‘అలసంద’పై అనుమానాలొద్దు!

అలసందలు సాగు చేస్తే అధిక లాభాలు ఉంటాయని మా బంధువులు అంటున్నరు. వాటి గురించి సరైన అవగాహన లేదు. అలసందల్లో ఎలాంటి రకాలు ఉంటాయి. వాటి పంటకాలం, దిగుబడి గురించి చెప్పండి. – కుమార్‌, కామారెడ్డి.

అలసందలకు అన్ని రకాల నేలల్లో పండే గుణం ఉంటుంది. అయితే, తేమను పట్టి ఉంచుతూ, మురుగు నీరు నిలువని మధ్యస్థ నేలలు మరింత అనుకూలంగా ఉంటాయి. చెల్క నేలలు, ఎర్ర భూములు, నల్లరేగడి భూముల్లోనూ విరగ కాస్తాయి. వేసవిలో దిగుబడి పొందాలనుకొంటే, ఫిబ్రవరిలో విత్తుకోవచ్చు. ప్రస్తుతం అనేక రకాల హైబ్రిడ్‌ విత్తనాలు అందుబాటులో ఉన్నాయి. పంటకాలంతోపాటు దిగుబడిని, తెగుళ్లను తట్టుకొనేవాటిని ఎంచుకోవడం మంచిది.

• జీసీ-3 : ఇది స్వల్పకాలిక రకం. పంటకాలం 90-95 రోజులు. ఎకరానికి 4-5 క్వింటాళ్ల దిగుబడిని ఇస్తుంది. పల్లాకు తెగులును సమర్థంగా తట్టుకొంటుంది.
• వీ-240 : ఈ రకం గింజలు ముదురు ఎరుపు రంగులో ఉంటాయి. 90-100 రోజుల్లో పంట చేతికి వస్తుంది. ఎకరానికి 5-6 క్వింటాళ్ల దిగుబడిని సాధింవచ్చు. అన్ని రకాల తెగుళ్లనూ తట్టుకొంటుంది. పశుగ్రాసానికి అనుకూలంగానూ ఉంటుంది.
• సీ-152 : పండ్లతోటల్లో అంతర పంటగా వేయడానికి ఈ రకం అనుకూలం. పంటకాలం 105-110 రోజులు. ఎకరానికి 3-4 క్వింటాళ్ల దిగుబడి ఇస్తుంది. గింజలు తెలుపు రంగులో ఉంటాయి.
• కో-4 : ఇది నల్ల గింజలను అందించే రకం. 90-100 రోజులు పంటకాలం. ఎకరానికి 3-4 క్వింటాళ్ల దిగుబడిని సాధించవచ్చు. విత్తనాలతోపాటు పశుగ్రాసానికీ అనుకూలమైనది.