శభాష్‌ వంశిక.. జాతీయస్థాయి క్రికెట్‌కు ఎంపికైన విద్యార్థినిని అభినందించిన కేటీఆర్‌

‘వంశిక శభాష్‌.. జాతీయస్థాయి క్రికెట్‌కు ఎంపికకావడం గర్వకారణం’అంటూ బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ అభినందించారు. విద్యార్థిని క్రీడాప్రయాణానికి అండగా ఉంటానని భరోసా ఇచ్చారు.

హైదరాబాద్‌, అక్టోబర్‌ 23 (నమస్తే తెలంగాణ) : ‘వంశిక శభాష్‌.. జాతీయస్థాయి క్రికెట్‌కు ఎంపికకావడం గర్వకారణం’అంటూ బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ అభినందించారు. విద్యార్థిని క్రీడాప్రయాణానికి అండగా ఉంటానని భరోసా ఇచ్చారు. రాజన్న సిరిసిల్ల జిల్లా ముస్తాబాద్‌ మండలం నామాపూర్‌ జడ్పీహెచ్‌ఎస్‌కు చెందిన పదో తరగతి విద్యార్థిని గూడెపు వంశిక శుక్రవారం తెలంగాణ భవన్‌లో కేటీఆర్‌ను కలిసింది. ఆమె క్రికెట్‌లో సాధించిన విజయాలు, జాతీయ స్థాయి పోటీలకు ఎంపికైన తీరు, భవిష్యత్తు లక్ష్యాల గురించి కేటీఆర్‌ వివరాలు తెలుసుకున్నారు. వంశిక సాధించిన విజయానికి కృషి చేసిన వ్యాయామ ఉపాధ్యాయుడు కుంట శ్రీనివాస్‌ను, ఆమెకు ప్రోత్సాహం అందించిన పాఠశాల ఉపాధ్యాయులను అభినందించారు.

రాష్ట్రస్థాయిలో సత్తా చాటిన వంశిక

అక్టోబర్‌ 10 నుంచి 13 వరకు రాజన్న సిరిసిల్ల జిల్లాలో నిర్వహించిన రాష్ట్ర స్థాయి క్రికెట్‌ పోటీల్లో వంశిక అత్యుత్తమ ప్రతిభ కనబరిచి జాతీయ స్థాయి పోటీలకు అర్హత సాధించింది. నవంబర్‌ మొదటి వారంలో జమ్ముకశ్మీర్‌లో జరిగే జాతీయస్థాయి పోటీల్లో వంశిక తెలంగాణ తరఫున ఆడనున్నది. జాతీయ స్థాయికి ఎంపికకావడం పాఠశాలతో పాటు నామాపూర్‌ గ్రామానికి గర్వకారణంగా నిలిచింది.