నా మాట ఎవరూ వినట్లే .. నేనేం చేయాలి?

రాష్ట్రంలో మంత్రులు, కాంగ్రె స్‌ ఎమ్మెల్యేలు, నేతల మధ్య వివాదాలు ముదిరాయి.

• ఏఐసీసీకి మహేశ్‌కుమార్‌గౌడ్‌ లేఖ

హైదరాబాద్‌, నవంబర్‌ 6 (నమస్తే తెలంగాణ): రాష్ట్రంలో మంత్రులు, కాంగ్రె స్‌ ఎమ్మెల్యేలు, నేతల మధ్య వివాదాలు ముదిరాయి. పార్టీలో కొంతకాలంగా నేతల మధ్య జరుగుతున్న పంచాయితీలపై టీపీసీసీ అధ్యక్షుడు మహేశ్‌కుమార్‌గౌడ్‌ చేతులెత్తేశారు. ‘నా మాట ఎవరూ వినడం లేదు. నేనేం చేయాలి? తప్పుచేసిన వారిని వివరణ కోరితే, ‘నీ కంటే మేము సీనియర్లమ’ని లెక్కలేని తనంతో వ్యవహరిస్తున్నారు. ఇలా ఉంటే పనిచేయడం కష్టం. గొడవలను మీరే పరిష్కరించండి’ అంటూ శుక్రవారం ఏఐసీసీ కార్యదర్శి కేసీ వేణుగోపాల్‌కు మహేశ్‌కుమార్‌గౌడ్‌ లేఖ రాశారు.

ఇటీవల ఢిల్లీ వేదికగా సీడబ్ల్యూసీ సభ్యులు, మంత్రి దామోదర రాజనర్సింహ, ఎమ్మె ల్యే తోట లక్ష్మీకాంతారావు మధ్య నెలకొన్న వివాదంపై పీసీసీ అధ్యక్షుడి హోదాలో కలుగజేసుకొనే ప్రయత్నం చేయగా, వారిద్దరూ తనను లక్ష్యపెట్టకపోవడంపై మహేశ్‌కుమార్‌గౌడ్‌ తీవ్ర ఆవేదన చెందినట్టు సమాచారం. మంత్రి దామోదర రాజనర్సింహ, ఎమ్మెల్యే లక్మీకాంతారావు మధ్య వివాదంతోపాటు కాంగ్రెస్‌ ఎమ్మెల్యే అనిరుధ్‌రెడ్డి చేసిన వ్యాఖ్యలపై కూడా ఆ లేఖలో ప్రస్తావించినట్టు సమాచారం. కోమటిరెడ్డి రాజగోపాల్‌రెడ్డి అంశాన్ని కూడా హైకమాండ్‌కు ప్రత్యేకంగా వివరించినట్టు తెలిసింది. పెద్దపల్లి పరిణామాలపై కూడా లేఖలో అధిష్ఠానానికి వివరించినట్టు తెలిసింది.