేయడం వల్ల ఈ సెక్షన్‌పై పూర్తి స్థాయిలో అధ్యయనం చేసే వీలుంటుంది.
• పైన పేర్కొన్న సిలబస్‌పై నోట్స్‌ ప్రిపేర్‌ చేసుకోవాలి. సొంత స్టడీ నోట్స్‌ ప్రిపేర్‌ చేసుకోవడం వల్ల కంప్యూటర్లపై అధ్యయనం చేయడం, చదివేటప్పుడు పూర్తి ఏకాగ్రత కలుగుతుంది.
• ఐబీపీఎస్‌ ఇదివరకు నిర్వహించిన గ్రామీణ బ్యాంక్‌, స్టేట్‌ బ్యాంక్‌ ప్రశ్నపత్రాలను గమనించాలి. ఇది ప్రశ్నల సరళి, టాపిక్‌లపై క్లిష్టత స్థాయిని అంచనా వేయడానికి ఉపయోగపడుతుంది.
• మోడల్‌ పేపర్లు, మాక్‌ టెస్టులు సాల్వ్‌ చేయడం వల్ల ప్రిపరేషన్‌ లెవల్స్‌ను విశ్లేషించవచ్చు. దీనివల్ల రాయబోయే పరీక్షలకు ముందు తప్పులను సరిదిద్దుకోవచ్చు.
• ప్రిపరేషన్‌ టిప్స్‌
• ముందుగా బ్యాంక్‌ పరీక్షల స్వరూపం, సిలబస్‌పై పట్టు సాధించాలి. వీటిలో ప్రిలిమ్స్‌, మెయిన్స్‌లో వచ్చే అంశాలను విభజించాలి. కంపూటర్స్‌ ఆప్టిట్యూడ్‌-ప్రాథమిక, సంక్లిష్టంగా కంప్యూటర్ల వాడకం, కొత్త తరహా కంప్యూటర్‌ డివైజెస్‌ వంటి అంశాలను తెలుసుకోవాలి.
• ఈ విభాగాన్ని స్కోరింగ్‌ సెక్షన్‌గా పరిగణిస్తుంటారు. ఈ టాపిక్స్‌ను సీరియస్‌గా సన్నద్ధం కావాలి.
• సిలబస్‌ ఆధారంగా ఏ ఒక్క అంశాన్ని తేలికగా తీసుకోకూడదు. దీనిలో ఏ చిన్న అంశాన్ని కూడా విస్మరించకూడదు.
• సొంతంగా నోట్స్‌ ప్రిపేర్‌ చేసుకోవడం వల్ల ప్రాథమిక భావనలు, కంప్యూటర్ల పరికరాలు, భాషలు వంటి వాటిపై స్పష్టత ఏర్పడుతుంది.
• మెయిన్స్‌లో ఈ విభాగం రీజనింగ్‌తో ముడిపడి ఉండటం వల్ల సమయ పాలనను గ్రహించి, సెక్షనల్‌ కటాఫ్‌పై దృష్టిపెట్టాలి.
• మాక్‌టెస్ట్‌ సిరీస్‌లు, ప్రాక్టీస్‌ పేపర్లు, క్విజ్‌లు నిత్యం సాల్వ్‌ చేస్తుండటం వల్ల మంచి ఫలితం ఉంటుంది.
• మార్కెట్‌లో అందుబాటులో ఉండే పుస్తకాలతో పాటు ప్రీవియస్‌ పేపర్లను చదవడం వల్ల కంప్యూటర్‌ ఆప్టిట్యూడ్‌పై అవగాహన ఏర్పడుతుంది.
• షార్ట్‌కట్‌ కీ లు, కొత్త వైరస్‌లు, ప్రోగ్రామ్‌లు, ఆర్టిఫియల్‌ ఇంటెలిజెన్స్‌, బ్లాక్‌ చెయిన్‌ మేనేజ్‌మెంట్‌, రోబోటిక్‌ టెక్నాలజీ, స్పేస్‌ రిసెర్చ్‌, ఈ-బ్యాంకింగ్‌ యూపీఐ, బ్యాంకింగ్‌ యాప్‌లు, వెబ్‌పోర్టర్లు, యూజర్‌ ఫ్రెండ్లీ సర్వీస్‌లు వంటి అంశాలపై పూర్తి అవగాహన పెంచుకోవాలి. నోట్స్‌ ప్రిపేర్‌ చేసుకోవాలి.
