ఆజాద్‌ జయంతిని జరిపే హక్కులేదు

అబుల్‌ కలాం ఆజాద్‌ జయంతి వేడుకలను గానీ, మైనారిటీ సంక్షేమ దినోత్సవాన్ని గానీ నిర్వహించే నైతిక హకు లేదని కాంగ్రెస్‌ సర్కార్‌కు లేదని బీఆర్‌ఎస్‌ మైనారిటీ సెల్‌ ప్రధాన కార్యదర్శి అబ్దుల్‌ ముకీత్‌ చందా స్పష్టంచేశారు.

• మైనారిటీల హామీలను విస్మరించిన సర్కార్‌
• విద్యకు దూరమవుతున్న మైనారిటీ విద్యార్థులు
• బీఆర్‌ఎస్‌ పార్టీ మైనారిటీ సెల్‌ ప్రధాన కార్యదర్శి అబ్దుల్‌ ముకీత్‌ చందా ఫైర్‌

హైదరాబాద్‌, నవంబర్‌ 11 (నమస్తే తెలంగాణ) : అబుల్‌ కలాం ఆజాద్‌ జయంతి వేడుకలను గానీ, మైనారిటీ సంక్షేమ దినోత్సవాన్ని గానీ నిర్వహించే నైతిక హక్కు లేదని కాంగ్రెస్‌ సర్కార్‌కు లేదని బీఆర్‌ఎస్‌ మైనారిటీ సెల్‌ ప్రధాన కార్యదర్శి అబ్దుల్‌ ముకీత్‌ చందా స్పష్టంచేశారు. ఎన్నికల సమయంలో ఇచ్చిన ‘అబ్దుల్‌ కలాం తుహఫా-ఎ-తాలీమ్‌’ పథకాన్ని అమ లు చేయకుండా మైనారిటీవిద్యార్థులను కాంగ్రెస్‌ ప్రభుత్వం వంచించిందని బుధవారం ఒక ప్రకటనలో ఆరోపించారు. అసెంబ్లీ ఎన్నికల వేళ మైనారిటీ డిక్లరేషన్‌లో భాగంగా పదో తరగతి పాసైన విద్యార్థులకు రూ.10వేలు , ఇంటర్‌ రూ.15వేలు , డిగ్రీ రూ.25వేలు , పీజీ రూ.లక్ష, ఎంఫిల్‌ లేదా పీహెచ్‌డీ చేసేవారికి రూ.5 లక్షల ఆర్థికసాయం అందిస్తామని ఆర్భాటంగా కాంగ్రెస్‌ నేతలు ప్రకటించారని గుర్తుచేశారు.

ముస్లిం మైనార్టీల ఓట్లతో అధికార పీఠం దకించుకున్న కాంగ్రెస్‌ పార్టీ.. అధికారంలోకి వచ్చాక ఆ హామీలను పూర్తిగా గాలికొదిలి మైనారిటీ లను దారుణంగా మోసం చేసిందని విమర్శించారు. ప్రభుత్వం స్కాలర్‌షిప్పులు, ఫీజు రీయింబర్స్‌మెంట్‌ ఇవ్వకపోవడంతో ఎందరో మైనార్టీ విద్యార్థులు ఉన్నత విద్యకు దూరమవుతున్నారని ఆందోళన వ్యక్తంచేశారు. గత బీఆర్‌ఎస్‌ ప్రభుత్వ హయాంలో మైనారిటీ రెసిడెన్షియల్‌ పాఠశాలల ద్వారా దాదాపు 1.25 లక్షల మంది విద్యార్థులు నాణ్యమైన విద్యను పొందగా, కాంగ్రెస్‌ ప్రభుత్వ నిర్లక్ష్యం వల్ల ఆ సంఖ్య 85 వేలకు పడిపోయిందని ఆరోపించారు. నిరుద్యోగ మైనారిటీ యువత, మహిళల స్వయం ఉపాధి కోసం ఏటా రూ.1,000 కోట్ల సబ్సిడీ రుణాలు ఇస్తామన్న హామీని కాంగ్రెస్‌ తుంగలో తొక్కిందని, ఉర్దూ మాధ్యమ ఉపాధ్యాయుల భర్తీకి ప్రత్యేక డీఎస్సీ నిర్వహిస్తామన్న మాటను కూడా నిలబెట్టుకోలేదని దుయ్యబట్టారు. ఇప్పటికైనా ఎన్నికల హామీలను నెరవేర్చాలని డిమాండ్‌ చేశారు.