ఐసొలేషన్‌ కేంద్రాలుగా హోటళ్లు, రెస్టారెంట్లు

• ఆస్పత్రుల్లో పడకల కొరతతో కొవిడ్‌ కేంద్రాలుగా మార్పు
• ఇంట్లో మిగతావారికి సోకుతుందని హోటళ్లలో చికిత్స
• వసతి బట్టి ధర, నిత్యం ఆరోగ్య పరీక్షలు
• అందుబాటులో వైద్యుడు, నర్సులు

అతడి పేరు ప్రకాశ్‌. నాలుగు రోజుల క్రితం కొవిడ్‌ టెస్ట్‌ చేయించుకోగా పాజిటివ్‌ వచ్చింది. ఇంటికి వెళితే కుటుంబ సభ్యులకు సోకే ప్రమాదముందని భావించాడు. దవాఖానలో చేరుదామంటే అంత సీరియస్‌ లేదు. ఇంట్లో ఓ గదిలో ఉండే సాహసం చేయలేకపోయాడు. ఏం చేయాలో ఆలోచించి వెంటనే కొవిడ్‌ సేవలందించే ఓ హోటల్‌ను బుక్‌ చేసుకున్నాడు. 14 రోజుల ప్యాకేజీని మాట్లాడుకుని అందులో చేరాడు.

నగరంలో ఆతిథ్యం ఇచ్చే హోటళ్లు ఇలా కొవిడ్‌ కేర్‌ సెంటర్లుగా మారుతున్నాయి. అతిథులకు బదులు పాజిటివ్‌ రోగులను ఆహ్వానిస్తున్నాయి. రూం లను వార్డులుగా మార్చి సేవలందించేందుకు సిద్ధమవుతున్నాయి. క్వారంటైన్‌లో ఉన్న వారిని కంటికి రెప్పలా కాపాడేందుకు ముందుకొస్తున్నాయి.
సిటీబ్యూరో, ఏప్రిల్‌ 23 (నమస్తే తెలంగాణ): రోజురోజుకూ పెరుగుతున్న కరోనా కేసులతో వైద్యశాలలు నిండిపోతున్నాయి. ఈ క్రమంలో హోటళ్లు, రెస్టారెంట్లూ కొవిడ్‌ బాధితులకు సేవలందించేందుకు ముందుకొస్తున్నాయి. కరోనా సేవా కేంద్రాలుగా అవతరిస్తున్నాయి. కొన్ని కార్పొరేట్‌ వైద్యశాలలతో కలిసి ఒప్పందం చేసుకుంటున్నాయి. హోటళ్లలోని సింగిల్‌, డబుల్‌ బెడ్‌ రూంలను ఐసోలేషన్‌ కేంద్రాలుగా ఏర్పాటు చేసి పాజిటివ్‌ రోగులకు కేటాయిస్తున్నాయి. బ్రేక్‌ఫాస్ట్‌, లంచ్‌, హైటీ, డిన్నర్‌ను సైతం అందిస్తున్నాయి. అంతేకాక క్వారంటైన్‌లో ఉన్నవారికి వైద్యులను అందుబాటులో ఉంచుతున్నాయి. ప్రతిరోజు రోగుల వద్దకు వెళ్తున్న వైద్యులు లక్షణాలను పరిశీలించడంతో పాటు అవసరమైన మందులను ఇస్తున్నారు. బీపీ, షుగర్‌, ఆక్సిజన్‌ లెవల్స్‌, జ్వరం వంటి లక్షణాలు కన్పిస్తే వెంటే ఒప్పందం చేసుకున్న దవాఖానలకు తరలిస్తున్నారు.

సేవలు ఇలా..

• హిమాయత్‌నగర్‌లోని ద ప్లాటినం బోటిక్‌, రాడిసన్‌ హోటల్‌ మొదటి దఫాలో 30 నుంచి 60 పడకలతో ఐసొలేషన్‌ సెంటర్లను ఏర్పాటు చేశాయి. పాజిటివ్‌ రోగులకు చేర్చుకొని సేవలందిస్తున్నాయి. ఇందుకోసం రూ.3 వేల నుంచి రూ.6 వేల వరకు వసూలు చేస్తున్నాయి. అత్యవసర పరిస్థితి ఎదురైతే రోగులను చేర్చేందుకు మహావీర్‌ దవాఖానతో ఒప్పందం కుదుర్చుకున్నాయి.
• ఓయో, లెమన్‌ ట్రీలో సైతం 60 పడకలు ఏర్పాటు చేశారు. ఓయోలో ఒక్క పాజిటివ్‌ వ్యక్తికి సింగిల్‌ రూంకు రూ.1200లు, లెమన్‌ ట్రీలో రూ.3,200లు చార్జి చేస్తున్నారు. అంతేకాక ఇరవై నాలుగు గంటల పాటు వైద్య సదుపాయం కల్పిస్తున్నారు. ఎమర్జెన్సీ అయితే అపోలో జాయిన్‌ చేసేలా ఆ యాజమాన్యంతో ఒప్పందం చేసుకున్నారు.

