మరింత విద్యుదుత్పత్తిపై సింగరేణి దృష్టి

ప్రస్తుతమున్న థర్మల్‌, సౌర విద్యుత్తు ప్లాంట్లకు అదనంగా 1,050 మెగావాట్ల సామర్థ్యంతో మరిన్ని ప్లాంట్లను ఏర్పాటుచేసి మొత్తం 3,350 మెగావాట్ల విద్యుదుత్పత్తి సామర్థ్యాన్ని అందుకునేలా భారీ ప్రణాళికకు సింగరేణి శ్రీకారం చుట్టింది.

• 3,350 మెగావాట్ల థర్మల్‌, సోలార్‌ పవర్‌ దిశగా అడుగులు
• కొత్త ప్లాంట్ల నిర్మాణంపై సమీక్షా సమావేశం
• నెల రోజుల్లో ప్రతిపాదనలు సిద్ధం చేయాలని అధికారులకు సీఎండీ శ్రీధర్‌ ఆదేశం

హైదరాబాద్‌, ఏప్రిల్‌ 5 (నమస్తే తెలంగాణ): ప్రస్తుతమున్న థర్మల్‌, సౌర విద్యుత్తు ప్లాంట్లకు అదనంగా 1,050 మెగావాట్ల సామర్థ్యంతో మరిన్ని ప్లాంట్లను ఏర్పాటుచేసి మొత్తం 3,350 మెగావాట్ల విద్యుదుత్పత్తి సామర్థ్యాన్ని అందుకునేలా భారీ ప్రణాళికకు సింగరేణి శ్రీకారం చుట్టింది. బుధవారం ఇక్కడ సింగరేణి భవన్‌లో నిర్వహించిన సమీక్షా సమావేశంలో దీనిపై థర్మల్‌, సౌర విద్యుత్తు విభాగాల ఉన్నతాధికారులతో సంస్థ సీఎండీ ఎన్‌ శ్రీధర్‌ చర్చించారు. నెల రోజుల్లో కొత్త ప్లాంట్లకు సంబంధించిన ప్రణాళికల్ని రూపొందించి సమర్పించాలని అధికారులను ఆయన ఆదేశించారు.

2,800 మెగావాట్లకు..

మంచిర్యాల జిల్లా జైపూర్‌ వద్దనున్న సింగరేణి థర్మల్‌ పవర్‌ ప్లాంట్‌ (ఎస్టీపీపీ)లో ప్రస్తుతం 1,200 మెగావాట్ల విద్యుదుత్పత్తి జరుగుతోంది. అయితే దీన్ని 2,800 మెగావాట్లకు పెంచాలని సింగరేణి చూస్తున్నది. ఇప్పటికే ఈ ప్రాజెక్టు ప్రాంగణంలో 800 మెగావాట్ల సామర్థ్యంతో ఓ ప్లాంట్‌ నిర్మాణానికి సింగరేణి బోర్డు ఆమోదం తెలిపింది. ఇక్కడే మరో 800 మెగావాట్ల సూపర్‌ క్రిటికల్‌ పవర్‌ ప్లాంట్‌ ఏర్పాటుకు అవకాశాలనూ పరిశీలిస్తున్నది. కాగా, ప్లాంట్‌ ఏర్పాటుకు కావాల్సిన 120 ఎకరాల స్థలంతోపాటు నీరు, రైలు మార్గం వంటి అన్ని వసతులున్నాయని ఈ సందర్భంగా అధికారులు సీఎండీ శ్రీధర్‌కు వివరించారు. దీంతో దీనిపై డీపీఆర్‌ తయారుచేసి ప్రతిపాదనలు సిద్ధం చేయాలని ఆయన వారిని ఆదేశించారు. ఈ సమీక్షా సమావేశంలో డైరెక్టర్‌ సత్యనారాయణరావు, చీఫ్‌ టెక్నికల్‌ కన్సల్టెంట్‌ సంజయ్‌కుమార్‌ సూర్‌, ఓఅండ్‌ఎం చీఫ్‌ జెఎన్‌ సింగ్‌, జీఎంలు డీవీఎస్‌ఎన్‌ రాజు, వై రాజశేఖర్‌రెడ్డి, ఎన్‌వీకేవీ రాజు, రమేష్‌బాబు తదితరులు పాల్గొన్నారు.

• సింగరేణి థర్మల్‌ పవర్‌ ప్లాంట్‌లో విద్యుదుత్పత్తి ద్వారా ఏటా సుమారు రూ.500 కోట్ల ఆదాయం
• రెండు కొత్త ప్లాంట్లు అందుబాటులోకి వస్తే ఈ ఆదాయం వెయ్యి కోట్ల రూపాయలను దాటనున్నది
• మరో 250 మెగావాట్ల సౌర విద్యుత్తు ప్లాంట్లపై సింగరేణి దృష్టి
• ఇందుకు సంబంధించి సమగ్ర నివేదికలను నెల రోజుల్లో ఇవ్వాలని సంబంధిత అధికారులకు సీఎండీ శ్రీధర్‌ ఆదేశం. ఇప్పటికే రాష్ట్ర ఇంధన శాఖకు చేరిన ప్రతిపాదనలు
• ప్రస్తుతం 224 మెగావాట్ల సౌర విద్యుదుత్పత్తి చేస్తున్న సింగరేణి. మరో రెండు నెలల్లో అందుబాటులోకి 76 మెగావాట్లు
• అంతా కుదిరితే ఇటు థర్మల్‌, అటు సౌర విద్యుత్తు ప్లాంట్ల ద్వారా మొత్తం 3,350 మెగావాట్లకు చేరనున్న సింగరేణి విద్యుదుత్పత్తి సామర్థ్యం