ఉచితాలను లంచంగా పరిగణించాలి.. బెంగళూరువాసి పిటిషన్‌పై సుప్రీంకోర్టు కీలక నిర్ణయం

ఎన్నికల సమయంలో రాజకీయ పార్టీలు ప్రకటించే ఉచితాలను లంచంగా పరిగణించాలన్న పిటిషన్‌పై స్పందన తెలియజేయాలని కేంద్రం, ఎన్నికల కమిషన్‌కు సుప్రీంకోర్టు నోటీసులు జారీచేసింది.

• న్యూఢిల్లీ: ఎన్నికల సమయంలో రాజకీయ పార్టీలు ప్రకటించే ఉచితాలను లంచంగా పరిగణించాలన్న పిటిషన్‌పై స్పందన తెలియజేయాలని కేంద్రం, ఎన్నికల కమిషన్‌కు సుప్రీంకోర్టు నోటీసులు జారీచేసింది. ఎన్నికలకు ముందు ఉచితాలు ప్రకటించకుండా రాజకీయ పార్టీలను నిలువరించాలని కోరుతూ బెంగళూరుకు చెందిన శశాంక్‌ జే శ్రీధర దాఖలు చేసిన పిటిషన్‌ను పరిశీలించిన చీఫ్‌ జస్టిస్‌ డీవై చంద్రచూడ్‌, జస్టిస్‌ జేబీ పార్దీవాలా, జస్టిస్‌ మనోజ్‌ మిశ్రాలతో కూడిన త్రిసభ్య ధర్మాసనం కేంద్ర ప్రభుత్వంతోపాటు ఎన్నికల సంఘం స్పందన కోరింది. పార్టీలు ఇస్తున్న ఉచిత హామీల వల్ల ఖజానాపై అధిక భారం పడుతున్నదని, ఎన్నికల్లో ఓట్లు సంపాదించుకునేందుకు చేసే ఈ వాగ్దానాలను నెరవేర్చేందుకు అవసరమైన యంత్రాంగం ఏదీ లేదని శ్రీధర తన పిటిషన్‌లో పేర్కొన్నారు.

ఏడు విమానాలకు బాంబు బెదిరింపులు

న్యూఢిల్లీ, అక్టోబర్‌ 15: దేశంలో ఒకే రోజు ఏడు దేశీయ, అంతర్జాతీయ విమానాలకు బాంబు బెదిరింపులు రావడం కలకలం రేపింది. అమెరికా, సింగపూర్‌ వెళ్లే విమానాలు సహా ఏడింటికి మంగళవారం గుర్తు తెలియని వ్యక్తుల నుంచి ఎక్స్‌ మాధ్యమం ద్వారా ఈ బాంబు బెదిరింపులు వచ్చాయి. కొన్ని విమానాలను ముందు జాగ్రత్త చర్యగా అత్యవసర ల్యాండింగ్‌ చేశారు. ఢిల్లీ నుంచి షికాగో వెళ్లే విమానాన్ని కెనడాకు మళ్లించారు. రెండు రోజుల్లో 10 బాంబు బెదిరింపులు రావడంతో ముమ్మర తనిఖీలు జరిపారు.