SIBO | భోజ‌నం చేసిన త‌రువాత ఈ స‌మ‌స్య‌లు వ‌స్తున్నాయా..? దానికి కార‌ణం ఏమిటో, ఎలా నివారించాలో తెలుసుకోండి..!

తేలిక‌పాటి లేదా భారీ భోజ‌నం చేసిన త‌రువాత చాలా మంది తీవ్ర‌మైన ఉబ్బ‌రం, మ‌ల‌బ‌ద్ద‌కం వంటి జీర్ణ స‌మ‌స్య‌ల‌తో బాధ‌ప‌డుతున్నార‌ని ఇటీవ‌లి అధ్య‌య‌నాలు చెబుతున్నాయి. ఇటువంటి అసౌక‌ర్యానికి ప్రధాన కార‌ణం SIBO (Small Intestinal Bacterial Overgrowth) అని వైద్యులు చెబుతున్నారు.

SIBO | తేలిక‌పాటి లేదా భారీ భోజ‌నం చేసిన త‌రువాత చాలా మంది తీవ్ర‌మైన ఉబ్బ‌రం, మ‌ల‌బ‌ద్ద‌కం వంటి జీర్ణ స‌మ‌స్య‌ల‌తో బాధ‌ప‌డుతున్నార‌ని ఇటీవ‌లి అధ్య‌య‌నాలు చెబుతున్నాయి. ఇటువంటి అసౌక‌ర్యానికి ప్రధాన కార‌ణం SIBO (Small Intestinal Bacterial Overgrowth) అని వైద్యులు చెబుతున్నారు. SIBO అనేది పెద్ద ప్రేగులో ఉండే బ్యాక్టీరియా చిన్న ప్రేగులో ఎక్కువ‌గా పెర‌గ‌డం. చిన్న ప్రేగు ఆహారాన్ని జీర్ణం చేయ‌టంతో పాటు పోష‌కాల‌ను శ‌రీరం గ్ర‌హించేలా చేయ‌డం, ఆహారాన్ని ముందుకు క‌దిలించ‌డం వంటి ప‌నుల‌ను నిర్వ‌ర్తిస్తుంది. చిన్న ప్రేగులో ఈ బ్యాక్టీరియా ఎక్కువ‌గా ఉండ‌డం వ‌ల్ల ఆహారం ఎక్కువ‌గా ఫెర్మెంటేష‌న్ అవుతుంది. పోష‌కాలు శ‌రీరానికి అంద‌క‌కుండా పోతాయి. గ్యాస్ ఎక్కువ‌గా ఉత్ప‌త్తి అవుతుంది. దీని వ‌ల్ల పొట్ట ఉబ్బ‌రం, మ‌ల‌విస‌ర్జ‌న‌లో మార్పులు, క‌డుపు నొప్పి, అల‌స‌ట‌, పొట్ట పెద్ద‌గా క‌నిపించ‌డం, గ్యాస్, మ‌ల‌బద్ద‌కం, విరేచ‌నాలు, త‌క్కువ తిన్నా కూడా పొట్ట నిండిన భావ‌న క‌ల‌గ‌డం, పోష‌కాల లోపాలు వంటి ల‌క్ష‌ణాలు క‌నిపిస్తాయి. అంతేకాకుండా కొన్ని సంద‌ర్భాల్లో మెద‌డు మ‌బ్బుగా ఉండ‌డం, ఆందోళ‌న‌, చ‌ర్మ స‌మ‌స్య‌లు వంటి ల‌క్ష‌ణాలు క‌నిపిస్తాయి. ఇక SIBO కు గ‌లకార‌ణాల‌ను ఇప్పుడు తెలుసుకుందాం.

కార‌ణాలు ఇవే..

దీర్ఘ‌కాలిక ఒత్తిడి, డ‌యాబెటిస్, హైపో థైరాయిడిజం, వృద్దాప్యం, ఇన్పెక్ష‌న్ కార‌ణంగా జీర్ణాశ‌య సామ‌ర్థ్యం త‌గ్గుతుంది. దీని వ‌ల్ల ఆహారం లేదా బ్యాక్టీరియా చిన్న ప్రేగులోనే నిలిచిపోతాయి. దీర్ఘ‌కాలం పాటు పీపీఐ మందులు వాడ‌టం, వ‌య‌సు పెర‌గ‌డం లేదా జింక్ లోపం కార‌ణంగా క‌డుపులో ఆమ్లం తగ్గుతుంది. ఆమ్లం త‌క్కువ‌వ‌డం చేత బ్యాక్టీరియా చ‌నిపోకుండా చిన్న ప్రేగులోకి చేర‌తాయి. అలాగే బైల్ లేదా ఎంజైమ్ ల ప్ర‌వాహం త‌క్కువైతే ఆహారం పూర్తిగా జీర్ణం కాకుండా మిగిలిపోతుంది. దీంతో బ్యాక్టీరియా ఎక్కువ‌గా పెరుగుతుంది. పాత శస్త్రచికిత్సలు, IBS లేదా diverticula వంటి సమస్యలు చిన్న ప్రేగులో బ్యాక్టీరియాను చిక్కుకునేలా చేస్తాయి. ఇక SIBO ను బ్రీత్ టెస్ట్ ద్వారా గుర్తిస్తారు. ఇందులో వ్య‌క్తికి గ్లూకోజ్ క‌లిపిన ద్ర‌వ‌ణాన్ని తాగిస్తారు. కొద్ది స‌మ‌యం త‌రువాత శ్వాస న‌మూనాల‌ను తీసుకుని ప‌రీక్షిస్తారు.

ఏం చేయాలి..

SIBO తో బాధ‌ప‌డే వారు కొన్నిసార్లు ప్రోబ‌యోటిక్స్ తీసుకోవ‌డం వ‌ల్ల లక్ష‌ణాలు మ‌రింత పెరిగే అవ‌కాశం ఉంది. క‌నుక ఆహార నియంత్ర‌ణ, ఫెర్మెంటేషన్ ను త‌గ్గించ‌డం, క‌డుపులో ఆమ్లాన్ని మెరుగుప‌ర‌చ‌డం, ఎంజైమ్ లు, బైల్ స‌రైన స్థాయిలో ఉండేలా చేయడం, బ్యాక్టీరియా అధిక వృద్ధిని తగ్గించడానికి హెర్బల్ లేదా ఔషధ యాంటీమైక్రోబియల్స్ ను ఉపయోగించడం, జీర్ణాశ‌య సామ‌ర్థ్యాన్ని పునరుద్ధరించడం, జీర్ణాశ‌య‌ లైనింగ్‌ను బలపరచడం వంటివి చేయాలి. SIBO తగ్గిన తర్వాత మాత్రమే ప్రోబయోటిక్స్ వాడ‌డం మంచిది. ఈ విధంగా త‌గిన చ‌ర్య‌లు తీసుకుంటూ మెరుగైన చికిత్స తీసుకోవ‌డం ద్వారా ఈ స‌మ‌స్య నుండి బ‌య‌ట‌ప‌డ‌వ‌చ్చ‌ని వైద్యులు తెలియ‌జేస్తున్నారు.