KTR Rythu Garjana | కాంగ్రెస్‌ ప్రభుత్వంపై బీఆర్‌ఎస్‌ పోరుబాట.. నేడు నిర్మల్‌‌లో కేటీఆర్‌ రైతుగర్జన

KTR Rythu Garjana | రాష్ట్రంలో కరువు కోరల్లో చిక్కుకొని విలవిల్లాడుతున్న రైతుల పక్షాన కాంగ్రెస్‌ ప్రభుత్వంపై బీఆర్‌ఎస్‌ పోరుబాట పట్టింది. గత ఎన్నికల సమయంలో కాంగ్రెస్‌ ఇచ్చిన రైతు హామీలను తక్షణమే అమలు చేయాలని డిమాండ్‌ చేస్తూ రాష్ట్రవాప్తంగా ‘రైతు గర్జన’ సభలు నిర్వహిస్తున్నది.

KTR Rythu Garjana | హైదరాబాద్‌/నిర్మల్‌, నవంబర్‌ 10 (నమస్తే తెలంగాణ): రాష్ట్రంలో కరువు కోరల్లో చిక్కుకొని విలవిల్లాడుతున్న రైతుల పక్షాన కాంగ్రెస్‌ ప్రభుత్వంపై బీఆర్‌ఎస్‌ పోరుబాట పట్టింది. గత ఎన్నికల సమయంలో కాంగ్రెస్‌ ఇచ్చిన రైతు హామీలను తక్షణమే అమలు చేయాలని డిమాండ్‌ చేస్తూ రాష్ట్రవాప్తంగా ‘రైతు గర్జన’ సభలు నిర్వహిస్తున్నది. ఇందు లో భాగంగా బుధవారం నిర్మల్‌లో నిర్వహించే సభకు బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ హాజరుకానున్నారు. ఇటీవల ఆదిలాబాద్‌లో నిర్వహించిన రైతు గర్జన సభ విజయవంతం కావడంతో ఉమ్మడి పది జిల్లాల్లోనూ ఇదే తరహా సభల నిర్వహణకు పార్టీ అధిష్ఠానం రూట్‌ మ్యాప్‌ సిద్ధం చేస్తున్నది. జిల్లా స్థాయి ముఖ్య నేతలు తమ జిల్లాల్లో రైతు గర్జనలు నిర్వహించాలని కేటీఆర్‌ దృష్టికి తెచ్చారు. ఈ మేరకు నిర్మల్‌ సభకు భారీ ఏర్పాట్లు చేశారు.

నిర్మల్‌ గులాబీమయం

నిర్మల్‌లో బుధవారం బీఆర్‌ఎస్‌ నిర్వహిస్తున్న రైతు గర్జన మహాసభకు సర్వం సిద్ధమైంది. స్థానిక ఎన్టీఆర్‌ మినీ స్టేడియంలో జరిగే భారీ బహిరంగ సభకు పార్టీ వర్కింగ్‌ ప్రెసిడెంట్‌ కేటీఆర్‌ ముఖ్యఅతిథిగా హాజరుకానున్నారు. మధ్యాహ్నం హైదరాబాద్‌లోని తన నివాసం నుంచి రోడ్డు మార్గంలో బయలుదేరి.. సాయంత్రం 4 గంటలకు సభా ప్రాంగణానికి చేరుకుంటారని పార్టీ నేతలు తెలిపారు. నిర్మల్‌, ఖానాపూర్‌, ముథోల్‌ నియోజకవర్గాల నుంచి రైతు లు, పార్టీ శ్రేణులు, అభిమానులు భారీగా తరలివచ్చేందుకు సిద్ధమయ్యారు.

సభ ఏర్పాట్లను మాజీ మంత్రులు వేముల ప్రశాంత్‌రెడ్డి, జోగు రామన్న, మాజీ ఎంపీ బాల్క సుమన్‌, బోథ్‌ ఎమ్మెల్యే అనిల్‌జాదవ్‌ మంగళవారం పరిశీలించారు. సభ విజయవంతం కోసం ఖానాపూర్‌ ఇన్‌చార్జి జాన్సన్‌ నా యక్‌, నిర్మల్‌ నియోజకవర్గ ఇన్‌చార్జి రామ్‌కిషన్‌రెడ్డి కృషి చేస్తున్నారు. కేటీఆర్‌ రాక నేపథ్యంలో నిర్మల్‌ గులాబీమయంగా మారింది. ప్రధాన కూడళ్లు, రహదారుల వెంట భారీ ఫ్లెక్సీలు, హోర్డింగ్‌లు, గులాబీ తోరణాలు ఏర్పాటుచేశారు. ఈ సందర్భంగా వేముల ప్రశాంత్‌రెడ్డి మా ట్లాడుతూ కాంగ్రెస్‌ ప్రభుత్వ రైతు వ్యతిరేక విధానాలపై సమరభేరి మోగించేందుకే కేటీఆర్‌ నిర్మల్‌ గడ్డపైకి వస్తున్నారని తెలిపారు. కేసీఆర్‌ పాలనలో 24 గంటల ఉచిత విద్యుత్తు, సాగునీరు, సకాలంలో ఎరువులు, రైతుబంధు, వేగవంతమైన ధాన్యం కొనుగోళ్లతో రైతులు సగౌరవంగా బతికారని గుర్తుచేశారు. కాంగ్రెస్‌ పాలనలో సాగు నీరు, విద్యుత్తు, యూరియా కష్టాలతోపాటు ధాన్యం విక్రయించుకొనేందుకు కూడా రైతులు ఇబ్బందులు పడుతున్నారని విమర్శించారు.

పాలకుల నిర్లక్ష్యాన్ని కడిగేయనున్న కేటీఆర్‌

ఎల్‌ నినో ప్రభావంతో కరువు వస్తుందని ముందే హెచ్చరించినా గోదావరి, కృష్ణా నీటిని ఎత్తకుండా కాంగ్రెస్‌ ప్రభుత్వం నిర్లక్ష్యం చేసిందని, ముమ్మాటికీ కాంగ్రెస్‌ వల్లే కరువు వచ్చిందని బీఆర్‌ఎస్‌ విమర్శిస్తున్నది. నీటిని ఒడిసిపట్టకపోవడంతో గోదావరి నుంచి దాదాపు 780 టీఎంసీలు, కృష్ణా నుంచి 300 టీఎంసీలు వృథాగా సముద్రం పాలయ్యాయని మొదటినుంచీ ఆందోళన వ్యక్తం చేస్తున్నది. ఈ నీటిని ఒడిసిపట్టి ఉంటే కోటీ 25 లక్షల ఎకరాలకు సాగునీరు అందేదని, ప్రజల తాగునీటి కష్టాలు తీరేవని చెప్తున్నది. వచ్చిన నీటిని ఎత్తకపోగా వరి వేయవద్దంటూ సర్కార్‌ ఆదేశాలు జారీచేయడం, ఒకవేళ వేస్తే రైతుల ఖర్మ అం టూ చేతులెత్తేయడంపై మండిపడుతున్నది. ఎన్నికల సమయంలో వరంగల్‌లో కాంగ్రెస్‌ ప్రకటించిన ‘రైతు డిక్లరేషన్‌’ను అమలు చేయాలని, రైతుభరోసా, రుణమాఫీ, రైతుబీమా, పంట కొనుగోళ్లు, కరువుసాయంపై ప్రభుత్వాన్ని నిలదీసేందుకు సిద్ధమైంది.