6 నెలల్లో 4 వేల బ్యాంకింగ్‌ మోసాలు

• రిజర్వు బ్యాంక్‌ తాజా నివేదికలో వెల్లడి

ముంబై, డిసెంబర్‌ 28: బ్యాంకింగ్‌ మోసాలను నియంత్రించడానికి కేంద్ర ప్రభుత్వం, అటు రిజర్వు బ్యాంక్‌లు చేస్తున్న ప్రయత్నాలు బెడిసికొడుతున్నాయి. ప్రస్తుత ఆర్థిక సంవత్సరం తొలి ఆరు నెలల్లో 4 వేలకు పైగా బ్యాంకింగ్‌ మోసాలు జరిగాయి. ఈ విషయాన్ని రిజర్వు బ్యాంక్‌ తాజాగా విడుదల చేసిన నివేదికలో వెల్లడించింది. అంతక్రితం ఏడాది ఇదే సమయంలో జరిగిన 3,499 మోసాలతో పోలిస్తే భారీగా పెరిగాయి. మోసాల సంఖ్య పెరిగినప్పటికీ వీటి విలువ మాత్రం భారీగా తగ్గడం విశేషం. గత ఆరు నెలల్లో బ్యాంకుల్లో రూ.36,342 కోట్ల మోసాలు జరిగాయి. ఏప్రిల్‌-సెప్టెంబర్‌ 2020లో రూ.64,261 కోట్లుగా ఉన్నది.

• ఈ బ్యాంకింగ్‌ మోసాల్లో 1,802 బ్యాంక్‌ల అడ్వాన్స్‌లకు సంబంధించినవి. విలువ 35 వేల కోట్లు.
• కార్డ్‌/ఇంటర్నెట్‌కు సంబంధించిన మోసాలు 1,532. వీటి విలువ రూ.60 కోట్లు.
• 208 డిపాజిట్లలో మోసాలు. విలువ 362 కోట్లు.
• ఈ మోసాల్లో ప్రైవేట్‌ రంగ బ్యాంకులకు చెందినవే సగానికి పైగా ఉండటం విశేషం.
• విలువ పరంగా చూస్తే మాత్రం ప్రభుత్వరంగ బ్యాంకులకు చెందినవే అధికం.
• 2019-20లో 8,703 బ్యాంకింగ్‌ మోసాలు(విలువ రూ.1,85,468 కోట్లు) జరుగగా, ఆ తర్వాతి ఏడాది 2020-21లో 7,363 మోసాలు(విలువ రూ.1,38,422 కోట్లు) జరిగాయి.