ఇంటర్‌ విద్య రద్దు
రాష్ట్రంలో ఇంటర్‌ విద్యను ప్రభుత్వం రద్దుచేసింది. దీనిని పాఠశాల విద్యలో విలీనం చేసేందుకు గ్రీన్‌సిగ్నల్‌ ఇచ్చింది. ఈ మేరకు 2027-28 విద్యా సంవత్సరం నుంచి కొత్త విద్యావిధానం అమల్లోకి వస్తుందని సీఎం రేవంత్‌రెడ్డి బుధవారం ప్రకటించారు. ఎంసీఆర్‌హెచ్చార్డీలో విద్యాశాఖపై ఉన్నతస్థాయి సమీక్ష నిర్వహించిన సీఎం.. వచ్చే విద్యాసంవత్సరం నుంచి 12వ తరగతి విద్యావిధానాన్ని అమలు చేయాలని అధికారులను ఆదేశించారు.
- పాఠశాల విద్యలో విలీనం.. వచ్చే విద్యాసంవత్సరం నుంచే అమలు
- రాష్ట్రంలో కొత్తగా 7+4+ 4 విద్యా విధానం
- ఆగమేఘాలపై రేవంత్‌రెడ్డి ప్రభుత్వం నిర్ణయం
- అధ్యయనం, చర్చ లేకుండా.. పర్యవసానాలు
- ఆలోచించకుండా నిర్ణయించడంపై విమర్శలు
- పీవీపై అక్కసుతోనే నిర్ణయమన్న ఇంటర్‌ జేఏసీ
- బోర్డుల విలీనంపైనా చట్టసవరణ తప్పనిసరి!
హైదరాబాద్‌, నవంబర్‌ 11 (నమస్తే తెలంగాణ): రాష్ట్రంలో ఇంటర్‌ విద్యను ప్రభుత్వం రద్దుచేసింది. దీనిని పాఠశాల విద్యలో విలీనం చేసేందుకు గ్రీన్‌సిగ్నల్‌ ఇచ్చింది. ఈ మేరకు 2027-28 విద్యా సంవత్సరం నుంచి కొత్త విద్యావిధానం అమల్లోకి వస్తుందని సీఎం రేవంత్‌రెడ్డి బుధవారం ప్రకటించారు. ఎంసీఆర్‌హెచ్చార్డీలో విద్యాశాఖపై ఉన్నతస్థాయి సమీక్ష నిర్వహించిన సీఎం.. వచ్చే విద్యాసంవత్సరం నుంచి 12వ తరగతి విద్యావిధానాన్ని అమలు చేయాలని అధికారులను ఆదేశించారు.
పదో తరగతి తర్వాత సగటున 40 శాతం చదువు మానేస్తున్నారని.. దీంట్లో అత్యధికులు బాలికలు, దళిత, మైనారిటీ వర్గాల పిల్లలే ఉన్నారని పేర్కొన్నారు. కేంద్రీయ విద్యాలయాలు, నవోదయ, కేజీబీవీల్లో డ్రాపౌట్లు తక్కువగా ఉన్నాయని తెలిపారు. దేశంలో 18 రాష్ర్టాల్లో 12వ తరగతి విద్యావిధానమే అమలవుతున్నదని చెప్పారు. ఉద్యోగులకు ఎలాంటి ఇబ్బందులు రాకుండా చూస్తామని హామీ ఇచ్చారు.
ప్రభుత్వ సలహాదారులు కేశవరావు, పీ సుదర్శన్‌రెడ్డి, ఎంపీ వేం నరేందర్‌రెడ్డి, సీఎస్‌ సంజయ్‌ జాజు, విద్యాశాఖ కార్యదర్శి డాక్టర్‌ యోగితారాణా, ఇంటర్‌బోర్డు డైరెక్టర్‌ అభిలాష అభినవ్‌, పాఠశాల విద్యాశాఖ డైరెక్టర్‌ నవీన్‌ నికోలస్‌, ఉన్నత విద్యామండలి చైర్మన్‌ వీ బాలకిష్టారెడ్డి, ఓయూ వీసీ ప్రొఫెసర్‌ కుమార్‌, బీఆర్‌ఏవోయూ వీసీ ప్రొఫెసర్‌ ఘంటా చక్రపాణి, టీజీఈడబ్ల్యూఐడీసీ ఎండీ గణపతిరెడ్డి తదితరులు ఈ సమావేశంలో పాల్గొన్నారు.
