వాషింగ్టన్: టీకాలు తీసుకున్నవాళ్లంతా ఇక మాస్కులు తీసిపారేయొచ్చని అమెరికాలో తెగ ప్రచారం జరిగింది. ఇదంతా విని బయటి ప్రపంచం వారు కూడా కొంచెం ఈర్ష్య పడ్డారు కూడా. అయితే ఇది అంత సులభమైన విషయం కాదని అమెరికన్లకు ఇప్పుడిప్పుడే బోధపడుతున్నది. అమెరికా సెంటర్ ఫర్ డిసీజ్ కంట్రోల్ (సీడీసీ) తాజా మార్గదర్శకాలు ఈ చేత్తో ఇచ్చి ఆచేత్తో తీసుకున్నట్టుగానే ఉన్నాయి. పూర్తి స్తాయిలో టీకా తీసుకున్నవారు ఇళ్ల లోపల, వెలుపల మాస్కులు పెట్టుకోవాల్సిన అవసరం లేదు అని చెప్తూనే ఎక్కడెక్కడ మాస్కులు ధరించాలో చాంతాడంత లిస్టు ఇచ్చింది. కేంద్ర, రాష్ట్ర, స్థానిక, గిరిజన చట్టాలు, నిబంధనలు, నియంత్రణలు, అలాగే స్థానిక వ్యాపార సంస్థలు, పని ప్రదేశాల నియమాల మేరకు మాస్కులు ధరించాలని సూచించింది. సీడీసీ డైరెక్టర్ డాక్టర్ రోషెల్లీ వాలెన్స్కీ అంతకుముందు సెనేట్ కమిటీ ముందు హాజరైనప్పుడు ఇలాంటి మడతపేచీలు లేకుండా సూటిగా మాస్కు ధరించాల్సిందేనని తేల్చిచెప్పారు. కొన్ని రాష్ట్రాలు ఇప్పటికైతే మాస్కు కొనసాగించాల్సిందేనని నిర్ణయించాయి. మరికొన్ని రాష్ట్రాలు సమాలోచనలు జరుపుతున్నాయి. అయితే అమెరికాలో మాస్కు విషయంలో ఒకడుగు ముందుకు రెండడుగులు వెనుకకు అన్నట్టుగా తయారు కావడానికి బలమైన కారణాలు లేకపోలేదు. అమెరికా జనాభాలో 37 శాతం జనాభాకు మాత్రమే టీకాలు పడ్డాయి. వయోజనుల్లో 40 శాతం మందికి ఇంకా కనీసం ఒక్క డోసు కూడా పడలేదు. మరి వీరంతా మాస్కును పాటించాలి అనే నిబంధనను ఎలా అమలు చేయగలం అని వాలెన్స్కీని ఓ టీవీ కార్యక్రమంలో అడిగితే వారు తమ పట్ల తాము నిజాయితీగా ఉండాలని ఆమె చెప్పడం విశేషం.