పాజిటివ్ దృక్పథం
మొదట తీసుకున్న రుణ బకాయిలను తీర్చడానికి ఏదో ఒక మార్గం ఉందన్న పాజిటివ్ కోణంలో ఆలోచించండి. ఇది అందరికీ తప్పనిసరి. తీసుకున్న రుణాన్ని చెల్లించడం చట్టపరంగా, నైతికంగా మీదే బాధ్యత. రుణం చెల్లింపులో జాప్యం, డిఫాల్ట్లు, సెటిల్మెంట్లు మీ క్రెడిట్ స్కోర్ను దెబ్బతీస్తాయి. దీంతో కొత్త రుణానికి దరఖాస్తు కూడా చేయలేరు. రుణాలిచ్చే సంస్థలు మీ దరఖాస్తును తిరస్కరిస్తాయి లేదా అత్యధిక వడ్డీకీ అప్పులిస్తాయి.
ఒత్తిడి వీడాలి
అప్పు అనేక కారణాలతో చేయాల్సి రావచ్చు. ఆదాయం లేకపోవడం, అనారోగ్య సమస్యలు ఇలా ఎన్నో ఉంటాయి. అయితే అనవసరపు కొనుగోళ్లు, షాపింగ్ ఓ అలవాటుగా మారవద్దు. ఇవి స్ట్రెస్, యాైంగ్జెటీ, డిప్రెషన్ లాంటి మానసిక రుగ్మతలకు దారితీస్తాయి. షాపింగ్ చేయకపోతే ఏదో కోల్పోయినట్టుగా ఫీల్ అయినట్టు చాలామంది డిప్రెషన్కు గురవుతుంటారు. ఇది సరికాదు. అప్పుల ఊబిలో నుంచి బయట పడేందుకు సరైన ప్రణాళిక కోసం పర్సనల్ ఫైనాన్స్ అడ్వయిజర్ను సంప్రదించవచ్చు. ఆర్థిక ఇబ్బందుల కారణంగా తలెత్తిన మానసిక సమస్యల కోసం సైకలాజికల్ థెరపి కోసం ప్రయత్నించండి.
చెల్లింపుల్లో ప్రాధాన్యత
రుణాలన్నింటినీ తీర్చేయాలని నిర్ణయించుకున్న తర్వాత ఏయే రుణాల్లో ఎంతెంత బకాయి ఉందో జాబితా తయారుచేసుకోవాలి. కొన్ని రుణాలు మిగతా వాటికన్నా భిన్నమైనవి. వాటిని వెంటనే తిరిగి చెల్లించేయాలి. ఉదాహరణకు అత్యధిక వడ్డీని వసూలు చేసే క్రెడిట్ కార్డు రుణాన్ని మొట్టమొదట తీర్చేయాలి. క్రెడిట్ కార్డుల మీద ఏటా 45 శాతానికిపైగా వడ్డీని చెల్లించాల్సి ఉంటుంది. ఓ నెల చెల్లించకపోతే పెనాల్టీలు, చక్రవడ్డీలు మన నడ్డి విరుస్తాయి. పెద్ద మొత్తంలో తీసుకునే హౌజింగ్ లోన్ వంటి వడ్డీ తక్కువగా ఉన్నా, అది నిరర్థక ఆస్తిగా మారకుండా చూడాలి. ఒక్కసారి ఎన్పీఏగా మారితే మన సొంతింటి కల వేలంలో కరిగిపోతుంది. ఏయే రుణాలు ఎలా తీర్చాలో ప్రణాళిక వేసుకుని కొత్త రుణాల జోలికి పోకుండా ఉంటే చాలు. అప్పు తీర్చడానికి పొదుపు చేయాలి లేదా కొన్ని ఆస్తులను అమ్మాల్సి కూడా రావచ్చు.
రీఫైనాన్స్, రీస్ట్రక్చర్
రుణాలన్నింటినీ కలిపి ఒకే రుణంగా మార్చడాన్ని కన్సాలిడేట్ అంటారు. వివిధ వడ్డీరేట్లతో ఉంటే అనేక రుణాల కన్నా ఒకే రుణం గొడుగు కిందకు తీసుకురావడం వల్ల చెల్లింపు సులభం కావడంతో పాటు, వడ్డీరేటు కూడా తగ్గిపోయే అవకాశం ఉన్నది. ఉదాహరణకు అనేక క్రెడిట్ కార్డుల బకాయిలను ఒక పర్సనల్లోన్ తీసుకుని తీర్చేయవచ్చు. క్రెడిట్ కార్డు కన్నా పర్సనల్లోన్ మీద వడ్డీరేటు చాలా తక్కువ. అలాగే రుణ భారాన్ని రీఫైనాన్సింగ్ లేదా రీస్ట్రక్చరింగ్ ద్వారా కూడా తగ్గించుకోవచ్చు. రీఫైనాన్సింగ్ ద్వారా వడ్డీరేటు తగ్గుతుంది. రీస్ట్రక్చరింగ్ ద్వారా ఈఎంఐల కాలపరిమితిని పెంచుకోవచ్చు. ముఖ్యంగా మన ఆర్థిక పరిస్థితి మెరుగ్గా ఉన్నప్పడు రుణాల చెల్లింపులపై మారటోరియాన్ని కోరుకోవద్దు. అలాగే ఎలాంటి పరిస్థితుల్లోనూ రుణాలను సెటిల్మెంట్ల ద్వారా తీర్చవద్దు. వీటివల్ల క్రెడిట్ స్కోర్ తగ్గిపోతుంది.
కొత్త రుణాలపై జాగ్రత్త
పాత రుణాలను తీర్చడానికి కొత్త రుణాలను తీసుకునే ముందు మీ ఆర్థిక పరిస్థితులపై వాటి ప్రభావం ఎలా ఉంటుందో ఓ అంచనాకు రండి. ఒకవేళ రుణాన్ని తీర్చివేయాలనుకుంటే బంగారం లేదా ప్రాపర్టీలపై తనఖా రుణాలను తీసుకోవచ్చు. దీనివల్ల లిక్విడిటీ అవసరాలు కూడా తీర్చుకోవచ్చు. బంధువులు, మిత్రుల నుంచి చేబదులుగానో లేదా తక్కువ వడ్డీతో అప్పు తీసుకుని అధిక వడ్డీ అప్పును తీర్చి వేయవచ్చు. అయితే ఇలాంటి సందర్భాల్లో అప్పు తీర్చకపోతే రిలేషన్స్ దెబ్బతినడమే కాదు మొత్తం పరపతి, పరువు పోతుంది. కాబట్టి అప్పుల ఊబిలో కూరుకుపోకుండా చూసుకోవడమే మొదటి లక్ష్యం. కూరుకున్నాక దాని నుంచి బయటపడాలంటే మానసిక ైస్థెర్యంతోపాటు పక్కా ప్రణాళిక అవసరం. మొత్తంగా స్థోమతను మించి ఖర్చులు ప్రమాదం.