వేడి.. వెరీ డేంజర్‌

చలికాలంలో వేడినీటితో స్నానం చేయడం సహజం! అయితే.. వేడి ఎక్కువైతే మాత్రం చాలా ప్రమాదం! చలినుంచి ఉపశమనం ఏమోగానీ.. చర్మానికి ఎంతో హానికరం! వేడినీటి స్నానానికి ఉపయోగించే నీళ్ల ఉష్ణోగ్రత.. 36 డిగ్రీల నుంచి 40 డిగ్రీల సెంటీగ్రేడ్‌ మధ్యలో ఉండాలని వైద్య నిపుణులు చెబుతున్నారు.

చలికాలంలో వేడినీటితో స్నానం చేయడం సహజం! అయితే.. వేడి ఎక్కువైతే మాత్రం చాలా ప్రమాదం! చలినుంచి ఉపశమనం ఏమోగానీ.. చర్మానికి ఎంతో హానికరం! వేడినీటి స్నానానికి ఉపయోగించే నీళ్ల ఉష్ణోగ్రత.. 36 డిగ్రీల నుంచి 40 డిగ్రీల సెంటీగ్రేడ్‌ మధ్యలో ఉండాలని వైద్య నిపుణులు చెబుతున్నారు. అంతకుమించితే.. చర్మానికి హానికరమని హెచ్చరిస్తున్నారు.

• చలికాలంలో సాధారణంగానే చర్మం పొడిబారుతుంది. ఇక వేడినీటితో స్నానం చేయడం వల్ల.. చర్మం తేమను పూర్తిగా కోల్పోతుంది. డీహైడ్రేటెడ్‌గా మారిపోయి.. సమస్య మరింత తీవ్రమవుతుంది.
• వేడినీటి స్నానం.. శరీరంలో సెబమ్‌ ఉత్పత్తికి ఆటంకం కలిగిస్తుంది. ఫలితంగా.. చర్మంలోని సహజమైన నూనెలు తగ్గిపోయి, ఇన్‌ఫెక్షన్లు పెరుగుతాయి. దురద, చర్మంపై మంట, పగుళ్లు వచ్చే అవకాశాలు ఉంటాయి.
• నీటి ఉష్ణోగ్రత ఎక్కువగా ఉంటే.. జుట్టుకు కూడా చేటే! వేడి వల్ల జుట్టులో కెరోటిన్‌, లిపిడ్‌ దెబ్బతింటుంది. దాంతో.. వెంట్రుకలు బలహీన పడటం, జుట్టురాలడం ఎక్కువవుతుంది.
• వేడినీటితో స్నానం చేయడం వల్ల శరీర ఉష్ణోగ్రత ఒక్కసారిగా పెరుగుతుంది. ఫలితంగా, రక్తపోటు వచ్చే ప్రమాదం ఉంటుంది. ముఖ్యంగా అప్పటికే బీపీ, గుండె సంబంధిత సమస్యలు ఉంటే.. పరిస్థితి మరింత ప్రమాదకరంగా తయారవుతుంది.
• నీళ్లు మరీ వేడిగా ఉంటే.. శరీరం త్వరగా అలసిపోతుంది. మొద్దుబారినట్లుగా అనిపిస్తుంది. ఇంకొందరిలో తల తిరగడం కూడా కనిపిస్తుంది.
• ఎక్కువ వేడిగా ఉండే నీటితో స్నానం చేయడం వల్ల తలనొప్పి, డీహైడ్రేషన్‌, వికారం లాంటి సమస్యలు ఉత్పన్నమయ్యే ప్రమాదం ఉంది.