రాకాసి యుద్ధ విమానం.. అమెరికా బీ-2 బాంబర్‌ ప్రత్యేకతలెన్నో

ఇరాన్‌లోని ఫోర్డో అణు కేంద్రాన్ని ధ్వంసం చేయడానికి అమెరికా బీ-2 స్పిరిట్‌ బాంబర్‌ యుద్ధ విమానాన్ని వినియోగించింది. నిర్ణీత లక్ష్యాలను తుత్తునియలు చేయడంలో 100 శాతం సక్సెస్‌ రేటు కలిగిన ఈ యుద్ధ విమానం ప్రపంచంలోనే అత్యంత ఖరీదైనది కూడా.

• ప్రపంచంలోనే అత్యంత ఖరీదైనది

(స్పెషల్‌ టాస్క్‌ బ్యూరో) హైదరాబాద్‌, జూన్‌ 23 (నమస్తే తెలంగాణ): ఇరాన్‌లోని ఫోర్డో అణు కేంద్రాన్ని ధ్వంసం చేయడానికి అమెరికా బీ-2 స్పిరిట్‌ బాంబర్‌ యుద్ధ విమానాన్ని వినియోగించింది. నిర్ణీత లక్ష్యాలను తుత్తునియలు చేయడంలో 100 శాతం సక్సెస్‌ రేటు కలిగిన ఈ యుద్ధ విమానం ప్రపంచంలోనే అత్యంత ఖరీదైనది కూడా. యూఎస్‌ రాకాసి విహంగంగా పిలిచే ఈ యుద్ధ విమానంలో ఎన్నో ప్రత్యేకతలు ఉన్నాయి.

ప్రత్యేకతలకు కేరాఫ్‌..బీ-2

• శత్రు దేశాల రాడార్లకు చిక్కకుండా.. రాడార్‌ తరంగాలను చెల్లాచెదురు చేసే అత్యాధునిక స్టెల్త్‌ టెక్నాలజీ ఈ బీ-2 బాంబర్‌ సొంతం.
• శత్రుదేశాల గగనతల రక్షణ వ్యవస్థలను ఏమార్చేందుకు ఈ విమానాన్ని వినూత్న డిజైన్‌తో రూపొందించారు.
• రాడార్‌ సిగ్నళ్లకు దొరక్కుండా విమానం బాడీకి రాడార్‌ అబ్సార్బింగ్‌ మెటీరియల్‌ (ఆర్‌ఏఎమ్‌) అనే ఓ ప్రత్యేకమైన పూతను అద్దారు.
• వాతావరణంలో ఉష్ణోగ్రతలు ఏమాత్రం మారినా ఈ పూత పనిచేయదు. అందుకే, ఈ జెట్లను ఎయిర్‌ కండిషనింగ్‌ హ్యాంగర్ల నడుమ భద్రపరుస్తారు.
• ఆర్‌ఏఎమ్‌ పూత కారణంగా గగనతలంలోకి వచ్చేవరకూ ఈ విమానాన్ని శత్రువులు అంత సులభంగా పసిగట్టలేరు. విమానం నుంచి వచ్చే శబ్దాలు కూడా తక్కువ మోతాదులోనే ఉంటాయి.
• పరారుణ సెన్సర్లు గుర్తించకుండా విమానం నుంచి వచ్చే వేడిని తగ్గించడానికి ఇంజిన్లను బాడీ లోపలే అమర్చారు.
• ఒక్కసారి ఇంధనం నింపితే ఏకంగా 11 వేల కిలోమీటర్ల మేర ప్రయాణించగలదు. అందుకే కాక్‌పిట్‌ వెనుక భాగంలో పైలట్లు విశ్రాంతి తీసుకోవడానికి బెడ్‌, చిన్న కిచెన్‌, అరలు, మైక్రోఓవెన్‌, టాయ్‌లెట్లు కూడా ఉన్నాయి.

బీ-2ను తలదన్నేలా బీ-21

ప్రపంచంలోనే అత్యంత శక్తివంతమైన యుద్ధ విమానాలుగా పేరుగాంచిన బీ-2 స్థానంలో మరింత శక్తివంతమైన అడ్వాన్స్‌డ్‌ బీ-21 రైడర్లను తీసుకురావాలని అమెరికా భావిస్తున్నది. బీ-2 సాంకేతికత 1990నాటిది కావడం, రక్షణ రంగంలో చైనా, రష్యా కొత్త సాంకేతికతను అందిపుచ్చుకోవడానికి ప్రయత్నిస్తుండటంతో అమెరికా ఈ యోచన చేస్తున్నది. బీ-2తో పోలిస్తే ఎన్నో విషయాల్లో బీ-21 మెరుగ్గా ఉండనున్నట్టు రక్షణ రంగ నిపుణులు చెప్తున్నారు. గడిచిన మూడు దశాబ్దాల్లో రక్షణ రంగంలో వచ్చిన మార్పులకు అనుగుణంగా బీ-21ను తయారు చేయనున్నారు. సంప్రదాయ బాంబులతో పాటు అణ్వాయుధాలు, అణుబాంబులను మోసుకెళ్లే సామర్థ్యం దీనిలో ఉండనున్నట్టు భావిస్తున్నారు. అడ్వాన్స్‌డ్‌ స్టెల్త్‌ టెక్నాలజీతో పాటు నిర్వహణ భారం కూడా తక్కువగా ఉండేలా దీన్ని రూపొందించనున్నారు. పైలట్ల అవసరం లేకుండా డిజిటల్‌ సిస్టమ్‌తో నడిచేలా రూపొందించనున్న ఈ బీ-21 నుంచి డ్రోన్లను కూడా ప్రయోగించవచ్చు. పరిధి, వేగం, సామర్థ్యం, సాంకేతికత ఇలా అన్ని విషయాల్లో బీ-2తో పోలిస్తే బీ-21.. కనీసం 30 ఏండ్ల అడ్వాన్స్‌డ్‌గా ఉండనున్నట్టు చెప్తున్నారు. తొలిదశలో కనీసం వంద బీ-21 రైడర్లను సిద్ధం చేసుకోవడానికి అమెరికా ప్రణాళికలు రచిస్తున్నట్టు సమాచారం.

• పేరు: బీ-2 స్పిరిట్‌ బాంబర్‌
• ఆకారం: గబ్బిలం నమూనా
• రెక్కల పొడవు: 172 అడుగులు
• బరువు: 72,575 కిలోలు
• పొడవు: 69 అడుగులు
• ఇంజిన్లు: 4
• పైలట్లు: ఇద్దరు
• గరిష్ఠ వేగం: గంటకు 1,010 కిలోమీటర్లు
• గరిష్ఠ ఎత్తు: 15,200 మీటర్లు
• ఏకబిగిన ప్రయాణించగలిగే దూరం: 11 వేల కిలోమీటర్లు
• రీఫ్యూయలింగ్‌తో ప్రయాణించేది: 18,500 కిలోమీటర్లు
• మోసుకెళ్లగలిగే బాంబులు: 18 వేల కిలోలు
• సక్సెస్‌ రేటు: 100 శాతం
• ఖరీదు: రూ. 18,182 కోట్లు
• తయారీ కంపెనీ: నార్త్‌రోప్‌ గ్రమ్మన్‌