Supreme court | రాజకీయ జోక్యం రాజ్యాంగ విరుద్ధం.. మహారాష్ట్ర సంక్షోభంపై సుప్రీంకోర్టు కీలక వ్యాఖ్యలు

నిరుడు మహారాష్ట్రలో మహావికాస్‌ ఆఘాడీ ప్రభుత్వాన్ని కూల్చిన ఘటనకు సంబంధించి సుప్రీంకోర్టు కీలక వ్యాఖ్యలు చేసింది. శివసేన సంక్షోభ సమయంలో బలపరీక్షపై గవర్నర్‌ కోశ్యారీ నిర్ణయం తీసుకోవడాన్ని తప్పుపట్టిన న్యాయస్థానం.. పార్టీ వ్యవహారాల్లో గవర్నర్‌ జోక్యం రాజ్యాంగ విరుద్ధమని పేర్కొన్నది.

• గవర్నర్‌ భగత్‌సింగ్‌ కోశ్యారీ వైఖరి చట్టబద్ధంగా లేదు
• పార్టీ వ్యవహారాల్లో ఆయన జోక్యం సమ్మతం కాదు
• సమాచారం లేకున్నా బలపరీక్ష నిర్వహించడంపై అసహనం
• అయినప్పటికీ ఉద్ధవ్‌ సర్కారును పునరుద్ధరించలేమన్న కోర్టు

నిరుడు మహారాష్ట్రలో మహావికాస్‌ ఆఘాడీ ప్రభుత్వాన్ని కూల్చిన ఘటనకు సంబంధించి సుప్రీంకోర్టు కీలక వ్యాఖ్యలు చేసింది. శివసేన సంక్షోభ సమయంలో బలపరీక్షపై గవర్నర్‌ కోశ్యారీ నిర్ణయం తీసుకోవడాన్ని తప్పుపట్టిన న్యాయస్థానం.. పార్టీ వ్యవహారాల్లో గవర్నర్‌ జోక్యం రాజ్యాంగ విరుద్ధమని పేర్కొన్నది. బలనిరూపణకు ముందే స్వచ్ఛంద రాజీనామా చేసిన నేపథ్యంలో ఉద్ధవ్‌ ఠాక్రే సర్కారును పునరుద్ధరించలేమని స్పష్టంచేసింది.

Supreme court | (స్పెషల్‌ టాస్క్‌ బ్యూరో) హైదరాబాద్‌, మే 11 (నమస్తే తెలంగాణ): దేశ రాజకీయాల్లో కిందటేడాది సంచలనం సృష్టించిన శివసేన సంక్షోభంపై సుప్రీంకోర్టు కీలక వ్యాఖ్యలు చేసింది. మహా వికాస్‌ ఆఘాడీ (ఎంవీఏ) నుంచి ఎమ్మెల్యేలు బయటికి వెళ్లారన్న సమాచారం లేనప్పటికీ అప్పటి గవర్నర్‌ భగత్‌ సింగ్‌ కొశ్యారీ బలపరీక్ష నిర్ణయాన్ని తీసుకోవడాన్ని కోర్టు తప్పుబట్టింది. బలపరీక్షకు వెళ్లకుండానే అప్పటి సీఎం ఉద్ధవ్‌ ఠాక్రే స్వచ్ఛందంగా రాజీనామా చేసిన విషయాన్ని ఈ సందర్భంగా గుర్తుచేసిన ధర్మాసనం.. ఈ కారణంగానే ఆయన ప్రభుత్వాన్ని మళ్లీ పునరుద్ధరించలేమని స్పష్టం చేసింది. ఈ మేరకు గురువారం భారత ప్రధాన న్యాయమూర్తి సీజేఐ డీవై చంద్రచూడ్‌తో కూడిన ఐదుగురు సభ్యులున్న రాజ్యాంగ ధర్మాసనం 141 పేజీల తీర్పులో కీలక వ్యాఖ్యలు చేసింది. తీర్పునిచ్చిన ధర్మాసనంలో జస్టిస్‌లు ఎంఆర్‌ షా, కృష్ణ మురారి, హిమాకోహ్లీ, పీఎస్‌ నరసింహ సభ్యులుగా ఉన్నారు.

