రాష్ర్టాలు లాక్‌డౌన్‌

• కరోనా ఉద్ధృతితో కఠిన ఆంక్షలు
• కేరళలో అమల్లోకి పూర్తిస్థాయి లాక్‌డౌన్‌
• తమిళనాడులోనూ రేపటి నుంచి అమలు
• ఇప్పటికే పలు రాష్ర్టాల్లో నిషేధాజ్ఞలు

న్యూఢిల్లీ, మే 8: దక్షిణాదిలో కరోనా తీవ్రరూపం దాల్చుతున్న నేపథ్యంలో రాష్ర్టాలు ఆంక్షలను కఠినతరం చేస్తున్నాయి. శనివారం నుంచి కేరళలో పూర్తిస్థాయి లాక్‌డౌన్‌ అమల్లోకి రాగా, తమిళనాడులోనూ సోమవారం నుంచి రెండు వారాలపాటు సంపూర్ణ లాక్‌డౌన్‌ ప్రకటించారు. కర్ణాటకలో ఈ నెల 10-24 వరకు లాక్‌డౌన్‌ తరహా ఆంక్షలను విధించారు. వారాంతపు నిషేధాజ్ఞలు పెద్దగా ఫలితం ఇవ్వకపోవడంతో కేరళ సీఎం పినరాయి విజయన్‌ సంపూర్ణ లాక్‌డౌన్‌వైపే మొగ్గుచూపారు. ఆ రాష్ట్రంలో శనివారం కొత్తగా 41వేలకుపైగా కేసులు నమోదుకాగా, 64 మంది మృత్యువాతపడ్డారు. ప్రస్తుతం 4.17 లక్షల యాక్టివ్‌ కేసులు ఉన్నాయి. పుదుచ్చేరిలో ఇప్పటికే లాక్‌డౌన్‌ అమల్లో ఉన్నది. ఏపీలో 2 వారాలపాటు పాక్షిక లాక్‌డౌన్‌ ప్రకటించారు. తెలంగాణలో ఈ నెల 15 వరకు నైట్‌కర్ఫ్యూ పొడిగించారు. దేశంలోని 37.23 లక్షల యాక్టివ్‌ కేసుల్లో దాదాపు 80 శాతం 12 రాష్ర్టాల్లోనే నమోదయ్యాయి. మహారాష్ట్రలో అత్యధికంగా 6.57 లక్షల యాక్టివ్‌ కేసులు ఉన్నాయి.

• ఢిల్లీలో గత నెల 19 నుంచి లాక్‌డౌన్‌ అమల్లో ఉన్నది.
• హర్యానాలో ఈ నెల 3 నుంచి వారంపాటు లాక్‌డౌన్‌ విధించారు.
• బిహార్‌లో ఈ నెల 4 నుంచి 15 వరకు లాక్‌డౌన్‌ ప్రకటించారు.
• ఉత్తరప్రదేశ్‌లో సోమవారం ఉదయం వరకు వారాంతపు లాక్‌డౌన్‌ పొడిగించారు.
• ఒడిశాలో ఈ నెల 5 నుంచి 19 వరకు లాక్‌డౌన్‌ అమల్లో ఉంటుంది.
• రాజస్థాన్‌లో ఈ నెల 10 నుంచి 24 వరకు లాక్‌డౌన్‌ ప్రకటించారు.
• జార్ఖండ్‌లో లాక్‌డౌన్‌ తరహా ఆంక్షలను ఈ నెల 19 వరకు పొడిగించారు.
• మహారాష్ట్రలో గత నెల 5న లాక్‌డౌన్‌ తరహా ఆంక్షలను ప్రకటించగా.. అనంతరం ఈ నెల 15 వరకు పొడిగించారు.
• మిజోరంలో సోమవారం నుంచి వారం పాటు సంపూర్ణ లాక్‌డౌన్‌ అమల్లోకి రానున్నది.
• సిక్కింలో ఈ నెల 16 వరకు లాక్‌డౌన్‌ తరహా ఆంక్షలను విధించారు.
• పశ్చిమబెంగాల్‌లో గత వారం కఠిన ఆంక్షలు విధించారు. సమావేశాలపై నిషేధం ప్రకటించారు.
• అరుణాచల్‌ ప్రదేశ్‌లో ఈ నెలాఖరు వరకు నైట్‌ కర్ఫ్యూ అమలు కానున్నది.
• మణిపూర్‌లోని 7 జిల్లాల్లో ఈ నెల 17 వరకు కర్ఫ్యూ విధించారు.