‘పుష్ప’ సినిమాలో ‘అన్నో.. నేనొచ్చి ఇచ్చేదా ముద్దు’ అనే డైలాగు ఇప్పటికీ ట్రెండ్ అవుతున్నది. కారణం, ఆ పాత్ర వావివరుసలు లేకుండా అనే మాట అది. వయసొచ్చినా పూర్తిగా పరిపక్వత చెందని స్వభావాలు మనచుట్టూ చాలా ఉంటాయి. అలాంటి వారిని ఉద్దేశించి చెప్పిన సామెతే ‘వావివరుసలు దెల్వనోడికి పిలిచి పిల్లనిస్తే, అద్దమరాతిరి లేసి పెద్దమ్మా అన్నడంట’ అనేది. వరుసైన పిలుపులు కొన్ని ఉంటాయి. కానివీ కొన్ని ఉంటాయి. ఎవరిని ఎలా పిలవాలో అలానే పిలవాలి. అత్తను పట్టుకుని ‘పెద్దమ్మా’ అంటే నగుబాటే. ఈ సామెతను వ్యంగ్యంగా, హాస్యంగా ప్రయోగిస్తుంటారు.
వాడి మాట తేనెపూసిన కత్తి
కుటిల స్వభావులను ఉద్దేశించిన సామెత ఇది. ఇలాంటి మనస్తత్వం ఉన్నవాళ్లు అన్ని కాలాల్లోనూ ఉంటారు. స్వార్థం కోసం నమ్మినవారిని నట్టేట ముంచే రకం వీళ్లు. మాటలకు, చేతలకు ఎక్కడా పొంతన ఉండదు. నోరు తెరిస్తే అబద్ధాలే. అవికూడా అవాస్తవాలని తెలియడానికి కొన్నేండ్లు పడుతుంది. అంత తియ్యగా మాట్లాడుతారు. ఆ కమ్మని కబుర్ల వెనుక నమ్మించి గొంతుకోసే క్రూర స్వభావం ఉంటుంది. ఆ మాయమాటలకు పడిపోతే దారుణంగా మోసపోవడం ఖాయం. ఇంతకీ, ఈ సామెత ఎలా పుట్టిందంటే? పూర్వం కుందేలు వంటి సాధుజీవులను వేటాడేందుకు కత్తికి తేనె పూసే వారట. అవి పొరపాటున కత్తిని నాకితే, నాలుక తెగి
సులువుగా స్పృహ తప్పేవి. ఉచ్చులు, వలలు కట్టి, పరుగులు పెట్టి వేటాడే బదులు కత్తికి తేనెపూసి చంపడమే సులభం. అలా, ‘తేనెపూసిన కత్తి’ అనే సామెత వాడుకలోకి వచ్చింది. ఎవరైనా వినసొంపైన మాటలు చెబుతున్నారంటే.. ఆ మనిషి దుర్బుద్ధిని గమనించండి.
లింగ బాధ పడ్డారా?
బయటి వ్యక్తుల బాధలకంటే.. ఇంట్లోవాళ్లు పెట్టే బాధలే ఎక్కువైనప్పుడు వినిపించే మాట.. ‘దొంగ బాధ కంటె లింగ బాధెక్కువైంది’. అవి రచ్చకెక్కని సమస్యలు. ఒక్కోసారి నిలువునా దహించి వేస్తాయి. అప్పటికప్పుడు పరిష్కారమూ దొరకదు. ఒక వ్యాపారి చుట్టుపక్కల ఊళ్లకు నడుచుకుంటూ వెళ్లి వివిధ వస్తువులను అమ్మేవాడు. అలా బాగానే సంపాదించే వాడు. ఓ దొంగ అది గమనించి, వ్యాపారిని నిలువు దోపిడి చేయడానికి పథకం పన్నాడు. ఓ రోజు నిర్మానుష్యంగా ఉన్నచోట వ్యాపారిని అడ్డగించ
బోయాడు. వెంటనే వ్యాపారి పరుగందుకున్నాడు. కొంతదూరం వెళ్లేసరికి మెడలో వేసుకున్న లింగంకాయ రాపిడి వల్ల ఛాతి మీద గాయమైంది. రక్తం కారసాగింది. పైగా విపరీతమైన నొప్పి.. ఆగితే, దొంగకు దొరుకుతాడు. ఆగకపోతే గాయపు బాధ. అలా పుట్టిందే.. ‘దొంగ బాధ కన్నా లింగబాధెక్కువైంది’. మెడలో వెండి, బంగారపు శివలింగాన్ని ధరించడం
లింగధారుల సంప్రదాయం.
అర్థ వివరణ
– డప్పు రవి