అయితే సర్కార్‌ తీసుకున్న ఈ నిర్ణయం కలకలం రేపుతున్నది. ప్రభుత్వం హడావుడిగా నిర్ణయం తీసుకోవడంపై తీవ్ర అభ్యంతరాలు వ్యక్తమవుతున్నాయి. ప్రభుత్వ నిర్ణయంపై విద్యారంగ నిపుణులు, అధ్యాపక ఉపాధ్యాయ సంఘాల్లో చర్చోపచర్చలు నడుస్తున్నాయి. ఇక సర్కార్‌ నిర్ణయాన్ని ఇంటర్‌ విద్యా జేఏసీ తీవ్రంగా వ్యతిరేకించింది. సీపీఐ కూడా ఈ నిర్ణయాన్ని తప్పుబట్టింది. పాఠశాల విద్యపై హడావుడి నిర్ణయాలు వద్దని, అన్ని వర్గాలతో సమగ్రంగా చర్చించిన తర్వాతే నిర్ణయం తీసుకోవాలని సర్కార్‌కు సూచించింది.
కొత్తగా 7+4+4 విద్యావిధానం
రాష్ట్రంలో కొత్తగా 7+4+4 విద్యావిధానం అమల్లోకి రానున్నది. కొత్త విధానంతో రాష్ట్రంలో విద్యావ్యవస్థ మారుతుంది. ఏడేండ్ల ప్రాథమిక, నాలుగేండ్ల సెకండరీ, నాలుగేండ్ల సీనియర్‌ సెకండరీ విధానం అమల్లోకి వస్తుంది. నర్సరీ నుంచి నాలుగో తరగతి వరకు ప్రాథమిక విద్యగా పరిగణిస్తారు. 5వ తరగతి నుంచి 8వ తరగతి వరకు సెకండరీ విద్యగా లెక్కిస్తారు. 9వ తరగతి నుంచి 12వ తరగతి వరకు సీనియర్‌ సెకండరీ విధానంగా అమలు చేయాలని ప్రభుత్వం నిర్ణయించింది. ఇప్పటివరకు రాష్ట్రంలో నర్సరీ, ఎల్‌కేజీ, యూకేజీలను ప్రీ ప్రైమరీగా, ఒకటి నుంచి 5 తరగతి వరకు ప్రాథమిక, 6-10 తరగతుల వరకు సెకండరీ, 11, 12 తరగతులకు సీనియర్‌ సెకండరీ (ఇంటర్‌)గా పరిగణిస్తున్నారు.
చట్ట సవరణ చేయాల్సిందే..
కొత్త విద్యావిధానం అమలు, బోర్డుల విలీనానికి చట్ట సవరణ చేయాల్సి ఉంటుంది. ఇంటర్మీడియట్‌ ఎడ్యుకేషన్‌ యాక్ట్‌ (యాక్ట్‌-2) 1971ని రద్దుచేయాల్సి ఉంటుంది. విలీనానికి పచ్చజెండా ఊపుతూ ఎడ్యుకేషన్‌ యాక్ట్‌-1982ను సవరించాల్సి ఉంటుంది. అసెంబ్లీలో చట్ట సవరణ చేయాల్సి ఉంటుంది. ఇంటర్‌బోర్డును ప్రభుత్వ పరీక్షల విభాగంలో, ఇంటర్‌ విద్యాశాఖను పాఠశాల విద్యాశాఖలో విలీనం చేయాలి. కొత్తగా ఏర్పాటయ్యే శాఖకు ఏ పేరు పెడుతారన్న ప్రశ్నలు ఉత్పన్నమవుతున్నాయి. పాఠశాల విద్యలో అంతర్భాగంగా ఉన్న జిల్లా పరిషత్‌ స్కూళ్లు, ప్రభుత్వ పాఠశాలల్లో పనిచేసే టీచర్ల ఏకీకృత సర్వీస్‌ రూల్స్‌ అమలు చేయడమే సాధ్యం కావడం లేదు. ఒక యాజమాన్యం కింద అప్పాయింట్‌మెంట్‌ అయిన వ్యక్తిని మరో యాజమాన్యం కిందికి మార్చితే సర్వీసు, సీనియారిటీ వంటి అనేక సమస్యలు తలెత్తే అవకాశం ఉన్నది. నూతన విద్యావిధానంపై అధ్యాపకులు, విద్యార్థులు, విద్యాసంస్థలు పూర్తిగా సన్నద్ధమేనా? అన్న ప్రశ్నలు తలెత్తుతున్నాయి. ఇప్పటికిప్పుడు మార్పు సాధ్యమేనా? అన్నది సందేహాలు కలుగుతున్నాయి.
