Inter Exams | ఇంటర్‌ ఎగ్జామ్స్‌ 80 మార్కులకే..! మరో 20 మార్కులకు ఇంటర్నల్స్‌..!

Inter Exams | ఇంటర్‌ వార్షిక పరీక్షలను 80 మార్కులకే నిర్వహించనున్నారు. మరో 20 మార్కులకు ఇంటర్నల్స్‌/ప్రాజెక్ట్‌ వర్క్స్‌ చేపట్టనున్నారు. ఈ దిశగా ఇంటర్‌బోర్డు నిపుణుల కమిటీ కసరత్తు చేస్తున్నది.

• 20 మార్కులకు ఇంటర్నల్స్‌.. నిపుణుల కమిటీ సూచనలు
• అంతా ఒకే అంటే వచ్చే విద్యాసంవత్సరం నుంచి అమల్లోకి

Inter Exams | హైదరాబాద్‌, మార్చి 8 (నమస్తే తెలంగాణ) : ఇంటర్‌ వార్షిక పరీక్షలను 80 మార్కులకే నిర్వహించనున్నారు. మరో 20 మార్కులకు ఇంటర్నల్స్‌/ప్రాజెక్ట్‌ వర్క్స్‌ చేపట్టనున్నారు. ఈ దిశగా ఇంటర్‌బోర్డు నిపుణుల కమిటీ కసరత్తు చేస్తున్నది. సిలబస్‌, పరీక్షావిధానంలో మార్పులపై చర్చలు నడుస్తున్నాయి. ఇంటర్‌బోర్డు పచ్చజెండా ఊపితే వచ్చే విద్యాసంవత్సరం నుంచి 80 మార్కులకే వార్షిక పరీక్షలను నిర్వహించి, మరో 20 మార్కులకు ఇంటర్నల్స్‌ నిర్వహిస్తారు.

తొలిసారిగా ఇంటర్నల్స్‌కు మార్కులు..

ఇప్పటి వరకు ఫస్టియర్‌ విద్యార్థులకు ఎన్విరాన్‌మెంటల్‌ ఎడ్యుకేషన్‌ పరీక్షను ఇంటర్నల్స్‌గా నిర్వహిస్తున్నారు. ఇది క్వాలిఫైయింగ్‌ పేపర్‌ మాత్రమే. ఈ పరీక్షల్లో వచ్చిన మార్కులను రెగ్యులర్‌ మార్కులకు కలపడం లేదు. గతంలో ఎథిక్స్‌ అండ్‌ హ్యూమన్‌ వ్యాల్యూస్‌ ఎగ్జామ్‌ను సైతం ఇంటర్నల్‌ పరీక్ష రూపంలో నిర్వహించేవారు. ఇంగ్లిష్‌ ప్రాక్టికల్స్‌ను నిర్వహించడంతో ఈ పరీక్షను రద్దుచేసి ప్రస్తుతం బ్యాక్‌లాగ్‌ విద్యార్థులకు మాత్రమే నిర్వహిస్తున్నారు. తాజాగా ప్రతిపాదిత ఇంటర్నల్స్‌లో 20 మార్కులుంటాయి. ఈ మార్కులను రెగ్యులర్‌ మార్కులకు కలుపుతారు. అసైన్‌మెంట్లు/ప్రాజెక్ట్‌లు విద్యార్థులే సొంతం గా రాయాలి. ఇంటర్నెట్‌, వికీపీడియా నుంచి కాపీకొట్టడానికి వీల్లేదు. చాట్‌ జీపీటీ, ఏఐ టూల్స్‌ సహాయం తీసుకోకుండా విద్యార్థులు సొంతంగా అధ్యయనం చేసి ప్రాజెక్ట్‌ వర్క్‌ చేయాల్సి ఉంటుందని ఓ అధికారి తెలిపారు.

ప్రాజెక్ట్‌ వర్క్స్‌ ఇలా..

• అర్థశాస్త్రం విద్యార్థులు బడ్జెట్‌ పాఠంపై ప్రాజెక్ట్‌ వర్క్‌ చేయాల్సి ఉంటుంది. వీరు కుటుంబ బడ్జెట్‌, లేదా వ్యక్తిగత బడ్జెట్‌పై ప్రాజెక్ట్‌వర్క్‌ చేయాలి. ఉదాహరణకు హాస్టల్లో ఉండే విద్యార్థి తన వ్యక్తిగత ఖర్చులకు తల్లిదండ్రులు ఎంతిస్తున్నారు. వేటి వేటికి ఖర్చవుతున్నాయి. మిగులు ఎంత అన్న వివరాలను ప్రాజెక్ట్‌ రూపంలో రాయాల్సి ఉంటుంది.
• చరిత్ర సబ్టెక్టు విద్యార్థులు తమ ప్రాంతం లేదా సమీప ప్రాంతంలోని చరిత్ర గురించి ప్రాజెక్ట్‌వర్క్‌ చేయాల్సి ఉంటుంది. ఉదాహరణకు కరీంనగర్‌ జిల్లావాసులు శాతవాహనులు, వరంగల్‌ జిల్లావాసులు కాకతీయులు, హైదరాబాద్‌ విద్యార్థులు గోల్కొడ చరిత్ర గురించి ప్రాజెక్ట్‌ వర్క్‌ చేయాలి.
• పొలిటికల్‌ సైన్స్‌లో ‘శాసనసభ నిర్మాణం అధికారాలు-విధులు’ పాఠానికి సంబంధించి అసెంబ్లీ నిర్మాణం, తమ నియోజకవర్గ ఎమ్మెల్యేపై ప్రాజెక్ట్‌ వర్క్‌ చేయాలి.