పది పరీక్షలకు బుర్ఖాతో వచ్చినా అనుమతి

పదో తరగతి పరీక్షలకు బుర్ఖా ధరించి వచ్చే విద్యార్థులను పరీక్ష కేంద్రంలోకి అనుమతించాలని ప్రభుత్వం ఆదేశాలు జారీ చేసింది. బుర్ఖాలను తొలగించాలని కోరవద్దని సూచించింది.

• అధికారులకు ప్రభుత్వం ఆదేశాలు
• పరీక్షల నిర్వహణపై సూచనలు జారీ

హైదరాబాద్‌, మే 20 (నమస్తే తెలంగాణ): పదో తరగతి పరీక్షలకు బుర్ఖా ధరించి వచ్చే విద్యార్థులను పరీక్ష కేంద్రంలోకి అనుమతించాలని ప్రభుత్వం ఆదేశాలు జారీ చేసింది. బుర్ఖాలను తొలగించాలని కోరవద్దని సూచించింది. అయితే ఆ విద్యార్థులను క్షుణ్ణంగా తనిఖీ చేయాలని, ఇందుకోసం ప్రత్యేకంగా మహిళా టీచర్‌ను ఏర్పాటు చేసి నిషేధిత వస్తువులు తీసుకెళ్లకుండా చర్యలు తీసుకోవాలని స్పష్టం చేసింది. ఈ మేరకు ఉన్నతాధికారులు చీఫ్‌ సూపరింటెండెంట్లు, డిపార్ట్‌మెంటల్‌(సీఎస్‌డీవో) అధికారులకు పలు సూచనలు జారీ చేశారు.

• పరీక్ష కేంద్రాల్లో సెల్‌ఫోన్లపై నిషేధం విధించిన నేపథ్యంలో బందోబస్తులో ఉన్న పోలీసు అధికారుల ఫోన్‌ నంబర్ల ద్వారా విద్యార్థుల హాజరు శాతాన్ని అధికారులకు చేరవేయాలి.
• ప్రశ్నపత్రాలను 1-15 నిమిషాల ముందుగా సీసీ కెమెరాల పర్యవేక్షణలోనే తెరవాలి. ప్రశ్నపత్రాలు సక్రమంగా ఉన్నాయో, లేదో ముందే సరి చూసుకోవాలి. అంతకుముందు ఎట్టి పరిస్థితుల్లో తెరువొద్దు.
• పరీక్ష కేంద్రాల్లో జిల్లా డీఈవోల సెల్‌ నంబర్లను ప్రదర్శించాలి. అత్యవసర పరిస్థితుల దృష్ట్యా స్థానిక పీహెచ్‌సీ డాక్టర్‌ నంబర్‌ను అందుబాటులో ఉంచాలి.
• సీఎస్‌డీవోలు పోలీసు అధికారులను సంప్రదించి పరీక్ష కేంద్రాలకు సమీపంలోని జిరాక్స్‌ సెంటర్లను మూసివేయించాలి.
• అంధులు, కంటిచూపు లోపం ఉన్న వారికి చీఫ్‌ సూపరింటెండెంట్లు స్ర్కైబ్‌లను (సహాయకులను) నియమించాలి.
• లాటరీ తీసి రోజువారీగా టీచర్లకు ఇన్విజిలేషన్‌ విధులు కేటాయించాలి.
• పరీక్షకు ఒక రోజు ముందు ఇన్విజిలేటర్లతో సమావేశాన్ని నిర్వహించాలి.
• విద్యార్థులు శానిటేషన్‌ చేసుకోవడానికి శానిటైజర్లను అందుబాటులో ఉంచాలి.
• విద్యార్థులు పరీక్షలు సవ్యంగా రాసుకొనేందుకు వీలుగా డ్యుయల్‌ డెస్క్‌ బల్లలు ఉండేలా చూడాలి.
• పరీక్ష సిబ్బంది కచ్చితంగా ఫొటో ఐడీ కార్డులను ధరించాలి.
• సీఎస్‌డీవోలు, ఇన్విజిలేటర్లు, పోస్టాఫీస్‌ డిస్పాచ్‌, ప్రశ్నపత్రాల రిజిస్టర్లను నిర్వహించాలి.