Putin: సుఖోయ్‌-57 త‌యారీ కోసం భార‌త్‌కు స‌హ‌క‌రిస్తాం: పుతిన్

Putin : భార‌త్‌తో క‌లిసి సుఖోయ్‌-57 త‌యారీ కోసం సిద్ధంగా ఉన్న‌ట్లు ర‌ష్యా అధ్య‌క్షుడు పుతిన్ తెలిపారు. ఫిఫ్త్ జ‌న‌రేష‌న్ స్టీల్త్ విమానాన్ని సంయుక్తంగా భార‌త్‌తో క‌లిసి డెవ‌ల‌ప్ చేసేందుకు రెఢీగా ఉన్న‌ట్లు ఆయ‌న చెప్పారు. అయితే దీనిపై ర‌క్ష‌ణ శాఖ తుది నిర్ణ‌యం తీసుకోవాల్సి ఉంటుంద‌ని భార‌త విదేశాంగ శాఖ చెప్పింది.

న్యూఢిల్లీ: ఫిఫ్త్ జ‌న‌రేష‌న్ సుఖోయ్‌-57ని భార‌త్‌తో క‌లిసి సంయుక్తంగా ఉత్ప‌త్తి చేసేందుకు ర‌ష్యా అనుకూలంగా ఉంది. ర‌ష్యా అధ్య‌క్షుడు పుతిన్(Putin) ఈ విష‌యాన్ని వెల్ల‌డించారు. భార‌త విదేశాంగ విధానాన్ని పుతిన్ ప్ర‌శంసించిన విష‌యం తెలిసిందే. సెయింట్ పీట‌ర్స్‌బ‌ర్గ్‌లో జ‌రుగుతున్న స‌మావేశాల నేప‌థ్యంలో ఆయ‌న మీడియాతో మాట్లాడారు. అక్క‌డ సుఖోయ్‌-57 యుద్ధ విమానం త‌యారీకి సంబంధించిన అప్‌డేట్ కూడా ఇచ్చారు. భార‌త్‌తో ర‌క్ష‌ణ స‌హ‌కారాన్ని మ‌రింత బ‌లోపేతం చేయ‌నున్న‌ట్లు ఆయ‌న వెల్ల‌డించారు. దీనిలో భాగంగానే స్టీల్త్ ఫైట‌ర్ విమానం సుఖోయ్‌-57ని రెండు దేశాలు క‌లిసి త‌యారీ చేయ‌నున్న‌ట్లు చెప్పారు.

అడ్వాన్స‌డ్ ఫైట‌ర్ జెట్ త‌యారీ అంశంలో భార‌త్‌తో ఒప్పందం కుదుర్చుకునేందుకు సిద్ధంగా ఉన్న‌ట్లు తెలిపారు. సుఖోయ్‌-57 విమానాన్ని సంయుక్తంగా డెవ‌ల‌ప్ చేసే అంశంలో భార‌త్‌కు స్నేహ హ‌స్తాన్ని చాచామ‌న్నారు. ప్ర‌స్తుతం ఉన్న యుద్ధ విమానాల్లో ఇదే బెస్ట్ అని తెలిపారు. సంయుక్తంగా ఈ యుద్ధ విమానం త‌యారీ అంశంలో భార‌త్‌పై ఎటువంటి వ‌త్తిడి ఉండ‌బోద‌న్నారు. అయితే ఈ అంశంపై కేంద్ర ర‌క్ష‌ణ శాఖ తుది నిర్ణ‌యం తీసుకోవాల్సి ఉంటుంద‌ని భార‌త విదేశాంగ శాఖ చెప్పింది.