తైపీ: ఏదైనా ఫ్రీగా వస్తుందంటే ఏం చేయడానికైనా కొంతమంది సిద్ధంగా ఉంటారు. అందులోనూ నోరూరించే లంచ్ను ఫ్రీగా ఇస్తామంటే ఊరుకుంటారా? ఏకంగా తమ పేరు మార్చుకోవడానికి కూడా సిద్ధమైపోయారు. తైవాన్లోని అకిండో సుషిరో అనే జపనీస్ రెస్టారెంట్ ప్రమోషన్ కోసం చేసిన ఈ పని ఇప్పుడా దేశంలో సంచలనం సృష్టిస్తోంది.
ఎంతోమంది సాల్మన్లు..
జపాన్కు చెందిన సుషి అనే వంటకానికి ప్రపంచవ్యాప్తంగా ఫ్యాన్స్ ఉన్నారన్న సంగతి తెలుసు కదా. సాల్మన్ అనే చేపతో చేసే ఈ నోరూరించే వంటకం ఫ్రీగా కావాలంటే మీ పేర్లను సాల్మన్గా మార్చుకోండి అని ఆ రెస్టారెంట్ ప్రచారం మొదలుపెట్టింది. ఇంకేం.. సుషి అంటే పడి చచ్చే 150 మంది ప్రభుత్వ రిజిస్ట్రేషన్ కార్యాలయాల దగ్గర క్యూ కట్టారు. తమ పేర్లను అధికారికంగా సాల్మన్గా మార్చుకోవడానికి వాళ్లు సిద్ధపడిపోయారు. కువో అనే ఓ స్టూడెంట్ తన పేరును కువో సాల్మన్ రైస్ బౌల్గా మార్చుకుంది. మరో యూనివర్సిటీ విద్యార్థి తన పేరును చౌ షిషెన్గా మార్చుకున్నాడు. ఇలా పేర్లు మార్చుకునే వాళ్ల సంఖ్య రోజురోజుకూ పెరిగిపోతుండటంతో దరఖాస్తు చేసుకున్న తర్వాత రెండు వారాలు లేదా నెల రోజుల సమయం ఇవ్వాలని అక్కడ ప్రభుత్వం నిర్ణయం తీసుకుంది. దీనివల్ల ఆ నెల రోజుల సమయంలో పేరు మార్చుకునేవాళ్ల మనసు మారుతుందన్నది ప్రభుత్వ ఆలోచన.