ఉపాధికి పెద్దపీట వేయాలి

• ఆర్థికమంత్రికి ఆర్బీఐ మాజీ గవర్నర్‌ దువ్వూరి సూచన

న్యూఢిల్లీ, జనవరి 27: ఆర్థిక వ్యవస్థలో పెరుగుతున్న అసమానతల్ని తగ్గించడం, కొత్త ఉద్యోగాల్ని సృష్టించడంపైనే వచ్చే కేంద్ర బడ్జెట్‌ దృష్టిపెట్టాలని రిజర్వ్‌బ్యాంక్‌ మాజీ గవర్నర్‌ దువ్వూరి సుబ్బారావు సూచించారు. ‘ప్రతీ బడ్జెట్‌కూ వృద్ధిని పెంచడమే లక్ష్యంగా ఉంటుంది. అలాగే ఇది (2022-23 బడ్జెట్‌) కూడా ఉండాలి. కానీ ఆర్థిక అసమానతల్ని తగ్గించే ప్రతిపాదనలపై ఇందులో ప్రత్యేక దృష్టిపెట్టాలి’ అంటూ సుబ్బారావు వ్యాఖ్యానించారు. కేంద్ర ఆర్థిక మంత్రి నిర్మలా సీతారామన్‌ ఫిబ్రవరి 1న పార్లమెంటుకు బడ్జెట్‌ ప్రతిపాదనల్ని సమర్పించనున్న నేపథ్యంలో సుబ్బారావు ఈ వ్యాఖ్యలు చేశారు. వివరాలివీ..

• కొవిడ్‌-19 తీవ్రత..దిగువ ఆదాయ వర్గాలను సంక్షోభంలోకి నెట్టేసింది. అధికాదాయ వర్గాలు వారి ఆదాయాన్ని కాపాడుకోవడమే కాకుండా సంపదను, పొదుపును పెంచుకున్నాయి. తాజా ప్రపంచ అసమానత్వ నివేదిక ప్రకారం అధిక అసమానతలు భారత్‌లోనే ఏర్పడ్డాయి. ఇంతటి అసమానత్వం నైతిక తప్పిదమే కాకుండా, రాజకీయ విధ్వంసం కూడా. దీంతో మన దీర్ఘకాలిక వృద్ధి అవకాశాలు దెబ్బతింటాయ్‌.
• మనకు ఉపాధితో కూడిన వృద్ధి కావాలి. బడ్జెట్‌కు థీమ్‌ ఏదైనా ఉంటే..అది ఉద్యోగ కల్పనే కావాలి.
• విద్య, ఆరోగ్యం, మౌలిక సదుపాయాలపై వ్యయాల్ని పెంచాల్సిన అవసరం ఉన్నందున, పన్నులు తగ్గించే అవకాశం పెద్దగా లేదు.
• నాకున్న అనుభవం ప్రకారం టారిఫ్‌ లను తగ్గించాల్సిన అవసరం ఉంది.
• నిర్వహణాపరమైన సంస్కరణల్ని ప్రవేశపెట్టి ఈజ్‌ ఆఫ్‌ డూయింగ్‌ బిజినెస్‌ను మెరుగుపర్చాలి. దీంతో పెట్టుబడులు పెరుగుతాయి.
• గత బడ్జెట్‌ లక్ష్యంకంటే పన్ను వసూళ్లు పెరిగినట్లు మీడియా వార్తలతో తెలుస్తున్నది. అయితే డిజిన్వెస్ట్‌మెంట్‌ వసూళ్లు తగ్గడం, ఆహార, ఎరువుల సబ్సిడీలపై వ్యయాలు పెరగడంతో ద్రవ్యలోటు నికరంగా తగ్గబోదు.