హోటల్‌లో 14 రోజులు క్వారంటైన్‌ అయ్యా

నా స్నేహితుడికి కరోనా పాజిటివ్‌ వచ్చింది. నేను అతడితో సన్నిహితంగా ఉన్నా. ఎలాంటి లక్షణాలు లేవు. టెస్ట్‌కు పోతే నెగిటివ్‌ వచ్చింది. కానీ ఎందుకైనా మంచిదని హోటల్‌లో క్వారంటైన్‌ అయ్యా. 14 రోజులు ఇంటికి వెళ్లలేదు. మరోసారి టెస్ట్‌ చేయించుకుని ఇంటికి వెళ్లా. హోటల్‌లో క్వారంటైన్‌ సేవలు బాగున్నాయి. – శ్రీధర్‌

‘జైన్‌ ఇంటర్నేషనల్‌’ఆధ్వర్యంలో కొవిడ్‌ సెంటర్‌ 100 బెడ్లతో లెమన్‌ట్రీలో ఏర్పాటు

• కొవిడ్‌ బారిన పడి ఐసొలేషన్‌లో ఉండాల్సిన రోగుల కోసం జైన్‌ ఇంటర్నేషనల్‌ ట్రేడ్‌ ఆర్గనైజేషన్‌(జీతో) కొవిడ్‌ సెంటర్‌ను ఏర్పాటు చేసింది.
• బంజారాహిల్స్‌ రోడ్‌ నం.1లోని లెమన్‌ ట్రీ హోటల్‌తో భాగస్వామ్యమై ఈ కేంద్రాన్ని నెలకొల్పింది.
• శుక్రవారం లెమన్‌ ట్రీలో ఏర్పాటు చేసిన విలేకరుల సమావేశంలో జీతో సంస్థ అధ్యక్షుడు కుషాల్‌ కాంకరియా, ముఖ్య కార్యదర్శి మహేశ్‌ గోలెచ్చా కొవిడ్‌ సెంటర్‌ వివరాలను వెల్లడించారు.
• హోం ఐసొలేషన్‌లో ఉండలేని పాజిటివ్‌ రోగుల కోసం 100 బెడ్లతో ఐసొలేషన్‌ కేంద్రం ఏర్పాటు చేశామని తెలిపారు.
• అన్ని వసతుల కల్పనతో పాటు రోగులను వారం రోజుల పాటు వైద్యుల పర్యవేక్షణలో ఉంచుతామన్నారు.
• మహావీర్‌ ఆస్పత్రి సహకారంతో ఈ సెంటర్‌ను ఏర్పాటు చేశామని వివరించారు.
• వారం రోజుల ప్యాకేజీకి రూ.40 వేలు, ట్విన్‌ షేరింగ్‌ రూమ్‌కు రూ.30 వేలుగా నిర్ణయించామన్నారు.
• అత్యవసర పరిస్థితుల్లో రోగికి కావాల్సిన ఆక్సిజన్‌, అంబులెన్స్‌ సౌకర్యం కల్పిస్తామని అన్నారు.
• గత ఏడాది కరోనా తొలిదశలో తమ సంస్థ ఆధ్వర్యంలో సికింద్రాబాద్‌లోని ఫెర్న్‌ హోటల్‌లో ఐసోలేషన్‌ సెంటర్‌ను ఏర్పాటు చేసి 500 మందికి చికిత్స అందించామన్నారు.
• సమావేశంలో జీతో కోశాధికారి బీఎల్‌.భండారి, మహావీర్‌ ఆస్పత్రి చైర్మన్‌ మహేంద్ర రాంకా, డాక్టర్‌ రాంబాబు, డాక్టర్‌ శంకర్‌, డాక్టర్‌ బల్వంత్‌ తదితరులు పాల్గొన్నారు.