ఆయిల్‌ ఇండియా ప్లాంట్‌లో పేలుడు.. ముగ్గురి మృతి

అస్సాం రాష్ట్రంలోని డిబ్రూగఢ్‌ జిల్లాలో ఉన్న ఆయిల్‌ ఇండియా కంపెనీ లిమిటెడ్‌లో శుక్రవారం భారీ పేలుడు సంభవించింది. ఈ పేలుడు ధాటికి ఒకరు అక్కడికక్కడే మరణించగా మరో ఇద్దరు దవాఖానలో చికిత్స పొందుతూ శనివారం చనిపోయారు.

దిస్పూర్‌ : అస్సాం రాష్ట్రంలోని డిబ్రూగఢ్‌ జిల్లాలో ఉన్న ఆయిల్‌ ఇండియా కంపెనీ లిమిటెడ్‌లో శుక్రవారం భారీ పేలుడు సంభవించింది. ఈ పేలుడు ధాటికి ఒకరు అక్కడికక్కడే మరణించగా మరో ఇద్దరు దవాఖానలో చికిత్స పొందుతూ శనివారం చనిపోయారు. మరో ఏడుగురు తీవ్రంగా గాయపడగా ఇందులో ముగ్గురి పరిస్థితి విషమంగా ఉంది.

శుక్రవారం నిర్వహణ పనులు జరుగుతున్న సమయంలో కంపెనీ ఇంటర్మీడియట్‌ ట్యాంక్‌ ఫార్మ్‌లో ఒక్కసారిగా పేలుడు సంభవించింది. ఇంటర్మీడియట్‌ ట్యాంక్‌ ఫార్మ్‌ అంటే పెట్రోలియం ఉత్పత్తులను ఇతర ప్రాంతాలకు తరలించే ముందు లేదా తర్వాత నిల్వ చేసే ప్రదేశం. ఈ ఘటనపై సీఎం హిమంత బిస్వశర్మ విచారణకు ఆదేశించారు. మృతుల కుటుంబాలకు ఒక్కొక్కరికి రూ.10లక్షలు, గాయపడ్డ వారికి రూ.5లక్షల పరిహారం ప్రకటించారు.