Trump Tariffs | మన ఐటీకి ఢోకా లేదు.. ట్రంప్‌ సుంకాలతో టెక్‌ పరిశ్రమకు ప్రయోజనమే: లాక్స్‌ చేపూరి

అమెరికా అధ్యక్షుడు ట్రంప్‌ టారిఫ్‌ విధానాలతో ఇండియాతో పాటు హైదరాబాద్‌లో ఐటీ రంగానికి వచ్చే నష్టమేమీ లేదని టెక్నోజెన్‌ సీఈవో లాక్స్‌ చేపూరి అభిప్రాయపడ్డారు. అమెరికా చైనాపై విధిస్తున్న ప్రతీకార సుంకాలతో భారత్‌కు అనేక కంపెనీలు వచ్చే అవకాశాలు ఉన్నాయని ఆయన స్పష్టం చేశారు. ట్రంప్‌ ‘మేక్‌ ఇన్‌ అమెరికా’ అని ఆయా సంస్థలను యూఎస్‌ఏకి ఆహ్వానిస్తున్నారని.. భవిష్యత్తులో ఉద్యోగాల సంఖ్య భారీగా పెరిగే అవకాశం ఉందన్నారు.

• చైనా నుంచి భారీగా మనవద్దకు కంపెనీలు తరలి వచ్చే చాన్స్‌
• ‘మేక్‌ ఇన్‌ అమెరికా’తో మరిన్ని ఉద్యోగాలు వస్తాయి
• యూరప్‌లో జీవన వ్యయం ఎక్కువ.. అందుకే ఉద్యోగుల గమ్యస్థానం ‘అమెరికా’
• ‘నమస్తే తెలంగాణ’ ప్రత్యేక ఇంటర్వ్యూలో టెక్నోజెన్‌ సీఈవో లాక్స్‌ చేపూరి

Trump Tariffs | హైదరాబాద్‌, ఏప్రిల్‌ 19 (నమస్తే తెలంగాణ): అమెరికా అధ్యక్షుడు ట్రంప్‌ టారిఫ్‌ విధానాలతో ఇండియాతో పాటు హైదరాబాద్‌లో ఐటీ రంగానికి వచ్చే నష్టమేమీ లేదని టెక్నోజెన్‌ సీఈవో లాక్స్‌ చేపూరి అభిప్రాయపడ్డారు. అమెరికా చైనాపై విధిస్తున్న ప్రతీకార సుంకాలతో భారత్‌కు అనేక కంపెనీలు వచ్చే అవకాశాలు ఉన్నాయని ఆయన స్పష్టం చేశారు. ట్రంప్‌ ‘మేక్‌ ఇన్‌ అమెరికా’ అని ఆయా సంస్థలను యూఎస్‌ఏకి ఆహ్వానిస్తున్నారని.. భవిష్యత్తులో ఉద్యోగాల సంఖ్య భారీగా పెరిగే అవకాశం ఉందన్నారు.

హెచ్‌1బీ వీసా ఉన్నవారు తమ వీసా స్టేటస్‌ సరిగా ఉంచుకుని.. అమెరికా చట్టాలు పాటిస్తే ఎలాంటి ఇబ్బంది ఉండదని ఆయన తెలిపారు. ‘గోల్డెన్‌ వీసాకు రూ.45 కోట్లు (5 మిలియన్‌ డాలర్లు) లీగల్‌ మనీ వెచ్చించి వెయ్యి మంది దరఖాస్తు చేసుకున్నారంటే అమెరికా క్రేజ్‌ ఏ రేంజ్‌లో ఉందో అర్థం చేసుకోవచ్చు. యూరప్‌లో జీవన వ్యయం ఎక్కువ.. అందుకే ఐటీ ఉద్యోగాలకు అమెరికా గమ్యస్థానంలా ఉంటుందనడంలో సందేహం లేదు’ అని ఆయన అన్నారు. శనివారం ‘నమస్తే తెలంగాణ’కు ఇచ్చిన ప్రత్యేక ఇంటర్వ్యూలో పలు ఆసక్తికర విషయాలను లాక్స్‌ చేపూరి పంచుకున్నారు.

