చిన్నారుల్లో కొవిడ్ లక్షణాలు.. బెంగళూరులో 470 మంది గుర్తింపు

బెంగళూరు : ఇప్పటివరకు పెద్దవారిలోనే కనిపించిన కరోనా వైరస్‌ మహమ్మారి.. సెకండ్ వేవ్‌లో రూటు మార్చినట్లుగా కనిపిస్తున్నది.

March 28, 2021 / 07:07 PM IST

చిన్నారుల్లో కొవిడ్ లక్షణాలు.. బెంగళూరులో 470 మంది గుర్తింపు

బెంగళూరు : ఇప్పటివరకు పెద్దవారిలోనే కనిపించిన కరోనా వైరస్‌ మహమ్మారి.. సెకండ్ వేవ్‌లో రూటు మార్చినట్లుగా కనిపిస్తున్నది. ఇప్పుడు పెద్ద వయసు వారితోపాటు చిన్నారుల్లో కూడా కొవిడ్‌ లక్షణాలు కనిపిస్తున్నాయని వైద్యులు చెప్తున్నారు.

బెంగళూరులో కరోనా వైరస్‌ వ్యాప్తి విపరీతంగా ఉన్నది. మార్చి 1 నుంచి బెంగళూరులో 10 సంవత్సరాల కంటే తక్కువ వయస్సు ఉన్న 470 మంది పిల్లలు కొవిడ్ -19 బారిన పడ్డట్లు అక్కడి గణాంకాలు చెప్తున్నాయి.మొత్తం మందిలో 244 మంది బాలురు, 228 మంది బాలికలు ఉన్నట్లు అధికారిక సమాచారం. ఈ నెల ప్రారంభ రోజుల్లో పిల్లల్లో కేసులు రోజుకు ఎనిమిది నుంచి తొమ్మిది వచ్చేవి. అయితే, అవి మార్చి 26 వరకు క్రమంగా పెరుగుతూ 46 కి చేరాయి.

కొంతమంది వైద్య నిపుణుల అభిప్రాయం ప్రకారం, గతంలో మాదిరిగా కాకుండా పిల్లలు ఇప్పుడు బహిరంగ కార్యకలాపాలు, విధులు, సమావేశాలకు హాజరవుతున్నందున వీరు కొవిడ్‌కు గురవుతున్నారు. లాక్‌డైన్‌ ముగిసి పరిస్థితులు సద్దుమణగడంతో ఒక నిర్దిష్ట వయస్సు వారి కోసం పాఠశాలల్ని తిరిగి తెరిచారు. దాంతో చాలా మంది స్కూలుకు వెళ్లడం, ఇంటికి రావడంతో వైరస్‌ బారిన పడ్డట్లు గుర్తించారు.

పెద్ద వారు ఉద్యోగాలకు వెళ్లడం, బహిరంగ ప్రదేశాల్లో మార్గదర్శకాలు పాటించకుండా ప్రజలు తిరుగుతుండటం వల్ల చిన్నారులకు వైరస్ సోకుతున్నదని కర్ణాటక రాష్ట్ర కొవిడ్ -19 సాంకేతిక సలహా కమిటీ సభ్యుడు, ఎపిడెమియాలజిస్ట్ డాక్టర్‌ గిరిధర్‌ బాబు చెప్తున్నారు. పిల్లలు పాఠశాలలకు వెళ్లడం లేదా ఇతరుల నుంచి వైరస్ బారిన పడటం, కుటుంబ సభ్యులు, స్నేహితులు వంటి ఇతరులకు కూడా వ్యాపించే అవకాశం ఉన్నదని ఆయన తెలిపారు. పిల్లలు శారీరక దూరాన్ని పాటించడంతోపాటు ఎక్కువ సమయం మాస్కులు ధరించలేరు, కాబట్టి పిల్లలు కూడా సులభంగా వైరస్‌కు గురవుతున్నారని అధికారులు అభిప్రాయపడుతున్నారు.

పది సంవత్సరాల కంటే తక్కువ వయస్సు ఉన్న పిల్లలు ప్రస్తుతం పాఠశాలకు వెళ్లకపోయినా, ఆట స్థలాలు లేదా పార్కులు వంటి బహిరంగ ప్రాంతాల్లోని కార్యకలాపాల సమయంలో ఇన్‌ఫెక్షన్‌కు గురయ్యే అవకాశం ఉందని వారు తెలిపారు.