అనుమానాలు ఇవే..
- ఇప్పుడు ఇంటర్‌ ఫస్టియర్‌లో ఉన్న విద్యార్థులు వచ్చే ఏడాది సెకండియర్‌లోకి వస్తా రు. వచ్చే ఏడాది బోర్డును రద్దుచేస్తే వీరి భవిష్యత్తు ప్రశ్నార్థకంగా మారనున్నది. వీరికి ఇంటర్‌బోర్డు పేరిట సర్టిఫికెట్లు ఇస్తారా? లేక కొత్తగా ఏర్పడే బోర్డు నుంచి ఇస్తారా? అన్నది తేలాల్సి ఉన్నది.
- రాష్ట్రంలో పాఠశాలలకు పదేండ్లకోసారి విద్యాశాఖ అనుమతులిస్తున్నది. ఇంటర్‌లో ఏడాదికోసారి అనుబంధ గుర్తింపునిస్తున్నా రు. ఉన్న పళంగా ఒకేసారి కొత్త విధానంలోకి మారాలంటే గుర్తింపు పొందడంలో విద్యాసంస్థలకు ఇబ్బందులు తప్పవు.
- ఇంటర్‌ విద్య, పాఠశాల విద్యను విలీనం చేస్తే కొత్తగా ఏర్పాటయ్యే విభాగానికి ఏం పేరు పెడుతారన్న స్పష్టత కొరవడింది.
- మండలానికి ఒకటి చేస్తారా? లేక జిల్లాకు ఒకటి చేస్తారా? కేవలం టీపీఎస్‌లకే పరిమితం చేస్తారో తెలియదు.
- రాష్ట్రంలో ఒక విద్యాసంస్థలో గల సగటు విద్యార్థుల సంఖ్య 39 మాత్రమే. ఇక ప్రభుత్వ జూనియర్‌ కాలేజీల్లో చేరుతున్న విద్యార్థుల సంఖ్య 23 శాతమే. ఇప్పటికే విద్యార్థుల్లేక ఆయా సంస్థలు సతమతమవుతున్నాయి. కొత్తగా ఇంటర్‌ విద్యను ప్రారంభించే విద్యాసంస్థలో చేరే విద్యార్థులెవరు? ఎక్కడి నుంచి వస్తారు?
- గరిష్ఠంగా మూడేండ్ల టైమ్‌ ఇవ్వాలి. విద్యాసంస్థలకు ఆప్షన్‌ ఇవ్వాలని విద్యాసంస్థల యాజమాన్యాలు డిమాండ్‌చేస్తున్నాయి.
Editorial Collage On Educat
సీఎం రేవంత్‌ నిర్ణయాలతో విద్యావ్యవస్థకు తీవ్ర నష్టం: టీఎస్పీటీఏ
హైదరాబాద్‌, నవంబర్‌ 11 (నమస్తే తెలంగాణ): సీఎం నిర్ణయాలు విద్యావ్యవస్థకు తీవ్ర నష్టం కలిగిస్తున్నాయని తెలంగాణ స్టేట్‌ ప్రైమరీ టీచర్స్‌ అసోసియేషన్‌(టీఎస్పీటీఏ) రాష్ట్ర అధ్యక్షుడు సయ్యద్‌ షౌకత్‌ అలీ, ప్రధాన కార్యదర్శి ఆర్‌ రోహిత్‌నాయక్‌ ఆందోళన వ్యక్తం చేశారు. బుధవారం వారు విలేకరులతో మాట్లాడుతూ విద్యావ్యవస్థలో నూతన విధానాల అమలుపై ఉపాధ్యాయ సంఘాలు, విద్యావేత్తలతో కనీస సంప్రదింపులు జరుపకుండా ఏకపక్షంగా వ్యవహరిస్తున్నారని మండిపడ్డారు. ప్రభుత్వం ఏర్పడినప్పటి నుంచి నేటివరకు విద్యాశాఖ మంత్రి హోదాలో సీఎం ఒకసారి కూడా ఉపాధ్యాయ సంఘాలతో సమీక్ష నిర్వహించకపోవడం శోచనీయమని అన్నారు.