నమస్తే తెలంగాణ: సుంకాల విషయంలో ట్రంప్‌ తీసుకుంటున్న నిర్ణయాలతో మన ఐటీ సెక్టార్‌పై ఏమైనా ప్రభావం ఉంటుందా..?

• ల్యాక్స్‌ చేపూరి: ట్రంప్‌ ప్రభుత్వం టారిఫ్‌లను వస్తువులపై మాత్రమే విధిస్తున్నది తప్ప.. సేవలపై కాదు. దీంతో మన ఐటీ రంగంపై ప్రత్యక్షంగా ప్రభావం ఉండదు. ఆయా ఉత్పత్తులపై విధిస్తున్న టారిఫ్‌ల ప్రభావంతో సెమి కండక్టర్లు, కంప్యూటర్‌లో వాడే చిప్‌ల ధరలు పెరుగుతాయి. ట్రంప్‌ టారిఫ్‌ విధానంతో పరోక్షంగా భారత్‌కు లాభమే. చైనా నుంచి అనేక కంపెనీలు మన దేశానికి తరలివచ్చే అవకాశం ఉంది. చైనాపై అమెరికా విధించిన సుంకాల కారణంగా ఆపిల్‌ కంపెనీ తన ఉత్పత్తిని మన దేశానికి తరలిస్తున్నది. ఫాక్స్‌కాన్‌ కంపెనీ సైతం ఇక్కడ ప్రొడక్షన్‌ పెంచుతున్నది. ఈ పరిణామాలతో భారత్‌లో ఉద్యోగాల సంఖ్య పెరిగే చాన్స్‌ ఉన్నది.

నమస్తే తెలంగాణ: ట్రంప్‌ విధానాలతో ప్రత్యక్షంగా హైదరాబాద్‌ ఐటీ ఉద్యోగులపై ప్రభావం ఎలా ఉండబోతున్నది?

• ల్యాక్స్‌ చేపూరి: ట్రంప్‌ టారిఫ్‌ విధానాలతో హైదరాబాద్‌ ఐటీ ఉద్యోగులకు లాభమే. అమెరికాలో పేరు గాంచిన వాల్‌మార్ట్‌లాంటి సంస్థకు 90 శాతం ఉత్పత్తులు చైనా నుంచి వస్తాయి. చైనాపై 245 శాతం ప్రతీకార పన్ను విధించిన కారణంగా ఇకపై వాల్‌మార్ట్‌ సైతం తన ఉత్పత్తులను మన నుంచి అమెరికాకు పంపేలా చర్యలు తీసుకుంటుంది. ఇప్పటికే అనేక సంస్థలకు చైనా తన ఉత్పత్తులు పంపుతున్నది. భవిష్యత్తులో వాటన్నింటినీ భారత్‌ నుంచే పంపే అవకాశం ఉంది. దీని కారణంగా మన దగ్గర ఉద్యోగాల సంఖ్య పెరుగుతుంది.

నమస్తే తెలంగాణ: హెచ్‌1బీ వీసా కలిగి ఉన్న మన వాళ్లపై ట్రంప్‌ నిర్ణయాలు ఏ మేరకు ప్రభావం చూపుతాయి?

