హైదరాబాద్‌లో స్ప్లాష్‌బీఐ జీసీసీ

అమెరికాకు చెందిన ఎంటర్‌ప్రైజ్‌ డాటా ఇంటిలిజెన్స్‌, బిజినెస్‌ అనలిటిక్స్‌, ఆర్టిఫిషియల్‌ ఇంటిలిజెన్స్‌ రంగాల్లో సేవలందిస్తున్న స్ప్లాష్‌బీఐ హైదరాబాద్‌లో తన గ్లోబల్‌ కేపబిలిటీ సెంటర్‌ (జీసీసీ)ను ఏర్పాటు చేసింది. గచ్చిబౌలి ఫైనాన్షియల్‌ డిస్ట్రిక్ట్‌లో 20 వేల చదరపు అడుగుల విస్తీర్ణంలో అభివృద్ధి చేసిన ఈ కార్యాలయాన్ని సోమవారం రాష్ట్ర ఐటీ, పరిశ్రమల శాఖల మంత్రి దుద్దిళ్ల శ్రీధర్‌ బాబు ప్రారంభించారు.

• ప్రారంభించిన ఐటీ శాఖ మంత్రి శ్రీధర్‌ బాబు

హైదరాబాద్‌, నవంబర్‌ 9 (నమస్తే తెలంగాణ) : అమెరికాకు చెందిన ఎంటర్‌ప్రైజ్‌ డాటా ఇంటిలిజెన్స్‌, బిజినెస్‌ అనలిటిక్స్‌, ఆర్టిఫిషియల్‌ ఇంటిలిజెన్స్‌ రంగాల్లో సేవలందిస్తున్న స్ప్లాష్‌బీఐ హైదరాబాద్‌లో తన గ్లోబల్‌ కేపబిలిటీ సెంటర్‌ (జీసీసీ)ను ఏర్పాటు చేసింది. గచ్చిబౌలి ఫైనాన్షియల్‌ డిస్ట్రిక్ట్‌లో 20 వేల చదరపు అడుగుల విస్తీర్ణంలో అభివృద్ధి చేసిన ఈ కార్యాలయాన్ని సోమవారం రాష్ట్ర ఐటీ, పరిశ్రమల శాఖల మంత్రి దుద్దిళ్ల శ్రీధర్‌ బాబు ప్రారంభించారు. అనంతరం ఆయన మాట్లాడుతూ.. ప్రస్తుతం నగరంలో 515కు పైగా జీసీసీలు ఉండగా, వాటిలో మూడు లక్షల మందికి పైగా టెక్నాలజీ నిపుణులు పనిచేస్తున్నట్టు పేర్కొన్నారు. గతేడాది దేశంలోనే అత్యధికంగా 70కి పైగా కొత్త జీసీసీలు హైదరాబాద్‌లో తమ కార్యకలాపాలు ప్రారంభించాయని, వచ్చే ఏడాదిలో కొత్తగా 100 జీసీసీలను ప్రారంభించాలని లక్ష్యంగా పెట్టుకున్నామని ఈ సందర్భంగా వివరించారు.

జీసీసీలను సంప్రదాయ సేవలకే పరిమితం చేయకుండా.. ప్రపంచ స్థాయి ఉత్పత్తుల రూపకల్పన, పరిశోధన, సాంకేతిక ఆవిషరణలకు కేంద్రాలుగా తీర్చిదిద్దేందుకు ప్రణాళికాబద్ధంగా కృషి చేస్తున్నామన్నారు. ఏఐ, డాటా అనలిటిక్స్‌, సైబర్‌ సెక్యూరిటీ, ప్రొడక్ట్‌ ఇంజినీరింగ్‌ తదితర రంగాల్లోనూ కీలక పాత్ర పోషించేలా వాటిని ప్రత్యేకంగా ప్రోత్సహిస్తున్నామని తెలిపారు. ఈ సందర్భంగా కంపెనీ సీఈవో నవీన్‌ మిగ్లానీ మాట్లాడుతూ..భారత్‌లో టెక్నాలజీ సేవలు అందించడానికి వచ్చే ఐదు నుంచి ఏడేండ్లకాలంలో 100 మిలియన్‌ డాలర్ల మేర పెట్టుబడులు పెట్టబోతున్నట్టు ప్రకటించారు. హైదరాబాద్‌ కేంద్రంగా డాటా ఇంటిలిజెన్స్‌ ప్లాట్‌ఫామ్‌తోపాటు కంపెనీ ఏఐ సామర్థ్యాలను మరింత అభివృద్ధి చేస్తున్నట్టు తెలిపారు. ప్రస్తుతం సంస్థ ప్రపంచవ్యాప్తంగా 39 దేశాల్లో 500కు పైగా ఎంటర్‌ప్రైజ్‌ సంస్థలకు సేవలను అందిస్తున్నది.