Crime news | గాఢ నిద్రలో ఉండగా కొడుకు కుటుంబానికి నిప్పుపెట్టిన తండ్రి.. ఇద్దరు సజీవ దహనం.. ఒకరి పరిస్థితి విషమం

Crime news | కేరళలోని త్రిస్సూర్‌ జిల్లాలో ఓ వ్యక్తి దారుణానికి ఒడిగట్టాడు. రాత్రిపూట గాఢనిద్రలో ఉన్న తన కుమారుడు, కోడలు, మనవడిని చంపడానికి వారి గదిలో పెట్రోల్‌ పోసి నిప్పంటించాడు. ఈ ఘటనలో నిందితుడి కుమారుడు, మనవడు సజీవ దహనమయ్యారు.

త్రిస్సూర్‌: కేరళలోని త్రిస్సూర్‌ జిల్లాలో ఓ వ్యక్తి దారుణానికి ఒడిగట్టాడు. రాత్రిపూట గాఢనిద్రలో ఉన్న తన కుమారుడు, కోడలు, మనవడిని చంపడానికి వారి గదిలో పెట్రోల్‌ పోసి నిప్పంటించాడు. ఈ ఘటనలో నిందితుడి కుమారుడు, మనవడు సజీవ దహనమయ్యారు. కోడలు తీవ్ర గాయాలతో చికిత్స పొందుతోంది. ఘటన అనంతరం విషం తాగి నిందితుడు కూడా ఆత్మహత్యాయత్నం చేశాడు.

ఈ ఘటనపై పోలీసులు వెల్లడించిన వివరాల ప్రకారం.. నిందితుడు జాన్సన్‌ బుధవారం అర్ధరాత్రి తన కుమారుడు జోజీ (38), కోడలు లిజీ (33), 12 ఏళ్ల మనవడు ఇంట్లో నిద్రిస్తున్న సమయంలో పెట్రోలు పోసి నిప్పంటించాడు. ఈ ఘటనలో జోజీ, అతడి కుమారుడు మృతిచెందారు. 50 శాతం కాలిన గాయాలతో లిజీ ఎర్నాకుళంలోని ఓ ఆస్పత్రిలో మృత్యువుతో పోరాడుతోంది.

కాగా, కుమారుడి కుటుంబానికి నిప్పంటించిన తర్వాత నిందితుడు జాన్సన్‌ విషం తాగి ఆత్మహత్యాయత్నం చేశాడు. ప్రస్తుతం అతడు కూడా త్రిస్సూర్‌లోని ఓ ఆస్పత్రిలో చికిత్స పొందుతున్నాడు. జాన్సన్‌ పరిస్థితి కూడా విషమంగా ఉందని పోలీసులు తెలిపారు. కుటుంబ కలహాలే ఈ దారుణానికి కారణంగా తెలుస్తోందని పేర్కొన్నారు.