Visit:
అమరావతి: కాణిపాకం వరసిద్ది వినాయక స్వామి ఆలయంలోని నూతన స్వర్ణ రథాన్ని ఫిబ్రవరి 16న ప్రారంభించనున్నారు. సుమారు రూ.6 కోట్లతో నిర్మించిన ఈ రథాన్ని ఆలయ అధికారుల విజ్ఞప్తి మేరకు టీటీడీ చేపట్టింది. 2021 సెప్టెంబర్‌లో టీటీడీ చైర్మన్ వైవీ సుబ్బారెడ్డి రథాన్ని ఆలయానికి అప్పగించారు. రాష్ట్ర దేవాదాయ శాఖ ఆధ్వర్యంలోని ఆలయం రథానికి అయ్యే ఖర్చును టీటీడీ తన సొంత ఖజానా నుంచి చెల్లించిందని, కార్యనిర్వహణాధికారి వెంకటేష్ తెలిపారు.
ఫిబ్రవరి 16న నూతన స్వర్ణ రథం ప్రారంభోత్సవ కార్యక్రమానికి ఏపీ దేవాదాయ శాఖ మంత్రి వెల్లంపల్లి శ్రీనివాస్‌ ముఖ్య అతిథిగా హాజరుకానున్నారు. ఈ కార్యక్రమంలో భాగంగా కలశపూజ, హోమం, మహా పూర్ణాహుతి తదితర కార్యక్రమాల అనంతరం కుంభాభిషేకం నిర్వహించనున్నారు. అదే రోజు సాయంత్రం వరసిద్ది వినాయక స్వామిని తన సతీమణిలైన సిద్ధి, బుద్ధి సమేతంగా నూతన రథంపై నాలుగు మాడ వీధుల్లో ఊరేగించనున్నారు.
