తగ్గనున్న కార్పొరేట్ల లాభాలు

• పెరిగిన తయారీ ఖర్చుల నేపథ్యంలో క్రిసిల్‌ అంచనా

ముంబై, ఏప్రిల్‌ 11: కంపెనీల లాభాలు తగ్గిపోయే అవకాశాలున్నాయని రేటింగ్‌ ఏజెన్సీ క్రిసిల్‌ సోమవారం అంచనా వేసింది. గత ఆర్థిక సంవత్సరం (2021-22) చివరి త్రైమాసికానికి (జనవరి-మార్చి)గాను ప్రధాన కార్పొరేట్‌ సంస్థలు ఆర్థిక ఫలితాల వెల్లడికి సిద్ధమవుతున్న తరుణంలో ఇది ప్రాధాన్యతను సంతరించుకున్నది. అంతకుముందు త్రైమాసికం అక్టోబర్‌-డిసెంబర్‌ తో పోల్చితే 0.6 శాతం వరకు, ఆపై ఆర్థిక సంవత్సరం (2020-21) జనవరి-మార్చితో పోల్చితే 3 శాతం మేరకు ఆయా సంస్థల నిర్వహణ లాభాలు పడిపోయే వీలుందని తాజా నివేదికలో క్రిసిల్‌ పేర్కొన్నది. గడిచిన మూడు ఆర్థిక సంవత్సరాల్లో త్రైమాసిక లాభాల్లో క్షీణత కనిపించడం ఇది రెండోసారి కానున్నదని చెప్పింది.

పెరిగిన ఉత్పాదక వ్యయం

ఉత్పాదక వ్యయం పెరిగిందని, అయినప్పటికీ కొనుగోలుదారులపై ఆ భారాన్ని మోపేందుకు కంపెనీలు సిద్ధంగా లేవని క్రిసిల్‌ చెప్తున్నది. ఈ క్రమంలోనే లాభాలు పడిపోవచ్చనే అభిప్రాయాన్ని వ్యక్తం చేసింది. ఇక 2021-22 మొత్తంగా వడ్డీ, పన్నులు, తరుగుదల, రుణాల చెల్లింపులకు మునుపు లాభాలు (ఈబీఐటీడీఏ) 0.4 శాతం వరకు క్షీణించవచ్చని క్రిసిల్‌ డైరెక్టర్‌ హీటల్‌ గాంధీ చెప్పారు. రష్యా-ఉక్రెయిన్‌ యుద్ధం కూడా అన్ని రంగాల్లోని వస్తూత్పత్తుల ధరలను అమాంతం పెంచేసిందన్నారు. ఈ ప్రభావంతో ఈ ఆర్థిక సంవత్సరం (2022-23) కూడా 1 శాతం లాభాలు తగ్గవచ్చన్నారు.