• ల్యాక్స్‌ చేపూరి: ట్రంప్‌ అధికారంలోకి వచ్చాక హెచ్‌1బీ వీసా విషయంలో కొత్త రూల్స్‌ పెట్టడం లేదు. అక్కడి చట్టాలు పాటిస్తే ఎలాంటి ఇబ్బంది ఉండదు. వీసా స్టేటస్‌ సరిగా నిర్వహించకపోతే సమస్య తలెత్తుతుంది. హెచ్‌1బీ వీసా ఉన్న వాళ్లు భయపడాల్సిన అవసరం లేదు. రెండు-మూడు నెలల్లో అమెరికాలో వాతావరణం అంతా సాధారణంగా మారిపోతుంది. ‘మేక్‌ ఇన్‌ అమెరికా’లో భాగంగా అనేక కంపెనీలు యూఎస్‌లో తమ సంస్థలు ఏర్పాటు చేసుకోనున్నాయి. ఆ సమయంలో వారికి కేవలం మిషనరీ ఉంటే సరిపోదు. కచ్చితంగా మ్యాన్‌ పవర్‌ అవసరం ఉంటుంది. దీంతో భారత్‌కు మరిన్ని హెచ్‌1బీ వీసాలు వచ్చే అవకాశం ఉంది.

నమస్తే తెలంగాణ: భవిష్యత్తులో మన దగ్గర ఐటీ విస్తరణ ఎలా ఉండబోతున్నది?

• ల్యాక్స్‌ చేపూరి: ఇండియాతో పాటు హైదరాబాద్‌లో ఐటీ విస్తరణ కొనసాగుతుంది. ఏ ఐటీ కంపెనీ అయినా రెండేండ్ల ముందు నుంచే తమ కంపెనీ ఏర్పాటుకు మార్కెట్‌, సౌకర్యాలు ఎలా ఉన్నాయి.. అని పరిశీలిస్తుంది. నాణ్యతగా పనిచేసే ఉద్యోగుల కోసం చూస్తుంది. మన దగ్గర సాఫ్ట్‌వేర్‌ నైపుణ్యాలు కలిగినవారు, ఇంగ్లీష్‌ బాగా వచ్చిన వాళ్లు పుష్కలంగా ఉన్నారు. కాబట్టి యూఎస్‌ నుంచి కంపెనీలు ఇండియాకు వస్తున్నాయి. రానున్న 3 నుంచి 6 నెలల్లో కంపెనీల విస్తరణ ప్రభావం ఇండియాతో పాటు హైదరాబాద్‌లో ఉంటుంది.

నమస్తే తెలంగాణ: ఖర్చుల నియంత్రణలో భాగంగా అమెరికా ప్రభుత్వం పలు కంపెనీలతో ఒప్పందాలు రద్దు చేసుకుంటున్నది కదా? ఈ పరిణామాన్ని ఎలా చూడొచ్చు..?

• ల్యాక్స్‌ చేపూరి: ఎలాన్‌ మస్క్‌ నేతృత్వంలోని డోజ్‌ (డిపార్ట్‌మెంట్‌ ఆఫ్‌ గవర్నమెంట్‌ ఎఫిషియెన్సీ) ఆయా కంపెనీల్లో ఉన్న వృథాను తగ్గించుకునేందుకు కాంట్రాక్టులను సమీక్షిస్తున్నది.అమెరికా ప్రభుత్వానికి 36 ట్రిలియన్‌ డాలర్ల అప్పు ఉంది. ఈ కారణంగా అనవసర ఖర్చులు తగ్గించుకుంటున్నది. ఒక వేళ ఆయా కంపెనీలతో తమకు లాభం లేదనిపిస్తే ఒప్పందాలను రద్దు చేసుకుంటున్నది. ట్రంప్‌ అధికారం చేపట్టిన తర్వాత గత రెండు నెలల్లో ఆయా కంపెనీల కాంట్రాక్టులు రద్దు చేయడం ద్వారా రూ.14-15 వేల కోట్లు ఆదా చేసింది. దీంతో పాటు ట్యాక్స్‌, రెవెన్యూ, హెల్త్‌ సెక్టార్‌లో ఇదే రకమైన విధానాన్ని అవలంబిస్తున్నది. అప్ఘన్‌ యుద్ధంలో అమెరికా 2 ట్రిలియన్‌ డాలర్లు, ఉక్రెయిన్‌ యుద్ధానికి 372 బిలియన్‌ డాలర్లు ఖర్చు చేసింది. వీటికి అయిన అప్పులను తగ్గించుకునేందుకు కంపెనీలతో ఒప్పందాలు రద్దు చేసుకుంటున్నది.

