ప్రపంచంలో అత్యధికంగా విరాళాలు ఇచ్చింది మన భారతీయుడే.. ఎవరో తెలుసా..?

ఢిల్లీ ,జూన్ 23:టాటా గ్రూప్ వ్యవస్థాపకుడు జెంషెట్​ జీ టాటా గడిచిన వందేండ్లలో ప్రపంచంలోనే అత్యంత పెద్దమొత్తంలో విరాళాలు ఇచ్చినట్లు హరూన్​, ఎడెల్​గేవ్​ ఫౌండేషన్​ల నివేదికలో వెల్లడైంది. గడిచిన శతాబ్దానికి సంబంధించిన విరాళాలపై హరూన్​,ఎడెల్​గేవ్​ ఫౌండేషన్​లు సంయుక్తంగా రూపొందించిన నివేదికలో ఈ విషయం తేలింది. టాటా గ్రూప్ ప్రారంభం నుంచే ఈ సేవా కార్యక్రమాలు కొనసాగుతున్నట్లు తాజాగా ఈ నివేదిక స్పష్టం చేసింది. గడిచిన శతాబ్ద కాలంలో పారిశ్రామిక దిగ్గజం, టాటా గ్రూప్​ వ్యవస్థాపకుడు ‘జెంషెట్​ జీ టాటా’ 102 బిలియన్​ డాలర్లను సేవాకార్యక్రమాలకు వినియోగించినట్లు తెలిపింది.

ఈ మొత్తం ప్రపంచంలోనే అత్యధిక విరాళమని హరూన్​, ఎడెల్​గేవ్​ ఫౌండేషన్​లు తమ నివేదికలో తెలిపాయి. గడిచిన శతాబ్దానికి సంబంధించిన విరాళాలపై ప్రపంచవ్యాప్తంగా మొత్తం 50 మందికి ఈ జాబితాలో చోటు దక్కగా జెంషెట్​జీ టాటా అగ్రస్థానంలో నిలవడం విశేషం. ఈ టాప్​-50 జాబితాలో 37 మంది ఇప్పటికే మరణించగా13 మంది మాత్రమే జీవించి ఉన్నారు.

మైక్రోసాఫ్ట్​ సహ వ్యవస్థాపకుడు బిల్​గేట్స్, ఆయన నుంచి విడాకులు తీసుకోనున్న సతీమణి​ మెలిందా కలిపి 74.6 బిలియన్​ డాలర్లు విరాళంగా ఇచ్చినట్లు నివేదిక తెలిపింది. దీనితో వీరు ప్రపంచంలోనే అత్యధిక విరాళాలు ఇచ్చిన జాబితాలో రెండో స్థానంలో ఉన్నారు. ప్రముఖ ఇన్వెస్టర్​ వారెన్​ బఫెట్​ 37.4 బిలియన్ డాలర్ల వితరణతో మూడో స్థానంలో నిలిచారు. జార్జ్​ సోరస్​ 34.8 బిలియన్​ డాలర్లు, జాన్ డీ రాక్​ఫెల్లర్ 26,8 బిలియన్​ డాలర్లు విరాళంగా ఇచ్చి వరుసగా 4,5 స్థానాల్లో ఉన్నారు.

ఈ జాబీతాలో చోటు దక్కించుకున్న మరో భారతీయుడు విప్రో అధినేత అజీమ్​ ప్రేమ్​జీ. ప్రేమ్​జీ 22 బిలియన్​ డాలర్లు వితరణ చేసినట్లు నివేదిక పేర్కొంది. ఈ జాబితాలో ఉన్న వారిలో 38 మంది అమెరికాకు చెందిన వారు.యూకేకు చెందిన వారు 5 మంది, ముగ్గురు చైనీయులు ఇందులో ఉన్నారు. మొత్తం టాప్​ 50 మంది కలిసి గత శతాబ్దంలో 832 బిలియన్ డాలర్ల సేవాకార్యక్రమాలు చేసినట్లు నివేదిక వెల్లడించింది. తమ ఫౌండేషన్ల ద్వారా, విరాళాల రూపంలో ఈ మొత్తం ఇచ్చినట్లు తెలిపింది.