ఫిక్స్‌డ్ డిపాజిట్లపై టీడీఎస్‌.. ఎలా నివారించుకోవాలంటే..?

బ్యాంకులు ఎఫ్‌డీలపై విధించే టీడీఎస్‌ను తగ్గించుకోవాలంటే ఏంచేయాలి

April 3, 2021 / 06:10 PM IST

ఫిక్స్‌డ్ డిపాజిట్లపై టీడీఎస్‌.. ఎలా నివారించుకోవాలంటే..?

పెట్టుబడిదారులు అమితంగా ఇష్టపడే పొదుపు సాధనాల్లో స్థిర డిపాజిట్స్‌ (ఎఫ్‌డీ) ఒకటి. ఎందుకంటే ఇవి స్థిరమైన రాబడి, మూలధనం భద్రతకు హామీ ఇస్తుంది. అయినప్పటికీ, ఫిక్స్‌డ్‌ డిపాజిట్లపై వడ్డీ పూర్తిగా పన్ను పరిధిలోకి వస్తుంది.

కొన్ని బ్యాంకులు వినియోగదారుల విజ్ఞప్తి మేరకు ఎఫ్‌డీలపై టీడీఎస్‌ను కొంతవరకు తగ్గిస్తాయి. అయితే, బ్యాంకులు ఎఫ్‌డీలపై విధించే టీడీఎస్‌ను తగ్గించుకోవాలంటే ఏంచేయాలి..?

మీరు ఆదాయం మినహాయింపు పరిమితి కంటే తక్కువగా ఉంటే.. మీరు సంపాదించిన వడ్డీపై టీడీఎస్ చెల్లించాల్సిన అవసరం లేదు. వివిధ ఎఫ్‌డీలపై బ్యాంకులు 10 శాతం చొప్పున టీడీఎస్‌ను తగ్గించుకొంటాయి. ఒకవేళ డిపాజిటర్ శాశ్వత ఖాతా నంబర్ (పాన్) సమర్పించడంలో విఫలమైనపక్షంలో.. బ్యాంక్ 20 శాతం చొప్పున టీడీఎస్‌ను తీసివేస్తుంది.

టీడీఎస్‌ను తీసివేయకుండా బ్యాంకులను నిరోధించడానికి మీరు చేయాల్సిందల్లా.. మీ ఆదాయం మినహాయింపు పరిమితి కంటే తక్కువగా ఉన్నదని బ్యాంకుకు తెలియజేయాలి. ఫారం 15 జీ లేదా 15 హెచ్ ను బ్యాంకుకు సమర్పించాలి. ఇవి సెల్ఫ్‌ డిక్లరేషన్‌ ఫారాలు. దీనిలో మీ ఆదాయం మినహాయింపు పరిమితి కంటే తక్కువగా ఉన్నదని మీరు నిర్ధారించాలి.

60 సంవత్సరాల కంటే తక్కువ వయస్సు ఉన్నవారికి రూ.2.5 లక్షల లోపు ఆదాయం పన్ను మినహాయింపు ఉంటుంది. 60 ఏండ్ల వయసు పైబడిన వారు, 80 ఏండ్లలోపు వారికి రూ.3 లక్షల వరకు ఆదాయం పన్ను మినహాయింపు ఉంటుంది. 80 ఏండ్ల వయసు పైబడిన వారికి రూ.5 లక్షల వరకు ఆదాయం పన్ను మినహాయింపు ఇస్తారు.

ఈ ప్రయోజనం కోసం 60 సంవత్సరాల కంటే తక్కువ వయస్సు ఉన్నవారికి ఫారం 15 జీ , 60 ఏండ్ల వయసు పైబడిన వారికి ఫారం 15 హెచ్ .. రెండు సెల్ఫ్‌ డిక్లరేషన్‌ ఫారంలు అందుబాటులో ఉన్నాయి.

సంబంధిత ఆర్థిక సంవత్సరం ప్రారంభంలో మీరు ఈ ఫారాలను బ్యాంకులకు సమర్పించాల్సి ఉంటుంది. ఉదాహరణకు.. 2022 ఆర్థిక సంవత్సరంలో టీడీఎస్‌ను నివారించడానికి మీరు ఇప్పుడు ఫారాలను సమర్పించాల్సి ఉంటుందని గుర్తుంచుకోవాలి. మీకు డిపాజిట్ ఉన్న ప్రతి బ్యాంకులో ఇది సమర్పించాల్సి ఉంటుంది.