నమస్తే తెలంగాణ: తాజా పరిణామాలతో అమెరికాలో ఉంటున్న భారతీయుల ఆలోచనా ధోరణి ఎలా ఉంది?

• ల్యాక్స్‌ చేపూరి: ప్రస్తుతం విద్యార్థుల్లో ఆందోళన ఎక్కువగా ఉంది. అందుకే కాస్త ఇబ్బందులు ఉన్నాయి. రెండు మూడు నెలల్లో పరిస్థితి సాధారణంగా మారిపోతుంది. గ్రీన్‌ కార్డు ఉన్న సిటిజన్లకు ఇబ్బందులు ఉండవు. కానీ ఏం జరగబోతున్నదనే ఆసక్తి మాత్రం వారిలో ఉంది. అమెరికా-భారత్‌ మధ్య సత్సంబంధాలు ఉన్నాయి. భారతీయులు చట్టరహిత కార్యకలాపాలకు పాల్పడరని అమెరికన్లు నమ్ముతారు. దీంతో అక్కడి ఉద్యోగాలకు మనవాళ్లను ఎక్కువగా తీసుకుంటారు.

నమస్తే తెలంగాణ: అమెరికాలో స్థిర పడ్డ మనవాళ్లు హైదరాబాద్‌ రియల్‌ ఎస్టేట్‌లో పెట్టుబడులు పెడుతుంటారు.. ట్రంప్‌ నిర్ణయాల ఎఫెక్ట్‌ రియల్‌ రంగంపై ఏమైనా ఉంటుందా?

• ల్యాక్స్‌ చేపూరి: ట్రంప్‌ నిర్ణయాలతో హైదరాబాద్‌ రియల్‌ ఎస్టేట్‌పై ఎలాంటి ప్రభావం ఉండదు. తాత్కాలికంగా కొంత స్తబ్దత ఉన్నా.. ఆరు నెలల్లో అంతా సాధారణ స్థితికి వస్తుంది. ఇప్పటికిప్పుడు హెచ్‌1బీ వీసా, గ్రీన్‌ కార్డు వచ్చినవారు పెట్టుబడి పెట్టలేరు. హైదరాబాద్‌లో సైతం భూముల ధరలేమీ తక్కువగా లేవు. గతంలో ఎకరాల్లో భూమి కొంటే.. నేడు వంద గజాలు కొంటే చాలు అనే పరిస్థితికి వచ్చాం. భవిష్యత్తులో అంతా కుదరుకున్న తర్వాత రియల్‌ ఎస్టేట్‌లో పెట్టుబడులు పెట్టేవాళ్లు పెరుగుతారు.

నమస్తే తెలంగాణ: ప్రస్తుతం నెలకొన్న పరిణామాలతో రానున్న రోజుల్లో అమెరికా ఉద్యోగులకు గమ్యస్థానంగా ఉంటుందా? లేదా యూరోప్‌ లాంటి ఇతర దేశాలను ఎంచుకోవాలా?

• ల్యాక్స్‌ చేపూరి: ఎప్పటికైనా డాలరే కింగ్‌లా ఉంటుంది. యూరప్‌ విషయానికొస్తే అక్కడ జీవన వ్యయం ఎక్కువ. అమెరికాలో ప్రశాంతమైన వాతావరణం ఉంటుందని ఇక్కడికి రావడానికి భారతీయులు మొగ్గు చూపుతారు. గోల్డెన్‌ వీసాకు రూ.45 కోట్లు (5 మిలియన్‌ డాలర్లు) డబ్బులు వెచ్చించి వెయ్యి మంది ఐప్లె చేసుకున్నారంటే అమెరికా క్రేజ్‌ ఏ రేంజ్‌లో ఉందో అర్థం చేసుకోవచ్చు. అమెరికాకు ఉన్న అప్పులు తగ్గించుకోవడానికి ఇదో ఎత్తుగడలా సైతం చూడొచ్చు.