Sela Tunnel | వ్యూహాత్మకం ‘సేలా’ సొరంగం.. చైనా సరిహద్దుకు సైన్యం వేగంగా చేరుకొనే అవకాశం

భారత్‌-చైనా సరిహద్దుల్లోని తూర్పు సెక్టార్‌లో నిర్మించిన వ్యూహాత్మక సేలా టన్నెల్‌ను ప్రధాని మోదీ శనివారం ప్రారంభించారు. అరుణాల్‌ప్రదేశ్‌ రాజధాని ఈటానగర్‌లో నిర్వహించిన ‘వికసిత్‌ భారత్‌, వికసిత్‌ నార్త్‌ ఈస్ట్‌' కార్యక్రమంలో పాల్గొన్న మోదీ ఈ టన్నెల్‌ను వర్చువల్‌గా జాతికి అంకితం చేశారు.

• ప్రపంచంలోనే ఎత్తయిన మార్గంలో ప్రారంభం

Sela Tunnel | ఈటానగర్‌/న్యూఢిల్లీ, మార్చి 9: భారత్‌-చైనా సరిహద్దుల్లోని తూర్పు సెక్టార్‌లో నిర్మించిన వ్యూహాత్మక సేలా టన్నెల్‌ను ప్రధాని మోదీ శనివారం ప్రారంభించారు. అరుణాల్‌ప్రదేశ్‌ రాజధాని ఈటానగర్‌లో నిర్వహించిన ‘వికసిత్‌ భారత్‌, వికసిత్‌ నార్త్‌ ఈస్ట్‌’ కార్యక్రమంలో పాల్గొన్న మోదీ ఈ టన్నెల్‌ను వర్చువల్‌గా జాతికి అంకితం చేశారు.

ఈ టన్నెల్‌ అరుణాచల్‌ప్రదేశ్‌లోని చైనా సరిహద్దు ప్రాంతమైన వ్యూహాత్మక తవాంగ్‌ రీజియన్‌కు అన్ని వాతావరణ పరిస్థితుల్లోనూ కనెక్టివిటీ కల్పిస్తుంది. బలిపారా-చారిదౌర్‌-తవాంగ్‌ రోడ్డులో మంచు, కొండ చరియలు విరిగిపడటం వంటి సవాళ్లను అధిగమించే లక్ష్యంతో ఈ టన్నెల్‌ను నిర్మించారు. దీని ద్వారా అత్యవసర సమయాల్లో భద్రతా బలగాలు, ఆయుధ వ్యవస్థను వాస్తవధీన రేఖ(ఎల్‌ఏసీ) సరిహద్దు ప్రాంతాలకు వేగంగా చేర్చేందుకు అవకాశం ఉంటుందని ఆర్మీ వర్గాలు వెల్లడించాయి. ప్రపంచంలోనే అధిక ఎత్తులో నిర్మించిన అత్యంత పొడవైన రెండు వరుసల టన్నెల్‌గా సేలా గుర్తింపు పొందింది.

సేలా టన్నెల్‌ విశేషాలు

• సముద్ర మట్టానికి 13 వేల అడుగులకు పైగా ఎత్తులో నిర్మాణం.
• రూ.825 కోట్లతో ఆస్ట్రియా టన్నెలింగ్‌ పద్ధతిని ఉపయోగించి నిర్మాణం.
• ఉన్నత స్థాయి భద్రతా ప్రమాణాల ఏర్పాటు
• రెండు టన్నెల్స్‌, ఒక లింక్‌ రోడ్డు. టన్నెల్‌-1 సింగిల్‌ ట్యూబ్‌తో 980 మీటర్ల పొడవు ఉంటుంది. అదే టన్నెల్‌-2 రెండు లైన్లతో(ఒకటి ట్రాఫిక్‌, మరొకటి అత్యవసర సర్వీసులకు) 1,555 మీటర్ల పొడవు కలిగి ఉంది. ఈ రెండు టన్నెళ్ల మధ్య లింకు రోడ్డు పొడవు 1,200 మీటర్లు ఉంటుంది.
• చైనా సరిహద్దులు ఎత్తుగా ఉండటంతో చైనా ఆర్మీ సులభంగా భారత బలగాల కదలికలను కనిపెట్టగలవు. అయితే సేలా సొరంగ మార్గం అందుబాటులోకి రావడంతో వారికి ఆ చాన్స్‌ ఉండదు.