రైతన్న మెడకు కాంగ్రెస్‌ ‘స్మార్ట్‌’ ఉరితాడు!

తెలంగాణ గడ్డపై మరోసారి విద్యుత్తు పోరాట మేఘాలు కమ్ముకుంటున్నాయి. నాడు బషీర్‌బాగ్‌లో గుర్రపు స్వారీలతో ప్రజల గొంతు నొక్కిన పాలకులు ఏమయ్యారో కాలం చెప్పింది. నేడు కేంద్రం తెచ్చిన రివాంప్డ్‌ డిస్ట్రిబ్యూషన్‌ సెక్టార్‌ స్కీమ్‌ (ఆర్డీఎస్‌ఎస్‌) ఒప్పందంపై ప్రజా ప్రభుత్వం అని చెప్పుకుంటున్న ప్రజా కంటక కాంగ్రెస్‌ ప్రభుత్వం సంతకం చేయడం తెలంగాణ ఆత్మగౌరవానికి, రైతుల ప్రయోజనాలకు గొడ్డలి పెట్టు.

తెలంగాణ గడ్డపై మరోసారి విద్యుత్తు పోరాట మేఘాలు కమ్ముకుంటున్నాయి. నాడు బషీర్‌బాగ్‌లో గుర్రపు స్వారీలతో ప్రజల గొంతు నొక్కిన పాలకులు ఏమయ్యారో కాలం చెప్పింది. నేడు కేంద్రం తెచ్చిన రివాంప్డ్‌ డిస్ట్రిబ్యూషన్‌ సెక్టార్‌ స్కీమ్‌ (ఆర్డీఎస్‌ఎస్‌) ఒప్పందంపై ప్రజా ప్రభుత్వం అని చెప్పుకుంటున్న ప్రజా కంటక కాంగ్రెస్‌ ప్రభుత్వం సంతకం చేయడం తెలంగాణ ఆత్మగౌరవానికి, రైతుల ప్రయోజనాలకు గొడ్డలి పెట్టు. ఇది కేవలం సాంకేతిక మార్పు కాదు.. సామాన్యుడి ఇంట్లో వెలుగును ఆర్పే, కార్పొరేట్‌ సంస్థల ఖజానా నింపే ఒక వ్యవస్థీకృత కుట్ర.

బీజేపీ నేతృత్వంలోని కేంద్ర ప్రభుత్వం ఎన్ని ఒత్తిళ్లు తెచ్చినా, రూ.30,000 కోట్ల నిధులు ఆశ చూపినా బీఆర్‌ఎస్‌ ప్రభుత్వం ఆర్డీఎస్‌ఎస్‌లో చేరడానికి నిరాకరించింది. వ్యవసాయ మోటార్లకు మీటర్లు పెట్టడం అంటే అది రైతు మెడకు ఉరితాడు అని కేసీఆర్‌ భావించారు. రాష్ట్ర ప్రయోజనాల కోసం కేంద్రంతో తలపడిన ఆనాటి వైఖరిని నేడు విస్మరించడం రేవంత్‌రెడ్డి సర్కార్‌ చేస్తున్న చారిత్రక తప్పిదం.
గణంకాలతో కూడిన చేదు నిజాలు:

స్మార్ట్‌ మీటర్ల భారం: సాధారణ మీటర్‌ ధర రూ.800 – రూ.1000 ఉంటే, స్మార్ట్‌ మీటర్‌ పేరుతో ఒక్కో వినియోగదారుడిపై రూ.7,000 నుంచి రూ.14,000 వరకు భారం మోపుతున్నారు. రాష్ట్రంలోని 1.78 కోట్ల కనెక్షన్లకు స్మార్ట్‌ మీటర్లు అంటే వేల కోట్ల రూపాయల ప్రజల సొమ్ము అదానీ, అంబానీ వంటి సంస్థల జేబుల్లోకి వెళ్తున్నది.

ప్రీపెయిడ్‌ సంకెళ్లు: ఫోన్‌ రీచార్జ్‌ లాగా విద్యుత్తు రీచార్జ్‌ చేసుకుంటేనే విద్యుత్తు దీపం వెలుగుతుంది. రీచార్జ్‌లో నిమిషం ఆలస్యమైనా పేదలు, మధ్యతరగతి ప్రజలు అంధకారంలో మగ్గాల్సిందే.

వ్యవసాయ రంగానికి ముప్పు: తెలంగాణలో సుమారు 29 లక్షల వ్యవసాయ కనెక్షన్లు ఉన్నాయి. మీటర్లు పెడితే వచ్చే 24 గంటల ఉచిత విద్యుత్తుకు గండి పడుతుంది. సబ్సిడీని నగదు బదిలీ (డీబీటీ) చేస్తామనడం కంటితుడుపు చర్యే. గ్యాస్‌ సబ్సిడీ లాగే ఇది కాలక్రమేణా మాయం కావడం ఖాయం.

ప్రజాప్రభుత్వం తీసుకొస్తామంటూ ఎన్నికల్లో ప్రచారం చేసి గెలిచిన కాంగ్రెస్‌ గెలిచిన తర్వాత ప్రజల ప్రాథమిక అవసరమైన విద్యుత్తును కార్పొరేట్లకు తాకట్టు పెట్టడం వల్ల ఆ పార్టీకి క్షేత్రస్థాయిలో తీవ్ర వ్యతిరేకత తప్పదు. కాంగ్రెస్‌ ఆరు గ్యారెంటీల్లో ఒకటైన గృహజ్యోతి (200 యూనిట్ల వరకు ఉచిత విద్యుత్తు) పథకానికి కూడా ఈ స్మార్ట్‌ మీటర్ల ‘సర్వీస్‌ ఛార్జీలు’ తూట్లు పొడుస్తాయి.

హెచ్చరిక: తెలంగాణ ప్రజలు చైతన్యవంతులు. విద్యుత్తు బిల్లులు ఆందోళనలకు దారి తీస్తే, అది కాంగ్రెస్‌ సర్కార్‌ పతనానికి దారితీస్తుంది. ఇది కేవలం ఒక విధానం కాదు, ఒక జనచైతన్య ఉద్యమానికి పునాది. కాంగ్రెస్‌ సర్కార్‌ తెస్తున్న స్మార్ట్‌ సంస్కరణలు రైతుల పొలాల్లో చిచ్చు పెడితే, అదే చిచ్చు అధికార అహంకారాన్ని దహించక మానదు. ఇదే విషయాన్ని పాలకులు గుర్తుంచుకోవాలి..

హితవు: రాష్ట్ర ప్రభుత్వం తక్షణమే ఆర్డీఎస్‌ఎస్‌ ఒప్పందం నుంచి తప్పుకోవాలి. మౌలిక సదుపాయాల మెరుగుదల పేరుతో ప్రజల రక్తం పిండటం మానుకోవాలి. లేనిపక్షంలో, తెలంగాణ మరోసారి విద్యుత్తు ఉద్యమానికి వేదిక కావడం ఖాయం.