Philippines | ఫిలిప్పైన్స్‌లో రెండు సైనిక విమానాలు ఢీ.. న‌లుగురు పైల‌ట్లు మృతి

Philippines : ఫిలిప్పైన్స్‌లో ఘోర విమాన ప్ర‌మాదం జ‌రిగింది. ఫిలిప్పైన్స్ సైన్యానికి చెందిన రెండు శిక్ష‌ణ‌ విమానాలు ఢీకొన్నాయి. ఈ ఘ‌ట‌న‌లో న‌లుగురు పైల‌ట్లు మ‌ర‌ణించారు.

Philippines : ఫిలిప్పైన్స్‌లో ఘోర విమాన ప్ర‌మాదం జ‌రిగింది. ఫిలిప్పైన్స్ సైన్యానికి చెందిన రెండు శిక్ష‌ణ‌ విమానాలు ఢీకొన్నాయి. ఈ ఘ‌ట‌న‌లో న‌లుగురు పైల‌ట్లు మ‌ర‌ణించారు. ఈ ఘ‌ట‌న ఫిలిప్పైన్స్ రాజ‌ధాని మ‌నీలా ద‌క్షిణ ప్రాంతంలో ఉన్న ఎయిర్ బేస్ వ‌ద్ద శుక్ర‌వారం జ‌రిగింది. స్థానిక బ‌టాంగాస్ ప్రావిన్స్‌లోని ఫెర్నాండో ఎయిర్ బేస్ స‌మీపంలో ఎస్ఎఫ్-260 అనే రెండు యుద్ధ విమానాలు గాలిలోనే ఢీకొన్నాయి. ఈ స‌మ‌యంలో రెండు విమానాల్లో ఉన్న న‌లుగురు పైల‌ట్లు మ‌ర‌ణించారు.

విమానాలు ఢీకొని ఎయిర్ బేస్ ప్రాంతంలోనే కూలిపోయాయి. ఘ‌ట‌న గురించి తెలిసిన వెంట‌నే స‌హాయ‌క బృందాలు రంగంలోకి దిగాయి. పైల‌ట్ల మృత‌దేహాల్ని స్వాధీనం చేసుకున్నాయి. ఈ విమానాలు పైల‌ట్ల‌కు శిక్ష‌ణ ఇచ్చేందుకు వాడుతారు. ఈ ఘ‌ట‌న త‌ర్వాత ఎస్ఎఫ్-260 యుద్ధ విమానాల్ని ఫిలిప్పైన్స్ ఎయిర్ ఫోర్స్ విభాగం నిలిపివేసింది. తాత్కాలికంగా విమాన సేవ‌ల్ని నిలిపివేసిన‌ట్లు తెలిపింది. విమాన ప్ర‌మాదంపై విచార‌ణ జ‌రుగుతోంద‌ని సైనిక విభాగం వెల్ల‌డించింది. విమానాలు ఢీకొన‌డానికి గ‌ల కార‌ణాల‌పై ద‌ర్యాప్తు బృందం విచార‌ణ జ‌రుపుతోంద‌ని వివ‌రించింది.

ఈ ఘ‌ట‌న‌కు సంబంధించి పైల‌ట్లు శిక్ష‌ణ‌లో ఉన్నార‌ని, వారు మ‌ర‌ణించ‌డం విచార‌క‌ర‌మ‌ని వ్యాఖ్యానించింది. ఎస్ఎఫ్-260 యుద్ధ విమానాలు గ‌తంలో కూడా ప్ర‌మాదాల‌కు గుర‌య్యాయి. గ‌త మేలో ఎస్ఎఫ్-260 యుద్ధ విమానం కూలిన ఘ‌ట‌న‌లో ఇద్ద‌రు పైలట్లు మ‌ర‌ణించారు. అంత‌కుముందు 2023లో కూడా ఎస్ఎఫ్-260 టీపీ మార్చెట్టి అనే విమానం కూడా కూలిపోయింది. ఈ ఘ‌ట‌న‌లో కూడా ఇద్ద‌రు పైల‌ట్లు మ‌ర‌ణించారు. ఫిలిప్పైన్స్‌లో ఈ విమానాలు త‌ర‌చూ ప్ర‌మాదాల‌కు గురి కావ‌డంపై ఆందోళ‌న వ్య‌క్త‌మ‌వుతోంది.