Karepalli | అధిక లోడుతో సుబాబుల్ లారీలు.. గ్రామాల మీదుగా యథేచ్ఛగా రవాణా!

Karepalli | ఖమ్మం జిల్లా కారేపల్లి మండలంలోని పలు గ్రామాల మీదుగా అధిక లోడుతో సుబాబుల్ కర్రలను తరలిస్తున్న లారీలు ప్రజల్లో ఆందోళన కలిగిస్తున్నాయి.

Karepalli | కారేపల్లి, అక్టోబర్ 12: ఖమ్మం జిల్లా కారేపల్లి మండలంలోని పలు గ్రామాల మీదుగా అధిక లోడుతో సుబాబుల్ కర్రలను తరలిస్తున్న లారీలు ప్రజల్లో ఆందోళన కలిగిస్తున్నాయి. లారీలపై పరిమితికి మించి ఎత్తుగా సుబాబుల్ కర్రలను లోడ్ చేసి రవాణా చేస్తుండటంతో గ్రామాల్లోని విద్యుత్ తీగలకు తగిలి ప్రమాదాలు జరిగే అవకాశం ఉందని స్థానికులు ఆందోళన వ్యక్తం చేస్తున్నారు.

ముఖ్యంగా గ్రామాల్లోని ఇరుకైన రహదారులు, తక్కువ ఎత్తులో ఉన్న విద్యుత్ తీగల వద్ద అధిక లోడుతో వెళ్లే లారీల రాకపోకలు ప్రమాదకరంగా మారుతున్నాయని గ్రామస్తులు చెబుతున్నారు. సుబాబుల్ కర్రలు విద్యుత్ తీగలకు తగిలితే విద్యుత్ సరఫరాకు అంతరాయం కలగడంతోపాటు, వాహనదారులు, రహదారిపై వెళ్లే ప్రజలు ప్రమాదాలకు గురయ్యే అవకాశం ఉందని ఆందోళన వ్యక్తం చేస్తున్నారు. గ్రామీణ ప్రాంతాల్లో చిన్నారులు, వృద్ధులు, ద్విచక్ర వాహనదారులు నిత్యం రాకపోకలు సాగిస్తుంటారని, ఇలాంటి పరిస్థితుల్లో లారీల నిర్వాహకులు తగిన జాగ్రత్తలు తీసుకోవాలని కోరుతున్నారు.

ప్రమాదం జరిగిన తర్వాతే స్పందిస్తారా?

గ్రామీణ ప్రాంతాల్లో రవాణా నిబంధనలు పాటిస్తున్నారా లేదా అనే విషయంపై సంబంధిత అధికారులు పర్యవేక్షణ చేపట్టాలని స్థానికులు డిమాండ్ చేస్తున్నారు. అధిక ఎత్తులో లోడింగ్ చేస్తూ విద్యుత్ తీగలకు ప్రమాదం కలిగించే పరిస్థితులు ఉన్నప్పటికీ సంబంధిత శాఖల అధికారులు తగిన చర్యలు తీసుకోవడం లేదనే విమర్శలు వినిపిస్తున్నాయి. ప్రమాదం జరిగిన తర్వాత స్పందించడం కంటే ముందుగానే అప్రమత్తమై నివారణ చర్యలు చేపట్టాలని ప్రజలు సూచిస్తున్నారు.

అధికారులు ఇప్పటికైనా స్పందించాలి

విద్యుత్ శాఖ అధికారులు గ్రామాల్లో తక్కువ ఎత్తులో ఉన్న విద్యుత్ తీగలను పరిశీలించి అవసరమైన చర్యలు చేపట్టాలని, రవాణా శాఖ అధికారులు అధిక లోడుతో వెళ్తున్న లారీలను తనిఖీ చేయాలని గ్రామస్తులు కోరుతున్నారు. నిబంధనలకు విరుద్ధంగా లోడింగ్ చేస్తున్న వాహనాలపై చట్టప్రకారం చర్యలు తీసుకోవాలని విజ్ఞప్తి చేస్తున్నారు. గ్రామీణ రహదారులపై ప్రజల భద్రతకు ప్రాధాన్యతనిస్తూ విద్యుత్, రవాణా శాఖల అధికారులు సమన్వయంతో పనిచేయాలని స్థానికులు కోరుతున్నారు. ఎలాంటి అవాంఛనీయ ఘటనలు చోటుచేసుకోకముందే అధికారులు స్పందించి సమస్యకు పరిష్కారం చూపాలని విజ్ఞప్తి చేస్తున్నారు.