‘జూలూరుపాడును కరువు మండలంగా ప్రకటించాలి’

ఎల్ నినో ప్రభావంతో ఏర్పడిన తీవ్ర వర్షాభావ పరిస్థితుల దృష్ట్యా జూలూరుపాడు మండలాన్ని కరువు మండలంగా ప్రకటించి, రైతాంగాన్ని అన్ని విధాలా ఆదుకోవాలని తెలంగాణ రాష్ట్ర రైతు సంఘం భద్రాద్రి కొత్తగూడెం జిల్లా అధ్యక్షుడు చండ్ర నరేంద్రకుమార్ ప్రభుత్వాన్ని డిమాండ్ చేశారు.

– ​తెలంగాణ రాష్ట్ర రైతు సంఘం భ‌ద్రాద్రి కొత్త‌గూడెం జిల్లా అధ్యక్షుడు చండ్ర నరేంద్రకుమార్ డిమాండ్

​జూలూరుపాడు, అక్టోబర్ 16 : ఎల్ నినో ప్రభావంతో ఏర్పడిన తీవ్ర వర్షాభావ పరిస్థితుల దృష్ట్యా జూలూరుపాడు మండలాన్ని కరువు మండలంగా ప్రకటించి, రైతాంగాన్ని అన్ని విధాలా ఆదుకోవాలని తెలంగాణ రాష్ట్ర రైతు సంఘం భద్రాద్రి కొత్తగూడెం జిల్లా అధ్యక్షుడు చండ్ర నరేంద్రకుమార్ ప్రభుత్వాన్ని డిమాండ్ చేశారు. జూలూరుపాడు గ్రామంలో సిరిపురపు వెంకటేశ్వర్లు అధ్యక్షతన సీపీఐ మండల కార్యవర్గ సమావేశం శుక్రవారం జరిగింది. ఈ సమావేశంలో పాల్గొన్న నరేంద్రకుమార్ మాట్లాడుతూ.. సాగు కోసం రైతులు ఇప్పటికే వేలాది రూపాయలు పెట్టుబడి పెట్టారని, కానీ దిగుబడి చేతికి వచ్చే పరిస్థితి లేక తీవ్ర ఆందోళనలో ఉన్నారని ఆవేదన వ్యక్తం చేశారు.

​రాష్ట్రంలో లోటు వర్షపాతం నమోదైన జిల్లాల్లో భద్రాద్రి కొత్తగూడెం ఒకటని, జిల్లాలోని అనేక మండలాల్లో తీవ్ర కరువు పరిస్థితులు నెలకొన్నాయని ఆయన గుర్తుచేశారు. వర్షాలు లేకపోవడంతో చెరువులు, కుంటలు అడుగంటిపోయాయని, భూగర్భ జలాలు సైతం కనిష్ట స్థాయికి పడిపోయాయని ఆందోళన వ్యక్తం చేశారు. ఈ విపత్కర పరిస్థితుల్లో తక్షణమే జూలూరుపాడును కరువు ప్రాంతంగా ప్రకటించి, నష్టపోయిన రైతులకు ఎకరానికి రూ.30 వేల చొప్పున పరిహారం చెల్లించాలని కోరారు. అలాగే, ఎండిపోతున్న పంటలను కాపాడేందుకు గోదావరి జలాలను మళ్లించి, యుద్ధప్రాతిపదికన చెరువులు, కుంటలను నింపాలని విజ్ఞప్తి చేశారు.

​తీవ్ర వర్షాభావ పరిస్థితులు ఉన్నప్పటికీ రాష్ట్ర ప్రభుత్వం ప్రత్యామ్నాయ చర్యలు చేపట్టడంలో పూర్తిగా విఫలమైందని ఆయన విమర్శించారు. పొరుగు రాష్ట్రాలు ఇప్పటికే కరువు ప్రాంతాలను ప్రకటించి రైతులను ఆదుకునేందుకు చర్యలు చేపట్టాయని, కానీ రాష్ట్ర ప్రభుత్వం ఆ దిశగా కనీస ఆలోచన చేయడం లేదన్నారు. పత్తి రైతులను ఆదుకునేందుకు క్వింటాల్‌కు కనీస మద్దతు ధర రూ.13,000 ప్రకటించాలని డిమాండ్ చేశారు. ప్రభుత్వం తక్షణమే స్పందించి నష్టపరిహారం చెల్లించని పక్షంలో, పెద్ద ఎత్తున రైతులను సమీకరించి ఆందోళనలు ఉధృతం చేస్తామని ఆయన హెచ్చరించారు. ​ఈ సమావేశంలో సీపీఐ మండల కార్యదర్శి గుండుపిన్ని వెంకటేశ్వర్లు, నాయకులు ఎస్.కె. నాగుల్ మీరా, ఎల్లంకి మధు, పొన్నెకంటి వెంకటేశ్వర్లు, గుండెపిన్ని మధుసూదన్ రావు, కంచర్ల రాఘవేంద్రరావు, వలమల్ల సామేలు, హలావత్ బద్రు, కొండ వీరయ్య పాల్గొన్నారు.