• ఎంఎస్‌ ఆఫీస్‌, ఇంటర్నెట్‌ కార్యకలాపాలపై ఎక్కువ ప్రాధాన్యం ఇవ్వాలి. దీనిలో కాన్సెప్ట్‌ ఆధారిత, విధులు, లక్షణాలు బాగా అధ్యయనం చేయాలి.
• రివిజన్‌ ఆచరణాత్మకంగా చేయడం వల్ల స్కోరింగ్‌ పెంచుకోవడానికి వీలు కలుగుతుంది.
• విభిన్న సంక్లిష్ట పదాలు, కంప్యూటర్‌ టెర్మినాలజీ మొదలైన అంశాలను బాగా చదవాలి.
• బ్యాంకింగ్‌ కెరీర్‌లో దీర్ఘకాలంలో అవసరమైన కంప్యూటర్‌ ఆప్టిట్యూడ్‌లో చాలా విధులపై నైపుణ్యాన్ని పెంపొందించుకోవాలి. కంప్యూటర్‌ అప్లికేషన్లకు సంబంధించి ప్రాథమిక పరిజ్ఞానాన్ని సంపాదించాలి. మెయిన్స్‌లో మాత్రమే కనిపించే అంశం కాబట్టి మెయిన్స్‌కు నెలముందు ఈ విభాగాన్ని చదవడం పూర్తిచేయాలి.
• ఐబీపీఎస్‌ పీవో, క్లర్క్‌ పరీక్షలు మొదలయ్యాయి. ప్రిలిమినరీ డిసెంబర్‌ చివరి వరకు కొనసాగుతుంది. కాబట్టి ఈ సమయంలో మాక్‌ టెస్టులు రాయాలి. జనవరి, ఫిబ్రవరిల్లో మెయిన్స్‌ నిర్వహించవచ్చు. ప్రిలిమ్స్‌లో సెలెక్ట్‌ అయితే వెంటనే సులభమైన కంప్యూటర్‌ ఆప్టిట్యూడ్‌తో మొదలుపెట్టాలి. ఈ విభాగాన్ని పూర్తి చేసుకున్న తర్వాత బ్యాంకింగ్‌ అవేర్‌నెస్‌, కరెంట్‌ అఫైర్స్‌ అంశాలపై ఫోకస్‌ చేయాలి.
• కష్టమైన అర్థమెటిక్‌, రీజనింగ్‌, ఇంగ్లిష్‌ విభాగాలపై దృష్టిసారించి ప్రిపరేషన్‌ ప్రారంభిస్తే తర్వాత రివిజన్‌పై పూర్తి దృష్టిపెట్టవచ్చు. కాబట్టి తేలిక సబ్జెక్టు అయిన కంప్యూటర్స్‌ను ముందుగా పూర్తిచేయాలి.

రిఫరెన్స్‌ బుక్స్‌
కిరణ్‌ ప్రకాశన్‌- ఆబ్జెక్టివ్‌ కంప్యూటర్‌ నాలెడ్జ్‌
అరిహంత్‌ పబ్లికేషన్‌- కంప్యూటర్స్‌ అవేర్‌నెస్‌
దిశ పబ్లికేషన్‌- కంప్యూటర్‌ నాలెడ్జ్‌
సౌమ్యరంజన్‌ బెహ్రా- ఆబ్జెక్టివ్‌ విత్‌ సబ్జెక్టివ్‌ ఇన్‌ కంప్యూటర్స్‌

ఎస్‌. మధుకిరణ్‌
డైరెక్టర్‌, ఫోకస్‌ అకాడమీ
హైదరాబాద్‌
9030496929