రూ.10కే వైద్యం

October 31, 2021 / 04:30 AM IST

నేరేడ్‌మెట్‌ అంబేద్కర్‌ భవన్‌లో పేదలకు చికిత్స

మల్కాజిగిరి, అక్టోబర్‌ 30:తలనొప్పి, జ్వరం.. ఇలా ఏ చిన్న అస్వస్థత వచ్చినా గల్లీలోని ఏ చిన్న డాక్టర్‌ వద్దకు వెళ్లాలన్నా వంద రూపాయలు ఉండాల్సిందే. సూది ఇచ్చినా.. గోలి ఇచ్చినా.. కనీసం వంద రూపాయలు తీసుకుంటున్నారు వైద్యులు. కానీ నేరెడ్‌మెట్‌ అంబేద్కర్‌ భవన్‌లో పది రూపాయలకే చికిత్స లభిస్తున్నది. పేద ప్రజల సౌకర్యార్థం ఎస్సీ రైట్స్‌ ప్రొటెక్షన్‌ సొసైటీ నేరెడ్‌మెట్‌ అంబేద్కర్‌ భవన్‌లో రూ.10కే చిక్సితను అందుబాటులోకి తీసుకొచ్చింది. గోపాల్‌యాదవ్‌, హరికృష్ణ యాదవ్‌ సహకారంతో డాక్టర్‌ గౌరీ శంకర్‌, డాక్టర్‌ మధుకర్‌ ఉదయం 8 నుంచి 12 గంటల వరకు.. సాయంత్రం 5 నుంచి 8 గంటల వరకు చికిత్స చేస్తున్నారు. అత్యవసర కేసులను మల్కాజిగిరి జిల్లా దవాఖాన, గాంధీ దవాఖానకు పంపిస్తున్నారు. ప్రతి రోజూ దాదాపు 50 నుంచి 80 మంది చికిత్స పొందుతున్నారు.
(బండారి జార్జీ విల్సన్‌)

సొసైటీ నిర్ణయాన్ని స్వాగతిస్తున్నాం..
కరోనా సమయంలో ఇంటి నుంచి బయటకు కాలు పెట్టలేక భయంతో ఇబ్బందులు పడ్డాం. అలాంట పరిస్థితుల్లో పేద ప్రజలకు రూ.10కే చికిత్స చేయడం హర్షణీయం. అంబేద్కర్‌ భవన్‌లో వైద్య సేవలు అందజేయాలని సొసైటీ సభ్యుల నిర్ణయాన్ని స్వాగతిస్తున్నాం.

స్నేహలత, న్యూ విద్యానగర్‌

వైద్యులకు రుణపడి ఉంటాం
అంబేద్కర్‌ భవన్‌లో రూ.10కే చికిత్సలు చేయడానికి ముందుకు వచ్చిన డాక్టర్లకు స్థానికులు రుణపడి ఉంటారు. వినాయక్‌నగర్‌ బస్తీ, నేరేడ్‌మెట్‌, కేశవనగర్‌, కాకతీయనగర్‌, వినోభానగర్‌, దినకర్‌నగర్‌ తదితర ప్రాంతాలను నుంచి అనారోగ్యంతో బాధపడుతున్న వారు వచ్చి చికిత్స పొందుతున్నారు. వారికి కావాల్సిన మౌలిక సదుపాయాలు కల్పించాం.