విచారణ సమయంలో సుప్రీంకోర్టు కీలక వ్యాఖ్యలు

• శివసేన సంక్షోభం విషయంలో అప్పటి మహారాష్ట్ర గవర్నర్‌ కొశ్యారీ తీసుకొన్న నిర్ణయం సరైనది కాదు. అది రాజ్యాంగ విరుద్ధం. పార్టీ వ్యవహారాల్లో గవర్నర్‌ జోక్యం రాజ్యాంగ సమ్మతం అనిపించుకోదు.
• ఉద్ధవ్‌ ఠాక్రే పార్టీ మెజార్టీ కోల్పోయిందన్న సమాచారం (ఆబ్జెక్టివ్‌ మెటీరియల్‌) నాటి గవర్నర్‌ వద్ద లేదు. అయినా ఆయన బలనిరూపణకు ఆదేశించారు. ఆయనది రాజకీయ జోక్యం.. తొందరపాటు నిర్ణయం. ఆ నిర్ణయం తప్పు కూడా.
• గవర్నర్‌ విచక్షణాధికారాలను ఈ సందర్భంగా అమలు చేసిన తీరు చట్టబద్ధంగా లేదు. అలాగే పార్టీలోని అంతర్గత వివాదాలను పరిష్కరించడానికి బలపరీక్షను ఒక మాధ్యమంగా వాడలేం.
• అయితే, బలపరీక్షకు వెళ్లకుండా ఉద్దవ్‌ ఠాక్రే స్వచ్ఛందంగా రాజీనామా చేశారు.
• ఒకవేళ ఠాక్రే గనుక స్వచ్ఛందంగా రాజీనామా చేసి ఉండకపోయి ఉంటే.. ఆయన ప్రభుత్వాన్ని పునరుద్ధరించాల్సిన అవకాశాన్ని పరిశీలించవచ్చు.
• ఠాక్రే రాజీనామా చేయడంతో.. బీజేపీ మద్దతు ద్వారా తమకు మెజార్టీ ఉందని షిండే వర్గం ప్రకటించుకొన్నది. ఈ క్రమంలోనే ప్రభుత్వం ఏర్పాటు చేయాల్సిందిగా గవర్నర్‌ ఆహ్వానించారు. ఈ సందర్భంలో ఇది సమర్థనీయమే. ఏక్‌ నాథ్‌ షిండే సీఎంగా కొనసాగవచ్చు.
• అయితే, చీలిక వర్గానికి శివసేన అని చెప్పుకునే అధికారం లేదు. బలపరీక్ష ప్రాతిపదికన పార్టీ గుర్తు కేటాయించడం సరికాదు.
• ఒక పార్టీలో నెలకొన్న అంతర్గత కలహాలను బలనిరూపణ పరీక్ష పరిష్కరించలేదు.
• భరత్‌ గోగవాలేను విప్‌గా నియమిస్తూ స్పీకర్‌ తీసుకొన్న నిర్ణయం చెల్లదు. చట్ట వ్యతిరేకం.
• అవిశ్వాస తీర్మానం ఎదుర్కొంటున్న స్పీకర్‌కు.. రెబల్‌ ఎమ్మెల్యేలకు అనర్హత నోటీసులు జారీ చేసే అధికారాలు ఉంటాయా? లేదా అన్న అంశాన్ని మరింత అధ్యయనం చేయాల్సి ఉంది.
• స్పీకర్‌ పాత్రపై నిర్ణయం తీసుకొనే అధికారాన్ని ఏడుగురు సభ్యుల విస్తృత ధర్మాసనానికి బదిలీ చేస్తున్నాం.
• నాబమ్‌ రెబియా జడ్జిమెంట్‌, అనర్హత పిటిషన్లు పెండింగ్‌, స్పీకర్‌ పాత్ర తదితర అంశాలను కూడా ఏడుగురు సభ్యుల విస్తృత ధర్మాసనానికి బదిలీ చేస్తున్నాం. (తన తొలగింపును కోరుతూ తీర్మానం పెండింగ్‌లో ఉన్నప్పుడు స్పీకర్‌ అనర్హత ప్రక్రియను ప్రారంభించలేరన్న అంశమే 2016 రెబియా కేసులో కీలకాంశం)