ప్రవళిక పేరుతో చట్టం తేవాల్సిందే!

తెలంగాణలోని ఆర్టీసీ కార్మికులు తమ కు రక్షణ కల్పించాలని డిమాండ్‌ చేస్తున్నారు. బస్సులో ప్రయాణికుల నుంచి.. దారివెంట వెళ్తున్న వాహనదారులు, ఇతర వాహనాల డ్రైవర్ల నుంచి కాపాడాలని కోరుతున్నారు.

• ప్రభుత్వాన్ని డిమాండ్‌ చేస్తున్న ఆర్టీసీ కార్మికులు

హైదరాబాద్‌, నవంబర్‌ 9 (నమస్తే తెలంగాణ): తెలంగాణలోని ఆర్టీసీ కార్మికులు తమ కు రక్షణ కల్పించాలని డిమాండ్‌ చేస్తున్నారు. బస్సులో ప్రయాణికుల నుంచి.. దారివెంట వెళ్తున్న వాహనదారులు, ఇతర వాహనాల డ్రైవర్ల నుంచి కాపాడాలని కోరుతున్నారు. ఇందుకోసం ప్రత్యేకంగా ‘ప్రవళిక’ పేరుతో చట్టాన్ని తేవాలని డిమాండ్‌ చేస్తున్నారు. విధి నిర్వహణలో ఉన్న ఆర్టీసీ సిబ్బందిపై భౌతిక దాడులు చేస్తే బాధ్యులపై కఠిన చర్యలు తీసుకునేలా చట్టంలో నిబంధనలు చేర్చాలని కోరుతున్నారు.

మణుగూరు డిపోకు చెందిన కండక్టర్‌ ప్రవళిక మృతి తర్వాత ఈ విషయంపై అన్ని డిపోల కార్మికుల నుంచి వినతిపత్రాలు వెల్లువెత్తుతున్నాయి. కార్మికుల డిమాండ్‌ పట్ల సంఘాల నేతలు కూడా కలిసివస్తున్నారు. తెలంగాణలో ఉచిత బస్సు ప్రయాణం ఇచ్చిన నాటి నుంచే ఆర్టీసీ సిబ్బందిపై దాడులు సర్వసాధారణం అయ్యాయని ఆర్టీసీ సిబ్బంది చెప్తున్నారు. ప్రవళిక మరణం విషయంలో.. నిందితురాలైన ఆ తల్లి ఉచిత టికెట్‌ తీసుకున్నా.. కొడుకు టికెట్‌ విషయంలో గొడవ పెరిగిందని అంటున్నారు.

అదే ఉచిత బస్సు టికెట్‌ లేకపోతే.. ఇద్దరూ టికెట్‌ తీసుకునేవారని, ప్రవళిక ప్రాణాలు పోయేవికాదని అంటున్నారు. ప్రభుత్వం అమలు చేస్తున్న ఉచిత బస్సు ప్ర యాణంపై తమకు ఎలాంటి అభ్యంతరాలు లేకపోయినా.. ఆ పథకం అమలు చేస్తున్న నాటి నుంచే కండక్టర్ల సస్పెన్షన్లు, డ్రైవర్లు, కండక్టర్లపై దాడులు విపరీతంగా పెరిగాయని చెప్తున్నారు. దాడులు జరిగితే ఫిర్యాదుకు టోల్‌ఫ్రీ నంబర్‌ పెట్టాలని అడుగుతున్నా పట్టించుకోవడం లేదని, కార్మికుల జీవితాలకు రక్షణ ఏదని ప్రశ్నిస్తున్నారు. భవిష్యత్తులో ఇలాంటి ఘటనలు జరుగకుండా ఏం జాగ్రత్తలు తీసుకొంటారో చెప్పాలని డిమాండ్‌ చేస్తున్నారు.