అహ్మదాబాద్ : మాజీ గర్ల్ ఫ్రెండ్ పేరుతో నకిలీ ఇన్ స్టా గ్రామ్ ఖాతాలు తెరిచి వేధింపులకు గురిచేసిన యువకుడిని (24) గుజరాత్ పోలీసులు అరెస్ట్ చేశారు. పోలీసులు తెలిపిన వివరాల ప్రకారం మహిసాగర్ కు చెందిన నిందితుడు వీర్ సింహ్ దమర్, బాధిత యువతితో సహజీవనం చేస్తూ ఆ తర్వాత విడిపోయారు. ఆపై యువతికి మరొకరితో నిశ్చితార్ధం జరిగింది.
దీంతో కోపం పెంచుకున్న దమర్ ఎలాగైనా సంబంధం చెడగొట్టాలని యువతి పేరుతో నకిలీ ఇన్ స్టా గ్రామ్ ప్రొఫైల్స్ తెరిచాడు. గత ఐదు నెలలుగా ఆమెను ఫోన్ లో వేధించడం, అభ్యంతరకర ఫోటోలు పంపి విసిగించేవాడు. బాధితురాలి కాబోయే భర్తకు సైతం అభ్యంతరకర మెసేజ్ లు పంపాడు. దీంతో దమర్ ప్రవర్తనతో విసిగిన యువతి పోలీసులకు ఫిర్యాదు చేయడంతో నిందితుడిని అదుపులోకి తీసుకున్నారు.