ఇంటిని తలపిస్తున్న పంజాబ్‌ రైతు లారీ

న్యూఢిల్లీ: వ్యవసాయ చట్టాలను కేంద్ర ప్రభుత్వం వెనక్కి తీసుకోవాలని డిమాండ్‌ చేస్తూ పంజాబ్‌, హర్యానా రైతులు ఢిల్లీ సరిహద్దులోని సింఘు వద్ద నెల రోజులకుపైగా నిరసనలు చేస్తున్నారు. మరోవైపు శీతాకాలం కావడంతో చలి నుంచి రక్షణ కోసం రైతులు తమకు తోచిన ఏర్పాట్లు చేసుకుంటున్నారు. ఇందులో భాగంగా పంజాబ్‌కు చెందిన ఒక రైతు తన లారీని ఏకంగా ఇంటిగా మార్చేశారు. జలంధర్‌కు చెందిన హర్‌ప్రీత్ సింగ్ మట్టు డిసెంబర్‌ 2న సింఘు ప్రాంతానికి వచ్చి రైతు నిరసనల్లో పాల్గొన్నారు. వారం రోజుల తర్వాత ఆయనకు ఇంటిపై ధ్యాస మళ్లింది. ఒకవైపు రైతు సమస్యలపై కేంద్రం ఏదీ తేల్చకపోవడం, మరోవైపు ఇంటికి దూరంగా ఉండాల్సి ఉండటంతో ఏం చేయాలో తోచలేదు.

స్నేహితుడి సలహా మేరకు తనకు చెందిన కంటైనర్‌ లారీని ఇంటిగా మార్చేశారు హర్‌ప్రీత్‌ సింగ్‌. టాయిలెట్‌, బెడ్‌, సోఫా, టీవీ, మొబైల్‌ చార్జింగ్‌ వంటివి అందులో ఏర్పాటు చేశారు. భార్య, కుమారుడు, బంధువుతోపాటు తన హోటల్‌కు చెందిన సుమారు 90 మంది సిబ్బందితో కలిసి గత నెల రోజులుగా లారీ ఇంటిలో ఉంటున్నారు. నిరసనల్లో పాల్గొన్న రైతులకు ప్రతి రోజు ఎల్లవేళలా టీ, స్నాక్స్‌, పకోడీలు వంటివి రోజంతా ఉచితంగా అందిస్తున్నారు. రైతు కుటుంబానికి చెందిన హర్‌ప్రీత్‌ సింగ్‌ నిరసనల్లో పాల్గొన్న రైతులకు తనకు తోచిన సహాయం చేస్తున్నారు. 

లోకల్ టు గ్లోబల్.. వార్త ఏదైనా.. అన్నీ ఒకే యాప్లో. నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.