అరకొర టీచర్లతో నెట్టుకొస్తున్న పాఠశాలల్లో విద్యాబోధనను మెరుగుపరచడం విస్మరించి, వెయ్యికిపైగా ప్రాథమిక పాఠశాలల్లో ప్రీప్రైమరీ తరగతులు, బ్రేక్‌ఫాస్ట్‌ పథకం, ఆన్‌లైన్‌ యాప్‌ల నిర్వహణ లాంటి అదనపు పనులను రుద్దడం ఉపాధ్యాయులకు పెనుభారంగా మారిందని, ఫలితంగా పాఠశాలల్లో అసలైన విద్యాబోధన కుంటుపడుతున్నదని ఆవేదన వ్యక్తంచేశారు. ఉపాధ్యాయులపై మోపిన బోధనేతర పనుల భారాన్ని పూర్తిగా తొలగించి, వారిని బోధనకే పరిమితం చేయాలని డిమాండ్‌ చేశారు. విద్యా ప్రమాణాలు పెంచేందుకు ప్రతి ప్రాథమిక పాఠశాలలో కనీసం ముగ్గురు ఉపాధ్యాయులను నియమించాలని కోరారు.
పీవీపై అక్కసుతోనే రద్దు
మాజీ ప్రధాని దివంగత పీవీ నర్సింహారావు మానసపుత్రిక ఇంటర్‌ విద్య. 1969-70 సంవత్సరంలో కోఠారి కమిషన్‌ సిఫార్సులతో ఇంటర్‌ విద్య పురుడు పోసుకున్నది. ఇలాంటి విద్యావ్యవస్థను చిదిమేయడం దురదృష్టకరం. పీవీ నర్సింహారావు మీదున్న అక్కసుతోనే ఆయన ఆనవాళ్లను చెరిపేయడం దౌర్భాగ్యం. కర్ణాటక రాష్ట్రంలోనూ 10+2+3 విద్యావిధానం అమలవుతున్న నగ్నసత్యాన్ని సీఎం రేవంత్‌రెడ్డి గుర్తుంచుకోవాలి. ఈ నిర్ణయాన్ని ప్రభుత్వం తక్షణమే ఉపసంహరించుకోవాలి. లేదంటే ఐక్య ఉద్యమానికి శ్రీకారం చుడుతాం.
-పీ మధుసూదన్‌రెడ్డి, ఇంటర్‌ విద్యా జేఏసీ చైర్మన్‌
ఏకపక్ష నిర్ణయాలొద్దు
తెలంగాణలో దశాబ్దాలుగా కొనసాగుతున్న ఇంటర్‌ విద్యా విధానాన్ని రద్దు చేసి, పాఠశాల విద్యలో విలీనం చేస్తామని సీఎం రేవంత్‌రెడ్డి ప్రకటించడం హడావుడి నిర్ణయమే. విద్యారంగ నిపుణులు, ఉపాధ్యాయ సంఘాలు, విద్యార్థి సంఘాలు, ప్రతిపక్షాలతో విస్తృత స్థాయి సమావేశం ఏర్పాటు చేయకుండా ఎలాంటి ఏకపక్ష నిర్ణయాలు తీసుకోవద్దు. అధ్యయనం లేకుండా కాంగ్రెస్‌ ప్రభుత్వం తీసుకుంటున్న ఇటువంటి హడావుడి నిర్ణయాలు లక్షలాది మంది విద్యార్థుల భవిష్యత్తును అంధకారంలోకి నెట్టేలా ఉన్నాయి. ప్రభుత్వ, ప్రైవేట్‌ జూనియర్‌ కళాశాలల్లో పనిచేస్తున్న వేలాది మంది అధ్యాపకులు, సిబ్బంది ఉద్యోగ భద్రతపై ప్రభుత్వం స్పష్టత ఇవ్వకపోవడం బాధ్యతారాహిత్యం. ఇంటర్మీడియట్‌ రద్దు యోచనను ప్రభుత్వం వెంటనే విరమించుకోవాలి. ప్రభుత్వ కళాశాలల్లో సౌకర్యాలు పెంచడంపై దృష్టి సారించాలి.
– శ్రీనివాసరావు, సీపీఐ రాష్ట్ర సహాయ కార్యదర్శి
Read Today's Latest Telangana News in Telugu and Telugu News
- Follow Us :
-
